საქართველოში სასამართლოს მიერ მიხეილ სააკაშვილისათვის სამწლიანი პატიმრობის შეფარდების ფაქტს პოლიტიკური სივრცესა და სამოქალაქო სექტორის ნაწილში უარყოფითი შეფასებები მოჰყვა. საკითხთან დაკავშირებით მოქმედმა პრეზიდენტმა გიორგი მარგველაშვილმა აღნიშნა, რომ პროკურატურის მიერ დევნის საფუძვლად იმ მუხლის გამოყენება, რომელიც კონსტიტუციით აქვს გარანტირებული, შემაშფოთებელია. როგორ შეიძლება შეფასდეს საქართველოს ყოფილი პრეზიდენტისთვის პატიმრობის შეფარდება იმ უფლებამოსილების გამოყენებისთვის, რომელიც მას კანონიერად გააჩნია _ ამ თემაზე სასაუბროდ ,,გურია ნიუსი“ უფლებადამცველთა გაერთიანების თავმჯდომარეს ნიკოლოზ მჟავანაძეს ესაუბრა. როგორც მჟავანაძე ჩვენთან საუბრისას აცხადებს, სააკაშვილმა საკუთარი უფლებამოსილება არაკეთილსინდისიერად გამოიყენა. უფლებადამცველი მარგველაშვილსა და არასამთავრობო ორგანიზაციების ნაწილს მიხეილ სააკაშვილთან გარიგებაში ადანაშაულებს.
„თავად გიორგი მარგველაშვილს ძალიან საეჭვო გადაწყვეტილებები აქვს მიღებული, მაგალითად, მარგველაშვილმა შეიწყალა თავისი ცოლისძმა, რომელიც ნარკოტიკების მოხმარებისთვის და სხვა მძიმე დანაშაულისთვის მრავალჯერ იყო ნასამართლევი. საქართველოს პრეზიდენტს ჰგონია, რომ მის მიერ მიღებული გადაწყვეტილებების გამო ანალოგიურად შეექმნება პრობლემები. სტრასბურგის სასამართლომ დაადგინა ხელისუფლების დანაშაული გირგვლიანის საქმესთან დაკავშირებით. სააკაშვილის საქმესთან დაკავშირებით არასამთავრობო ორგანიზაციების პროტესტი კიდევ ერთხელ აჩვენებს მათ ნამდვილ სახეს. სწორედ, ეს ხალხი „აპრავებდა“ სააკაშვილის რეჟიმს. როცა სააკაშვილის დროს ციხეებში გაუპატიურება ხდებოდა ,,ენჯეოები“, ,,საია“, ,,საერთაშორისო გამჭვირვალობა – საქართველო“, ხმას არ იღებდნენ სისტემურ დანაშაულზე. სწორედ , ეს არის ილუსტრაცია იმისა, რომ ეს ადამიანები დაკავშირებულნი არიან მიხეილ სააკაშვილთან. საქართველოს პრეზიდენტმა გიორგი მარგველაშვილმა სასამართლო ინსტანციას არ სცა პატივი, რაც კიდევ ერთხელ მოწმობს, რომ მარგველაშვილი და ეს არასამთავრობო ორგანიზაციები ალიანსში არიან მიხეილ სააკაშვილთან, რაც ,,ქართულმა ოცნებამ“ არ შეისმინა. მარგველაშვილი ამბობდა, რომ მისი მეგობარი რამიშვილი იყო და როგორ შეიძლებოდა ამ კაცის პრეზიდენტად გამწესება. სამწუხაროა, როცა ქართული მედია იმ არასამთავრობოებს სცნობს სამოქალაქო სექტორად, რომლებიც სოროსის ფონდიდან და სხვა საერთაშორისო ფონდებიდან ფინანსდებიან. თუკი დანაშაულს ჩაიდენს პრეზიდენტი, მას ხელი არ უნდა ვახლოთ? როცა უცხოეთში პრეზიდენტს ასამართლებენ, კონსტიტუციას თელავენ? ეს არარეალურია. საქართველოში ცდილობენ, რომ სააკაშვილს ტანჯულის მანტია მოარგონ. მე არ გამოვრიცხავ, რომ მარგველაშვილმა ყოფილი პრეზიდენტი შეიწყალოს, რადგან მარგველაშვილის სცენარი სააკაშვილზე პასუხისმგებლობის აცილებას გულისხმობს“ , _ განაცხადა ნიკოლოზ მჟავანაძემ.
