ოზურგეთში, ანასეულში, დიდი ხანია, წყლის მიწოდების პრობლემა დგას და სანამ პროექტით გათვალისწინებული წყალსადენის მშენებლობა დასრულდება, აქ მცხოვრებლები სვამენ კითხვას, რა ეშველებათ მანამდე?
_ მართლა უნდა დაგვახრჩონ? ერთი კვირაა, ანასეულს წყალი არ მიეწოდება. დასალევ წყალს საიდანღაც ეზიდება ხალხი ბოთლებით და სხვადსხვა ავზით. სარეცხს რა ვუყოთ და ზოგადად ჰიგიენას როგორ მივხედოთ? – ამბობს „გურია ნიუსთან“ ოზურგეთის საკრებულოს წევრი, ქალბატონი ნანული ორაგველიძე.
ახლახან მან, სოციალურ ქსელში, წყლის პრობლემის თაობაზე, პოსტი დადო. ამონარიდი პოსტიდან:
„ერთი კვირაა, ანასეულის მოსახლეობას წყალი არ მიეწოდება მრავალბინიან და მაღალსართულიან სახლებში. არასწორი მართვისა და უსამართლობის გამო შეფერხებები იყო, მაგრამ მოსახლეობის ასეთი გაწამება არ მომხდარა იმ უშუქობის, ყაჩაღობებისა და ქაოსის შემდეგ, რასაც, თითქოს, თავი დავაღწიეთ. ანასეულსა და სოფელ ლიხაურს შორის ხელოვნურად წარმოშობილი წინააღმდეგობა წყლის საკითხზე, ,,ძლიერთა ამა ქვეყნისათა” გავლენით ,ლიხაურის სასარგებლოდ გადაწყდა გასულ წელს. ამასთანავე, მაჟორიტარი დეპუტატის , ბატონი არჩილ თალაკვაძისა და ინფრასტრუქტურისა და მდგრადი განვითარების მინისტრის, ქალბატონ მაია ცქიტიშვილის მითითების თანახმად გადაწყდა, რომ წყლის ახალი გაყვანილობის გაკეთებისა და გაშვების პერიოდამდე, პრობლემა უნდა მოგვარებულიყო შემდეგნაირად: სხვადასხვა დროს, ერთი დღით გადაიკეტოს ანასეული და მთელი მარაგი წყლისა დარჩეს სოფელ ლიხაურში, მეორე დღეს მთლიანად გადაიკეტოს ლიხაური და ანასეულს მიეწოდოს ბუნებრივი წყალი მთლიანად, შეფერხების გარეშე. ეს მითითება, თითქმის სრულდებოდა ნორმალურად. მიუხედავად იმისა, რომ იყო სიცხიანი ამინდებიც და ზემოთ აღნიშნულ მითითებამდე კეთდებოდა განცხადებები, ,,წყალი არ არის სათავეში, წყალი გაქრაო”. ამჟამად ადგილობრივმა ბურჟუებმა და დაინტერესებულმა პირებმა იგრძნეს, რა, რომ მაჟორიტარ დეპუტატს და მთავრობას მუდმივად არ აქვს დრო და შესაძლებლობა, თვალ-ყური ადევნოს, რა ხდება და როგორ ხდება, არც თავხედობას ერიდებიან, არც ტყუილებს და ისევ აცხადებენ წყალი არ არის სათავეშიო“, _წერს ორაგველიძე.
„გურია ნიუსი“ დაუკავშირდა ქალბატონ ნანულის, ასევე ანასეულის რამდენიმე მცხოვრებს და პრობლემის შესახებ პირისპირ საუბარი ვთხოვეთ.
_დღეს ხალხი შინიდან გასულია სხვადასხვა ფართობებში სამუშაოდ. ზოგს ბოსტანი აქვს, ზოგს _ ყანა. ამიტომ უნდა შევთანხმდეთ, რომ ყველა აქ დაგხვდეთ, – გვითხრეს მათ.
ჩვენ ასევე ვესაუბრეთ ოზურგეთის მუნიციპალიტეტის საკრებულოს წევრს, ლავრენტი ბიგვავას, რომელიც ასევე ანასეულში წლების მანძილზე ცხოვრობდა და პრობლემას იცნობს.
_ანასეულს და ლიხაურს, კომუნისტების დროიდან, ერთი წყალსადენიდან მიეწოდებოდა წყალი. ეს ცნობილია. შემდეგ, როცა იკლო წყლის დებეტმა და დიდხანს არსებობდა პრობლემა, ამიტომ შენდება ახალი ქსელი. იცით თქვენ, რომ ჭაბურღილების სისტემით კეთდება ეს და ელექტროტუმბოებით მოხდება წყლის მიწოდება. უნიკალური პროექტია ეს, რომლიც წლის ბოლომდე დასრულდება და საბოლოოდ მიოხდება ანსეულის უზრუნველყოფა.
_ბატონო ლავრენტი, ქალბატონი ნანული და ასევე ანასეულის რამდენიმე მკვიდრი ამბობს, რომ თალაკვაძის და ცქიტიშვილის მითითება, დღეგამოშვებით წყლის გადაკეტვა ორივე დასახლებაში, არ სრულდება. ვინ იგულისხმება ადგილობრივ ბურჟუებში და როგორც ამ საქმეში ჩახედულმა, საიმედო რა შეგიძლია, გვითხრათ?
_პირველ რიგში, მე რა ვიცი, ვინაა ეს ბურჟუები. ზოგს აქვს ბოსტანი, ზოგს ბაღჩა. ხომ ვერ დაუშლი წყალს ხალხს? ასე ვთქვათ, ლიხაურის წყალსადენი ანასეულისას, თავიდანვე დაერთებულია. დებეტის უკმარისობის გამო , დროთა განმავლობაში, გაჩნდა პრობლემა და სწორედ ამიტომ შენდება ახალი სისტემა. რაც შეეხება, თალაკვაძის და ცქიტიშვილის მოხსენიებას, მათ კანონი კი არ მიუღიათ. ხალხი მანამდეც ასე მონაცვლეობით კეტავდა წყალს, რომ ორ დასახლებას ერთმანეთისთვის შეეწყო ხელი. . მათ, უბრალოდ, მოიწონეს ასეთი მიდგომა და თქვს, რომ ახალი წყალსადენის აშენებამდე, გაეგრძელებინათ ურთიერთხელშეწყობა. ახლა, დიდი ხანია, გვალვაა და ძალიან საგრძნობლად არის შემვირებული წყლის ნაკადი. მალე წვიმაც მოვა, ალბათ, ცოტათი მოიმატებს წყალი. ზოგადად, მცირე რაოდეობით მოდის ახლა, თორემ ერთი კვირა მთლიანად გათიშული არასდროს ყოფილა. თუმცა, ამით იმის თქმა არ მინდა, რომ დღის განმავლობაში ორი საათით მომდინარე წყალი ეყოფა კორპუსებში მცხოვრებ ხალხს. ალბათ, ცოტა მოთმენა მოგვიწევს და მალე ანასეულს ულევად ექნება წყალი. ახალი წყალსადენის უნიკალური პროექტის მშენებლობა, გითხარით და თქვენც იცით, დასასრულს უახლოვდება, – გვითხრა ლავრენტი ბიგვავამ.
„გურია ნიუსი“ მოკვლევას აკეთებს ანასეულში წყლის მიწოდების პრობლემებსა და მშენებარე ახალი ქსელის დასრულების კონკრეტულ თარიღზე, მის სიავკარგეზე, რაზეც უახლოეს საგაზეთო ნომერში გიამბობთ.
