აშშ-ის საზაფხულო ლიგის შეხვედრებში, ეროვნული საკალათბურთო ასოციაციის წლევანდელი პირველობის გამარჯვებული „მილუოკის“ ახალწვეულმა სანდრო მამუკელაშვილმა ჩინებული შთაბეჭდილება დატოვა და რიგ შეხვედრებში საუკეთესო გახლდათ. საზაფხულო ლიგის მატჩების შემდეგ უნდა გადაწყვეტილიყო, NBA-ს კლუბის ხელმძღვანელობა ქართველთან ორწლიან კონტრაქტს ოფიციალურად თუ გააფორმებდა.
გუშინ ცნობილი გახდა, რომ დიდი ალბათობით სანდრო მამუკელაშვილი იმ თორმეტი მოთამაშის სიაში მოხვდება, რომლებიც მომავალ სეზონში „მილუოკი ბაქსის“ ღირსებას დაიცავს. ცნობილია მისი ხელფასიც _ მიმდინარე სეზონში (2021/2022) სანდრო 462 629 დოლარს აიღებს, 2022/2023 წლების სეზონში კი ქართველი კალათბურთელის ანაზღაურება 1 576 305 დოლარი იქნება.
ამერიკული საკალათბურთო საზომით სანდროს პირველი წლის ანაზღაურება ძალიან ცოტაა. საქმე იმაშია, რომ აშშ-ის ეროვნულ საკალათბურთო ასოციაციას საკუთარი კანონები გააჩნია და ახალბედა მოთამაშისთვის ხელფასის მინიმალური ზღვარი აქვს დაწესებული. აი, მომდევნო წლებში მამუკელაშვილი თავს თუ გამოიჩენს, მისი ყოველწლიური ანაზღაურება მკვეთრად მოიმატებს.
ესპანური „ვალენსიას“ ვებგვერდი, წარსულში ამ გუნდის კარის დარაჯ ხოსე მანუელ სემპერეს ესაუბრა. სემპერე „ვალენსიას“ რიგებში 1979-1995 წლებში ასპარეზობდა. ინტერვიუში სემპერე გიორგი მამარდაშვილსაც შეეხო და ქართველი თბილად მოიხსენია.
„ის არის მეკარე, რომელსაც აქვს ბევრი პროექცია და თვისებები, რაც მის დიდ მომავალში მარწმუნებს. „ხეტაფესთან“ ძალიან კარგი იყო, ძალიან მშვიდი, ლა ლიგაში დებიუტისას. მე ვნახე მეკარე, რომელიც თითქოს ლა ლიგაში ძალიან დიდი ხანია თამაშობს“.
სანდრო მამუკელაშვილი საჩემპიონო საკალათბურთო გუნდში მოხვედრასთან ახლოსაა, გიორგი მამარდაშვილი კი საფეხბურთო „ვალენსიას“ ძირითად შემადგენლობას უშინაურდება.
ამ დროს, ხვიჩა კვარაცხელია კვლავ ყაზანის „რუბინის“ ღირსებას იცავს და ნაკლებია შესაძლებლობა, რომ მომავალ სეზონამდე ძლიერ ევროპულ გუნდში ვიხილოთ.
რუსულ მასმედიაში გამოქვეყნდა ინტერვიუ რუსლან ნიგმატულინთან. ეს პიროვნება ახლო წარსულში რუსეთის ეროვნული გუნდის ღირსებას იცავდა. რუსლანთან საუბარი ჩვენთვის იმით გამოდგა საინტერესო, რომ ხვიჩა კვარაცხელიაზეც ისაუბრა და მისი ჯერჯერობით არშემდგარი ევროპული ტრანსფერის უმთავრესი მიზეზიც ახსნა.
„ხვიჩას თაობაზე პირადად მე გასულ ზაფხულს „ნაპოლის“ წარმომადგენლები დამიკავშირდნენ. მაგრამ “რუბინმა” ძალიან მაღალი ფასი დააწესა _ 20 მილიონი ევრო. საქმე არ გამოვიდა და ყველაფერი სწრაფად დასრულდა“.
ერთ მაგალითს მოგიყვანთ. უზბეკი ელდორ შომუროდოვი ჯერ „ჯენოაში” გადავიდა, ცოტა ხნის წინ კი „რომაში” ჩაირიცხა. არა იმიტომ, რომ აზიელი კვარაცხელიაზე უკეთესი მოთამაშეა, არამედ იმიტომ, რომ მასში უზარმაზარ თანხას არ ითხოვდნენ.
ძალიან გვინდა რომ ხვიჩა ბოლოსა და ბოლოს სერიოზულ ევროპულ გუნდში მოხვდეს, იმედიც გვაქვს რომ ადრე თუ გვიან ასეც მოხდება, მაგრამ ამისათვის „რუბინის“ ხელმძღვანელობის გაზრდილი მადის დაოკებაა საჭირო.
ორი დღის წინ სრულიად საფეხბურთო ევროპა თავს იმტვრევდა კრიშტიანო რონალდოს მომავალი საფეხბურთო კლუბის თაობაზე და ვისაც არ ეზარებოდა საკუთარ მოსაზრებას „აფრქვევდა“. დუმდა მხოლოდ ამ „აურზაურის“ მთავარი მოქმედი გმირი. და აი, გუშინ კრიშტიანომ დუმილი დაარღვია.
„ეს უფრო მეტია, ვიდრე უპატივცემულობა ჩემთვის, უპატივცემულობა კაცისა და ფეხბურთელის მიმართ. სოციალურ ქსელში ჩემს მომავალზე საუბარი არასერიოზული ხერხით მიმდინარეობს, ეს კი უპატივცემულობაა კლუბების მიმართ, ისევე, როგორც მათი ფეხბურთელისა და თანამშრომლების მიმართ.
ისევე, როგორც ესპანეთს, ასევე სხვა ქვეყნების წარმომადგენლებს მიკავშირებდნენ, თუმცა, არც ერთმა მათგანმა სიმართლის გარკვევა არ მოინდომა. ამიტომ, მე დუმილს ვარღვევ, რათა ვთქვა, რომ არ მივცემ ადამიანებს უფლებას, ჩემი სახელით ითამაშონ. მე ჩემს კარიერასა და საქმეზე ვარ კონცენტრირებული, მზად ვარ ყველა იმ გამოწვევისთვის, რასთან ჭიდილიც მომიწევს. დანარჩენი სხვა? ეს უბრალოდ ყბედობაა”, _ განაცხადა კრიშტიანუ რონალდომ.
ესპანურმა „ბარსელონამ“ ბრაზილიელ ნახევარმცველ ფილიპე კოუტინიოს 10-ნომრიანი მაისური შესთავაზა, რომლითაც 13 წლის განმავლობაში ლიონელ მესი თამაშობდა. რასაკვირველია „ბარსელონას“ საქმეებში ვერ ჩავერევი და ამისი უფლებაც არ გამაჩნია, მაგრამ საკუთარ მოსაზრებას მაინც მოგახსენებთ _ მიმაჩნია რომ კატალონიური გუნდის ხელმძღვანელობამ მესის საპატივცემულოდ 10 ნომერი ხმარებიდან სამუდამოდ უნდა ამოიღოს. არგენტინელი „ბარსელონას“ ცოცხალი ლეგენდაა, არა აქვს მნიშვნელობა კარიერის დარჩენილ წლებში სად იასპარეზებს. რომ არა ლეო მესი, „ბარსა“ მნიშვნელოვან წარმატებებს, ალბათ, ვერ მიაღწევდა.
[sexy_author_bio]