,,საქართველოს ახალგაზრდა იურისტთა ასოციაციის“ იურისტი გიორგი გოცირიძე უფლებადამცველთა გაერთიანების თავმჯდომარის მიერ გამოთქმულ კრიტიკას პოლიტიკურ განცხადებას უწოდებს და ,,გურია ნიუსთან“ საუბრისას აღნიშნავს, რომ შეფასება არასწორია. როგორც გიორგი გოცირიძე აცხადებს, კონსტიტუციაში არაფერია ნათქვამი იმის შესახებ, რომ პრეზიდენტმა შეწყალების უფელბამოსილების გამოსაყენებლად რაიმე პროცედურული ხასიათის ვალდებულება უნდა დაიცვას.
,,ჩვენ ანგარიში გვაქვს მომზადებული სააკაშვილის პერიოდში სავარაუდო პოლიტიკურ პატიმრებთან დაკავშირებით და ასევე, ანგარიშები გვაქვს მომზადებული იმ პერიოდში არასათანადო მოპყრობასთან დაკავშირებით. ეს არის პოლიტიკური განცხადება და ამაზე კომენტარს ვერ გავაკეთებ, რადგან შეფასება არასწორია. რაც შეეხება სააკაშვილის განაჩენს, ჩვენი პოზიციის დასაფიქსირელად მნიშვნელოვანია, რომ ვნახოთ სასამართლოს განაჩენის სამოტივაციო ნაწილი, ამის შემდეგ გვექნება ამ საკითხთან დაკავშირებით საბოლოო პოზიცია, რაც შეეხება, ზოგადად, შეწყალების უფლებამოსილებას, ეს არის პრეზიდენტის აბსოლუტური ხასიათის უფლება. კონსტიტუციაში წერია, რომ პრეზიდენტი შეიწყალებს მსჯავრდებულს. კონსტიტუცია არ ამბობს, რომ ეს უნდა მოხდეს მხოლოდ და მხოლოდ კანონით გათვალისწინებულ შემთხვევაში და ამ უფლებამოსილების გამოსაყენებლად რაიმე პროცედურული ხასიათის ვალდებულება უნდა დაიცვას პრეზდიდენტმა. გარდა ამისა, საქართველოს ზოგადი ადმინისტრაციული კოდექსის თანახმად, გადაწყვეტილების მისაღებად პრეზიენტს არ სჭირდება ზოგადი ადმინისტრაციული კოდექსის მოთხოვნების დაცვა და არ არის სავალდებულო, რომ დასაბუთებული იყოს ეს აქტი ან ექვემდებარებოდეს სასამართლო კონტროლს. პრეზიდენტი ხელმძღვანელობს არა რაიმე სამართლებრივი ხასითის მოთხოვნით, არამედ მიზანშეწონილობიდან გამომდინარე. უცნაურია ის, რომ ამ გადაწყვეტილებით სასამართლომ გარკვეული მოთხოვნები დაუდგიანა პრეზიდენტს შეწყალების უფლებამოსილების გამოყენებისთვის იმიტომ, რომ კონსტიტუცია არ ითვალისწინეს პრეზიდენტის შეზღუდვას რაიმე სამართლებრივი ხასიტაის მოთხოვნიეს, როდესაც ის შეწყალების აქტს გადმოსცემს“, _ განაცხადა გიორგი გოცირიძემ.
საქართველოს ყოფილი პრეზიდენტი, მიხეილ სააკაშვილი, სასამართლომ სანდრო გირგვლიანის საქმეზე დამნაშავედ სცნო და სამი წლით თავისუფლების აღკვეთა შეუფარდა. პროკურატურა მიხეილ სააკაშვილს სამსახურებრივი უფლებამოსილების ბოროტად გამოყენებას ედავებოდა. გამოძიების თანახმად, მიხეილ სააკაშვილმა კუდ-ის იმჟამინდელ ხელმძღვანელს დათა ახალაიას სანდრო გირგვლიანის მკვლელობისთვის მსჯავრდებულების შეწყალების უკანონო დაპირება მისცა და შემდეგ უკვე შეწყალების კომისიის გვერდის ავლით გერონტი ალანია, მიხეილ ბიბილურიძე, ავთანდილ აფციაური და ალექსანდრე ღაჭავა შეიწყალა, რითაც შექმნა სამართლებრივი ბერკეტი, მსჯავრდებულების პირობით ვადამდე ადრე გათავისუფლებისთვის.
