გუშინ, ამერიკულ მასმედიაში საინტერესო ფოტოსურათი გამოქვეყნდა _ “მილუოკი ბაქსის” ქართველმა ახალწვეული სანდრო მამუკელაშვილი ხევსურული ქუდით.
“სან ანტონიოსთან” მიღწეული გამარჯვების შემდეგ, “მილუოკის” მოთამაშე ჯორჯ ჰილმა თანაგუნდელები საკუთარ რანჩოზე მიიპატიჟა. სტუმრებს შორის სანდროც იმყოფებოდა. ქართველი სტუმრად ხევსურული ქუდით მივიდა და რამდენიმე წუთში თვით იანის ანტეტოკუნმპოს ფოტოობიექტივის “მსხვერპლი” შეიქმნა.
სანდრო მამუკელაშვილი NBA-ში ფეხის მოკიდებას ცდილობს, ძიუდოში ოლიმპიური ჩემპიონი ლაშა ბექაური კი მკურნალობისათვის ემზადება.
მიმდინარე წლის 5-7 ნოემბერს ბაქოში, ძიუდოს “გრანდ სლემის” ტურნირი ტარდება და ბექაურისათვის ეს ოლიმპიური თამაშების შემდეგ პირველი შეჯიბრება უნდა ყოფილიყო. სამწუხაროდ, ლაშა აზერბაიჯანის დედაქალაქში ვერ გაემგზავრება _ გუშინ მან თბილისის ტატიშვილის კლინიკაში თიაქარის ოპერაცია გაიკეთა.
პირველი ტურნირი, რომლისთვისაც ლაშა მოემზადება, პარიზის “გრანდ სლემი” იქნება, რომელიც 2022 წლის 5-6 თებერვალსაა ჩანიშნული, მანამდე კი ბექაური ოპერაციის შემდგომ სარეაბილიტაციო კურსსაც გაივლის და სხვა ძველ ტრავმებსაც ბოლომდე მოიშუშებს.
საქართველოს ნაკრების მცველმა საბა კვირკველიამ ხარკოვის “მეტალისტი 1925”-ში სადებიუტო თამაში ჩაატარა. უკრაინის პრემიერლიგის მე-12 ტურში ქართველი ფეხბურთელის გუნდმა შინ “ინჰულეცი” 4:0 გაანადგურა, ხოლო კვირკველია თამაშში 78-ე წუთზე ჩაერთო და ივნისის შემდეგ პირველად ითამაშა.
მატჩის შემდეგ, “მეტალისტი 1925”-ის მთავარმა მწვრთნელმა ვალერი კრივენცოვმა ქართველ მცველის შესახებ შემდეგი კომენტარი გააკეთა:
“კვირკველიას დებიუტი შედგა, 20 წუთზე ცოტა ნაკლები ითამაშა. ის არის ძლიერი და გამოცდილი მცველი, რომელიც ფორმას მალე აღიდგენს. გადავწყვიტეთ, ეთამაშა, რომ საშინაო არენის და გუნდის ატმოსფერო შეეგრძნო. თუ შესაძლებელი იქნება, ვეცდებით, რომ მან უფრო მეტი სათამაშო დრო მიიღოს, რადგან ჩვენი ლაზარეთი, სამწუხაროდ, არ იცლება”.
24 ოქტომბერს ბრიტანულმა “მანჩესტერ იუნაიტედმა” და კატალონიურმა “ბარსელონამ” “ლივერპულთან” და მადრიდის “რეალთან” მტკივნეული მარცხები განიცადეს.
ინგლისში, “ლივერპულთან” განცდილი სამარცხვინო წაგების (0:5) შემდეგ აქტუალური გახდა “მანჩესტერ იუნაიტედის” ამჟამინდელი მთავარი მწვრთნელის გადაყენების საკითხი.
იტალიელი ჟურნალისტის, ფაბრიციო რომანოს ინფორმაციით, შესაძლოა, ოლე გუნარ სულშერი მთავარი მწვრთნელის პოსტიდან მიმდინარე კვირას გაათავისუფლონ. იტალიელის მტკიცებით, ნორვეგიელ ფეხბურთის სპეციალისტს ანტონიო კონტე შეცვლის.
