ვიღაცის ან ვიღაცების გულგრილობას, უპასუხისმგებლობას ბავშვის სიცოცხლე შეეწირა – აიღონ პასუხისმგებლობა, დანარჩენს სხვა დროს ვიტყვი, ახლა გლოვის დროა, – ამის შესახებ „ლელო საქართველოსთვის“ ლიდერი მამუკა ხაზარაძე სოციალურ ქსელში წერს.
„დიდი ტრაგედია დატრიალდა თბილისში, ვიღაცის ან ვიღაცეების გულგრილობას, უპასუხისმგებლობას ბავშვის სიცოცხლე შეეწირა, ვუსამძიმრებ ოჯახს.
ყველანაირი პოლიტიკური განცხადება უადგილო და ზედმეტია, იმედია შესაბამის პირებს ეყოფათ გამბედაობა საზოგადოებას მიაწოდონ ობიექტური ინფორმაცია გამოძიების და მომხდარის შესახებ. აიღონ პასუხისმგებლობა… დანარჩენს სხვა დროს ვიტყვი, ახლა გლოვის დროა“,- წერს ხაზარაძე.
ცნობისთვის, ვაკის პარკში, შადრევანში სამი ბავშვი ბურთის ამოსატანად ჩავიდა, რა დროსაც მათ დენმა დაარტყა. ბავშვები კლინიკაში სასწრაფო დახმარების ბრიგადამ გადაიყვანა. ერთ-ერთი ბავშვის, 13 წლის გოგონას მდგომარეობა თავიდანვე მძიმე იყო და ის ხეჩინაშვილის კლინიკაში გარდაიცვალა. ერთი ბავშვი ამ დრომდე იაშვილის კლინიკაში რჩება, ერთი კი „ნიუ ჰოსპიტალსის“ კლინიკაშია.
შინაგან საქმეთა სამინისტრომ გამოძიება სისხლის სამართლის კოდექსის 240-ე პრიმა მუხლით დაიწყო, რაც უსაფრთხოების წესების დარღვევას გულისხმობს, რასაც მოჰყვა ჯანმრთელობის ნაკლებად მძიმე ან მძიმე დაზიანება.
