მიუხედავად იმისა, რომ ევროპის კონტინენტზე სატრანსფერო ფანჯარა უკვე დაიხურა, ხვიჩა კვარაცხელიათი დაინტერესებული კლუბების რაოდენობა დღითი დღე იმატებს.
ბრიტანული მედიის მტკიცებით, „მანჩესტერ იუნაიტედში“ ენტონისა და ჯეიდონ სანჩოს მომავალი ბუნდოვანია, შესაბამისად, ინგლისური კლუბი ახალი შემტევი ფეხბურთელის ძიებაშია და მათთვის პრიორიტეტი სწორედ ხვიჩაა.
გამოცემა „Goal“-ის მტკიცებით, მანჩესტერული გუნდი კვარაცხელიას შესაძენად იანვარში ყველაფერს გააკეთებს.
„მანჩესტერ იუნაიტედს“ კვარაცხელია მოსწონს, ანტონისა და ჯეიდონ სანჩოს მომავალი „ოლდ ტრაფორდზე“ კი ბუნდოვანია. წყაროები ვარაუდობენ, რომ “წითელი ეშმაკები” იანვარში ქართველი ფეხბურთელის შესაძენად all in-ზე წავლენ“, – დაწერა გამოცემამ.
გუშინ კი ამ სავარაუდო ტრანსფერის შესახებ „Daily Mail“-ის ჟურნალისტმა, მაიკ კიგანმაც ისაუბრა:
„არ გამიკვირდება, რომ „ნაპოლის“ შემტევი ხვიჩა კვარაცხელია მომდევნო სეზონში პრემიერლიგაში აღმოჩნდეს. ვიცი, რომ აქ მას, „იუნაიტედის“ ჩათვლით, ბევრი თაყვანისმცემელი ჰყავს, მაგრამ ვერ წარმოვიდგენ, რომ ის იაფი დაჯდება, შუა სეზონში გაცვლა კი ნაკლებად სავარაუდოა. იანვრისთვის, სეზონის ბოლომდე იჯარა შეიძლება იყოს გამოსავალი“.
ამას ყველაფერს ემატება ხვიჩას კონტრაქტის საკითხიც, რომლის განახლებასაც, როგორც ჩანს, „ნაპოლი“ არ გეგმავს. თუ გავითვალისწინებთ იმას, რომ ხვიჩა გასულ სეზონში „სერია A“-ს საუკეთესო მოთამაშე გახდა და „ნაპოლის“ იტალიის ჩემპიონის ტიტულის მოპოვებაში ერთ-ერთი მთავარი როლი ითამაშა, მაშინ მას გაცილებით მეტი ანაზღაურება ეკუთვნის, იტალიის მოქმედი ჩემპიონების განცხადებით კი, მათ ამაზე საუბარი ხვიჩას წარმომადგენლებთან არ ჰქონიათ.
გამოცემა „The Atletic“-ის მტკიცებით, „ლივერპულში“ ხვიჩა კვარაცხელია მოჰამედ სალაჰის შემცვლელად განიხილება. ეგვიპტელმა შეიძლება მომდევნო სეზონიდან კარიერა საუდის არაბეთში გააგრძელოს, იურგენ კლოპი კი, მის ერთ-ერთ შემცვლელად ქართველ ფეხბურთელს განიხილავს. სხვა კონკრეტული და ფინანსური დეტალები უცნობია.
რამდენიმე დღის წინ ქართველი ფეხბურთელი ესპანურმა მედიამ „ბარსელონასაც“ დაუკავშირა. ამ სავარაუდო ტრანსფერის შესახებ ცნობა კატალონიურმა გამოცემამ „El Nacional“ გაავრცელა.
მისი ინფორმაციით, „ბარსელონას“ ხელმძღვანელობამ დაიწყო გეგმის შემუშავება, რომლის მიზანია მომავალ ზაფხულში ხვიჩა კვარაცხელიას ტრანსფერის განხორციელება. პორტუგალიელი ჟოაო ფელიქსი სეზონის ბოლოს მადრიდის „ატლეტიკოში“ დაბრუნდება, რადგან საიჯარო ხელშეკრულება დაუსრულდება.
„ბარსელონას“ ფინანსურად გაუჭირდება დე ლაურენტისის მოთხოვნების დაკმაყოფილება, რადგან ნაპოლი მასში 100 მილიონ ევროზე მეტს მოითხოვს.
„ერთი, რაც „ბარსელონას“ შესაძლოა, დაეხმაროს კვარაცხელიას შეძენაში ის არის, რომ ხვიჩა ერთ-ერთი ყველაზე დაბალანაზღაურებადი ფეხბურთელია კლუბში, ის სულ რაღაც ერთ მილიონ ევროს გამოიმუშავებს და როგორც ჩანს, მისი აგენტი მზადაა, კატალონიელებს კარი გაუღოს მოლაპარაკებებისთვის“,– დაწერა გამოცემამ.
ხვიჩა კვარაცხელია 2022 წელს გადავიდა „ნაპოლიში“. ის სადებიუტო წელსვე გახდა „სერია A“-ს საუკეთესო ფეხბურთელი, ხოლო „ნაპოლიმ“ 33-წლიანი პაუზის შემდეგ მოიგო იტალიის ჩემპიონატი. ხვიჩა ასევე დაასახელეს ჩემპიონთა ლიგის საუკეთესო ახალგაზრდა ფეხბურთელად.
გასულ სეზონში ხვიჩა კვარაცხელიამ ყველა ტურნირზე 43 ოფიციალურ მატჩში 14 გოლი გაიტანა, 14 საგოლე პასი გააკეთა და 5-ჯერ პენალტი მოიპოვა, ხოლო მიმდინარე სეზონში ორ შეხვედრაში ერთი საგოლე პასი მიითვალა. „ფრანს ფუთბოლმა“ ის „ოქროს ბურთის“ ოცდაათ ნომინანტს შორის დაასახელა.
ავტორი