რომანოს მტკიცებით, “წითელი ეშმაკების” მესვეურები გადაწყვეტილებას მომდევნო დღეებში მიიღებენ. თუ ნორვეგიელი სპეციალისტი თანამდებობას დატოვებს, მის შემცვლელად ანტონიო კონტე სახელდება. ანალოგიური ცნობა სხვა წყარომაც გააჟღერა. “Manchester Evening News”-ის ცნობით, კონტე მზადაა, “წითელი ეშმაკები” ჩაიბაროს.
საწინააღმდეგო მოსაზრება გამოთქვა “მანჩესტერ იუნაიტედის” ყოფილმა ფეხბურთელმა, გარი ნევილმა, რომელმაც “იუნაიტედის” ხელმძღვანელებს ურჩია, კონტესგან თავი შორს დაიჭირონ და გუნდის თავკაცის პოსტი მას არ ჩააბარონ.
“კონტე თავისუფალია, მაგრამ მას მანჩესტერში არ მოვიყვანდი. ჩემი აზრით, იგი “იუნაიტედისთვის” შესაფერისი მწვრთნელი არაა. შესაძლოა, ვცდებოდე და კონტე ხვალ დანიშნონ, მე კი მას მხარი დავუჭირო. გვინახავს მწვრთნელები, რომლებიც განსაკუთრებული სტილით გამოირჩევიან და “ოლდ ტრაფორდზე” არაფერი გამოუვიდათ. მაგალითად, შემიძლია ლუის ვან გაალი მოვიყვანო, თუმცა, არ ვამბობ, რომ არ არსებობს მწვრთნელი, რომელსაც მანჩესტერში წარმატების მიღწევა არ შეუძლია. უბრალოდ, ეს ძალიან რთულია. ჟოზე მოურინიო მსოფლიოში საუკეთესო თავკაცია, მაგრამ მანჩესტერში მოსვლის შემდეგ, არაფერი გამოუვიდა”.
კატალონიის დედაქალაქში კი “ბარსელონა” _ მადრიდის “რეალის” შეხვედრის დასრულების შემდეგ (1:2), “ბარსას” ამჟამინდელ მთავარ მწვრთნელ რონალდ კუმანს თავს დაესხნენ _ კუმანს “კამპ ნოუს” გასასვლელთან გულშემატკივრები დახვდნენ, რომლებიც მის მიმართ აგრესიულად იყვნენ განწყობილნი და ნიდერლანდელ სპეციალისტს შეურაცხყოფა მიაყენეს.
ქომაგები მის ავტომობილს წასვლის საშუალებას არ აძლევდნენ და შეურაცხმყოფელი ფრაზებით მიმართავდნენ.
“ბარსელონამ” ამის შესახებ ტვიტერში განცხადებაც გამოაქვეყნა და ქომაგების ქმედება დაგმო:
“ბარსელონა” საჯაროდ გმობს ძალადობრივ და შეურაცხმყოფელ ქმედებებს, რაც ჩვენმა მწვრთნელმა “კამპ ნოუს” დატოვებისას განიცადა. კლუბი შესაბამის უსაფრთხოების ზომებს მიიღებს, რომ მსგავსი სამწუხარო შემთხვევები აღარ განმეორდეს”.
გუშინ საყურადღებო ინფორმაცია გაავრცელა გამოცემამ “Marca”. “ბარსელონას” მთავარ მწვრთნელ რონალდ კუმანს სიტუაციის გამოსასწორებლად სამი მატჩი მისცეს.
კლუბის ხელმძღვანელობის გადაწყვეტილებით, ნიდერლანდელ სპეციალისტს უახლოეს შეხვედრებში სამსახურის შესანარჩუნებლად დადებითი შედეგის ჩვენება მართებს.
“ბარსა” “ლა ლიგაში” “რაიო ვალეკანოსა” და “ალავესს”, ხოლო ჩემპიონთა ლიგაზე კიევის “დინამოს” დაუპირისპირდება და ამ მატჩების შედეგებზე იქნება დამოკიდებული კუმანის მომავალი.
[sexy_author_bio]
