რას აპირებს ,,ქართული ოცნება“ საპრეზიდენტო არჩევნებში, დაასახელებს საკუთარ კანდიდატს თუ მხარს დაუჭერს დამოუკიდებელი დეპუტატის, მაგალითად, სალომე ზურაბიშვილის კანდიდატურას?_ ამ კითხვაზე პასუხი, ჯერჯერობით, არ მიგვიღია.
ზურაბიშვილს კითხვაზე _ გეგმავს თუ არა სალომე ზურაბიშვილი 2018 წლის ოქტომბრის არჩევნებში მონაწილეობას? _ პასუხი არ აქვს.
,,გურია ნიუსმა“ ფრაქცია „ქართული ოცნება – მწვანეების“ თავმჯდომარეს, გიორგი გაჩეჩილაძეს ღიად ჰკითხა, როგორ იქნება დამოუკიდებელი კანდიდატი სალომე ზურაბიშვილი, თუ მის კანდიდატურას მმართველი პარტია დაუჭერს მხარს?
_ გაჩეჩილაძემ საქართველოს მოქმედი პრეზიდენტის თანამდებობაზე დანიშვნის წინა პერიოდი გაგვახსენა, მარგველაშვილს მმართველობა დაუწუნა და ,,ქართული ოცნების“ ეგიდით დანიშნული პრეზიდენტი დამოუკიდებლობის კუთხით სალომე ზურაბიშვილის კანდიდატურას შეადარა:
_მარგველაშვილი ვინ წამოაყენა? და როგორ ფიქრობთ, მერე მარგველაშვილმა რა გააკეთა? მარგველაშვილი მთლად დამოუკიდებელი არ გახდა, იმიტომ, რომ ოპოზიციისაკენ გადაიხარა, იმის იმედით, რომ საპრეზიდენტო არჩევნებში ოპოზიციას მხარი დაეჭირა, მაგრამ ჩაუფლავდა ეს ამბავი. რადგან ვიცნობ სალომე ზურაბიშვილს, მარგველაშვილზე უფრო დამოუკიდებელი იქნება.ზურაბიშვილს ვიღაცამ ხომ უნდა დაუჭიროს მხარი.
მარგველაშვილისადმი ჩემი დამოკიდებულება არის მკვეთრად უარყოფითი, იმიტომ, რომ ადამიანმა, რომელიც ნეიტრალური უნდა ყოფილიყო, მთლიანად ოპოზიციის ფუნქციები შეითავსა იმ იმედით, რომ საპრეზიდენტო არჩევნებში ოპოზიციას მხარი დაეჭირა.
ეს არ გამოვიდა და ამის გამო ვეტოები დაადო ისეთ მნიშვნელოვან სახელმწიფოებრივ, უსაფრთხოებასთან დაკავშირებულ კანონებს, რომ, ფაქტობრივად, შესაძლებელი იყო კრიზისი შეექმნილიყო ქვეყანაში და როგორი დამოკიდებულება უნდა მქონდეს მარგველაშვილზე? „ნაციონალებმა“ წამოაყენეს ვიღაც კანდიდატურა, რომელიც რუსეთის კაგებეს სამსახურში მუშაობდა და 10 -მა პარტიამ დაუჭირა მხარი, ის დამოუკიდებელი იქნება?“_გვითხრა გაჩეჩილაძემ.
მმართველ პარტიაში არიან ისეთი დეპუტატები, რომლებიც სალომე ზურაბიშვილის კანდიდატურას კი, ან არ უჭერენ მხარს, თუმცა, არიან ოქროს შუალედის მქონე დეპუტატებიც.
მმართველი გუნდიდან, გიორგი გაჩეჩილაძის აზრით, კარგი იქნება, თუ ,,ქართული ოცნება“ საპრეზიდენტო არჩევნებში საკუთარ კანდიდატს დაასახელებს, მაგრამ სხვა შემთხვევაში, დამოუკიდებელი დეპუტატის კანდიდატურასაც დაუჭერს მხარს.
,,კარგი იქნება, რომ მმართველმა გუნდმა თავისი კანდიდატებიდან დააყენოს კანდიდატურა, მაგრამ თუ გადაწყდა, რომ აბსოლუტურად დამოუკიდებელი კანდიდატი უნდა დასახელდეს, რა თქმა უნდა, მხარს დავუჭერ.
სალომე ზურაბიშვილს დიდი ხანია ვიცნობ. ოპოზიციაში ერთად ვიყავით, ძაან კარგად ვიცი მისი თვისებები და ხასიათიც. ის ძალიან პრინციპული და დამოუკიდებელი ადამიანია. რაც მთავარია, სახელმწიფოებრივად მოაზროვნეა, იმიტომ, რომ ძალიან დიდი გამოცდილება აქვს საერთაშორისო ორგანიზაციებში მუშაობის. თუ წამოყენებული იქნება სალომე ზურაბიშვილის კანდიდატურა, რა თქმა უნდა, ჩემთვის მისაღები იქნება“, _განაცხადა გაჩეჩილაძემ.
ექსპერტებს საპრეზიდენტო არჩევნებში კანდიდატების ძალთა გადანაწილებაზე კომენტარის გაკეთება, ჯერჯერობით, უჭირთ. მათი თქმით, წინასწარი პროგნოზის გაკეთება მმართველი პარტიის გადაწყვეტილების გაცნობის შემდეგ უფრო სწორი იქნება.
,,ქართული ოცნება“ ინფორმაციას, სავარაუდოდ, მომავალი კვრის ბოლომდე გაჟღერებს.
მანამდე კი, ორშაბათს დუმილს დაარღვევს პარლამენტის დამოუკიდებელი დეპუტატი, სალომე ზურაბიშვილი, რომელიც სამომავლო პოლიტიკური გეგმების შესახებ ისაუბრებს.
