„ქალბატონო თეა, მინისტრო, თქვენ გგონიათ, რომ მართლა დაიმსახურეთ თქვენი თანამდებობა? ჩვენს ნაბრძოლზე ხართ იმ თანამდებობაზე და თქვენ წაიბრძოლეთ რაღაც ერთი წელი, დარბოდით რუსთველზე,“ – ასე მიმართა „პატრიოტთა ალიანსის“ წევრმა, ადა მარშანიამ იუსტიციის მინისტრს. მარშანიამ თეა წულუკიანს “უნამუსო” უწოდა.
“პატრიოტთა ალიანსის” წევრის თქმით, იუსტიციის მინისტრის მოხსენება პარლამენტში ფარისევლური იყო. ადა მარშანიას განცხადებით, მთავრობის წევრმა ყველა პოლიტიკური პარტიის დეპუტატს შეკითხვებზე თანაბრად და ნორმალურად უნდა უპასუხოს.
„პატრიოტთა ალიანსის“ ერთ-ერთმა ლიდერმა სასამართლო სისტემის რეფორმა გააკრიტიკა და წარუმატებლობაში თეა წულუკიანი დაადანაშაულა.
„თქვენი პასუხების დროს გაურკვევლად ვიგრძენი თავი. თქვენ მე რაღაც საკითხებში ჭკუაც რომ გასწავლოთ, უნდა მიიღოთ ეს. პირველი ჭკუის სწავლება ჩემგან მინდა შეგახსენოთ, რომ პარლამენტის სხდომათა დარბაზში ბრძანდებით მინისტრის რანგში და ყველა პოლიტიკური ძალის წარმომადგენელს უნდა უპასუხოთ თანაბრად, ნორმალურად, ზედმეტი კეკლუცობის, თავხედობის, უტაქტო და ზოგჯერ უზრდელი ტონალობის და პასუხების გარეშე. თქვენი გუშინდელი მთელი დღის ნარცისობა ვიხილეთ ჩვენ. თურმე იუსტიციის დარგში რამე მიღწევა თუ არის, თქვენი დამსახურებაა, მე ეს მიხარია, აღვნიშნე კიდევ მაგრამ თურმე, კომპლიმენტის, შექების, კარგი მუშაობის შედეგის დანახვის დაფიქსირების ღირსი არც ყოფილხართ.
“რატომ ატრიალებთ უნამუსოდ ჩემს შეკითხვებს თქვენდამი. ეს არის უნამუსო ილეთი თქვენი მხრიდან. იმიტომ ხომ არა, რომ მე მთავარი გკითხეთ გუშინ, აშკარად გამოჩნდა აქ, რომ თქვენ ხელების დაბანა გინდათ და ისე გინდათ, წარმოადგინოთ მდგომარეობა, რომ ეს უბედურება, რაც მივიღეთ, რაც სასამართლო სისტემის ე.წ. რეფორმის, თქვენ არაფერ შუაში არ ხართ და თქვენ ხელებს იბანთ ჩვენ წინაშე. მე თქვენ დაგაბრალეთ იმ ავბედითი სიის შემოტანა პარლამენტში? არ დამიბრალებია. თქვენ უნამუსოდ და უსინდისოდ თავს იქნევთ სამთავრობო ლოჟიდან, რა უნდა ელაპარაკო ასეთ უნამუსო ადამიანს. შეიძლება ეს ადამიანი იუსტიციის მინისტრი იყოს?… არ გაბედოთ არასოდეს ასეთი ტონით, ასეთი მანერით, სიტყვებით და ასეთ არგუმენტაციით ჩემთან საუბარი, ქალბატონო მინისტრო. კარგად დაიმახსოვრეთ ეს,” – განაცხადა ადა მარშანიამ.
