„ნაციონალური მოძრაობის“ წევრები აგიტაციას კანონდარღვევით ახორციელებენ – ამის შესახებ ფრაქცია „ქართული ოცნების“ ლიდერმა მამუკა მდინარაძემ საგანგებო ბრიფინგზე განაცხადა.
მამუკა მდინარაძე აღნიშნული ფაქტის შესწავლის მოთხოვნით ცენტრალურ საარჩევნო კომისიას მიმართავს და აცხადებს, რომ საკითხი დაუყოვნებლივ რეაგირებას მოითხოვს.
„დღეს ერთ-ერთმა მოქალაქემ სოციალურ ქსელში განათავსა ვიდეომასალა, სადაც ასახულია, თუ როგორ ცდილობს ნაციონალური მოძრაობა, გავლენა მოახდინოს ამომრჩევლებზე, მათთვის დამახასიათებელი კანონსაწინააღმდეგო მოქმედებებით.
ვიდეოში ნათლად ჩანს, რომ ნაციონალური მოძრაობის მიერ დანიშნული, ბათუმის N1 უბნის საარჩევნო კომისიის წევრი მარინა ჟღენტი ღიად ახორციელებს ნაციონალური მოძრაობის წინასაარჩევნო აგიტაციას. აღნიშნული ქალბატონი მოქალაქეს აწვდის შესაბამის დოკუმენტაციას და ამასთანვე აწვდის ნაციონალური მოძრაობის სააგიტაციო მასალას, რაც აშკარა კანონდარღვევაა. ეს ქმედება აკრძალულია საარჩევნო კოდექსის 45-ე მუხლის მეოთხე პუნქტის თანახმად, რაც გულისხმობს წინასაარჩევნო აგიტაციის გაწევას და აგიტაციაში მონაწილეობის აკრძალვას საარჩევნო კომისიის წევრისათვის“ – განმარტავს მამუკა მდინარაძე.
მისი თქმით, ვიდეომასალაში საარჩევნო კომისიის წევრი მკაფიოდ აღნიშნავს, რომ დავალება მიღებული აქვს „ნაციონალური მოძრაობის“ შტაბიდან.
„მოცემული ფაქტი კიდევ ერთხელ ადასტურებს, რომ ნაციონალური მოძრაობის რეალური სახე არის ეს, თუ როგორ ცდილობენ ისინი ნებისმიერი მეთოდით გავლენა მოახდინონ ამომრჩევლის თავისუფალ ნებაზე, როგორც ამას აკეთებდნენ თავიანთი მმართველობის მთელ პერიოდში. აქედან გამომდინარე, მივმართავ ცესკოს დაუყოვნებლივ შეისწავლოს აღნიშნული საკითხი და მოახდინოს მკაცრი რეაგირება მოცემულ ფაქტზე“ – აცხადებს ფრაქცია „ქართული ოცნების“ ლიდერმა.
