ოზურგეთის მუნიციპალიტეტის სოფელ შემოქმედში მცხოვრები მარტოხელა პენსიონერი, შორენა სიმონიშვილი, საკუთარ კარმიდამოში ენერგოსისტემის წარმომადგენელთა მიერ ხეხილოვნების გადაჭრას აპროტესტებს და ითხოვს, ყურადღება მიაქციონ.
_ კოლოვატსაათები იკარგება და სხვაგანაც სამუშაო გვაქვსო, _ იძახდნენ. ხის მოჭრა და სიჩქარე იქნება? არც კანონს ვეწინააღმდეგები, არც სახელმწიფოს, მაგრამ რა ვქნა მარტოხელა პენსიონერმა? ამ გაჩეხილ ხეებს მარტო რომ ვეპატრონო, მუშა უნდა დავიქირავო. საამისოდ კი ორი თვის პენსია არ მეყოფა. ვაზი ნახე, როგორ აჩეხეს. შაჰ-აბასი თუ შვებოდა ამას, ალბათ… ჩემი უფლება არ ირღვევა, კაცო? უფლებების დაცვაზე რომ ყვირის ყველა, ტელევიზორი ვერ ჩამირთავს_ ამბობს ქალბატონი შორენა.
„გურია ნიუსი“ „ენერგო-პრო ჯორჯიას“ ოზურგეთის სერვისცენტრის მენეჯერს, გია ნაკაიძეს დაუკავშირდა. გვითხრა, რომ შორენა სიმონიშვილის პრობლემა მისთვის ცნობილია. მან თქვა, რომ ხაზების გასწვრივ , ათი მეტრის მანძილზე, სადენებს არ უნდა ეხებოდეს რაიმე.
_ ასეთი პროცესის ჩატარებისას, არაა გათვალისწინებული არც კომპენსაცია. ვთქვათ და, მაღალი ძაბვის ხაზებში, მაღალი ხეების ტოტები გაეჩხირა, რაც აუცილებლად უბედურ შემთხვევას გამოიწვევს, ვის დასჯიან? იყო ფაქტები, რომ პირუტყვი დაიღუპა… რა ვქნათ ასეთ დროს? პასუხისმგებლობა მთლიანად ჩვენ დაგვეკისრება. ამიტომ სხვა გზა არ არის. უნდა გაიკაფოს, _ გვითხრა გია ნაკაიძემ.
იგი ასევე შეგვპირდა, რომ მოჭრილი ხეების გაკაფვასა და დაფასოებაში, თუ შეძლებენ სიმონიშვილის ფიზიკურ დახმარებას, დათვალიერების შემდეგ გვეტყვის. ამჯერად კი ოზურგეთში არ იმყოფება.
„გურია ნიუსი“ ასევე ესაუბრა ოზურგეთის მუნიციპალიტეტის მერის მოადგილეს, ირაკლი სირაძეს. მან აღგვითქვა, რომ გაეცნობა მარტოხელა პენსიონერი ქალბატონის მდგომარეობას და შესაძლებლობის ფარგლებში მას დახმარების ხელს გაუწვდიან.
ვრცლად სიმონიშვილის პრობლემის შესახებ, მალე საგაზეთო სტატიაში გიამბობთ.
