ცნობილი გახდა, რომ უკრაინის 21-წლამდე ნაკრები ევროპის ჩემპიონატის ბოლო ნახევარფინალისტი გახდა. სამწუხაროდ საქართველომ პარიზის ოლიმპიადაზე გასვლის ბოლო შანსი დაკარგა.
უკრაინამ ფავორიტი საფრანგეთი – 3:1 დაამარცხა და ტურნირზე ასპარეზობას აგრძელებს. თავიდან საფრანგეთი იგებდა რაიან ჩერკის ეფექტური გოლით, მაგრამ ცოტა ხანში, პირველივე ტაიმში უკრაინა დაწინაურდა.
მიხაილო მუდრიკმა ჯერ პენალტი მოიპოვა, რომელიც გეორგი სუდაკოვმა გაიტანა, ხოლო 44-ე წუთზე მუდრიკმა გასაოცარი პასი გააკეთა, სუდაკოვი მეკარეს შეატოვა და მანაც დუბლი გაიფორმა. 86-ე წუთზე საბოლოო ანგარიში არტიომ ბონდარენკოს გოლით დაფიქსირდა – 3:1 უკრაინელთა სასარგებლოდ.
ნახევარფინალში უკრაინის ნაკრები 5 ივლისს ესპანეთს შეხვდება. მეორე ნახევარფინალში კი იმავე დღეს ბათუმში, ინგლისი და ისრაელი დაუპირისპირდებიან.
პარიზის ოლიმპიადის საგზური ისრაელს, უკრაინას და ესპანეთს ერგოთ, მასპინძელ საფრანგეთთან ერთად.
გუშინ, „ვალენსიას“ ლეგენდარულმა მეკარემ სანტიაგო კანისარესმა გამოცემა „Sportitalia“-სთან გიორგი მამარდაშვილის შესახებ ისაუბრა.
„შესანიშნავი მეკარეა, ძალიან მაღალი დონის. როდესაც მეკარე გარდა იმისა, რომ ძალიან ახალგაზრდაა და ყოველწლიურად საგრძნობლად იხვეწება, როგორც ის, მაშინ ეს მხოლოდ ერთ რამეს ნიშნავს: ვერ გაიგებ, რა არის მისი მაქსიმალური დონე. დღეს ვერ გეტყვით, სადამდე შეიძლება მივიდეს ამ გზის გაუმჯობესებით. ის შეიძლება ძალიან საინტერესო არჩევანი იყოს ნებისმიერი გუნდისთვის. „ვალენსიაში“ არ არის ხელშეუხებელი, რადგან კლუბი იძულებულია ყოველწლიურად გაყიდოს ფეხბურთელები.
როგორც ვთქვი, ჩემი აზრით, მას მსოფლიოს ნებისმიერ გუნდში თამაში შეუძლია. შესაბამისად, რა თქმა უნდა, „ინტერსა“ და „მილანშიც“. ვფიქრობ, ის არის მოთამაშე, რომელიც შეიძლება იყოს ძირითადი შემადგენლობის მეკარე ისეთ გუნდში, რომელიც ყოველ სეზონში ჩემპიონთა ლიგაზე მომდევნო 15 წლის განმავლობაში ითამაშებს. გიორგი ნამდვილად „ვალენსიას“ ყველაზე ღირებული ფეხბურთელია“. – განაცხადა სანტიაგო კანისარესმა.
გამოცემა „Corriere Della Sera“-ს მტკიცებით, საქართველოს ნაკრებისა და „მეცის“ თავდამსხმელი გიორგი მიქაუტაძე „იუვენტუსის“ ინტერესის სფეროში რჩება.
გამოცემის ცნობით, ტურინელთა ახალი გენერალური დირექტორი კრისტიანო ჯუნტოლი 22 წლის ქართველ ფეხბურთელს აკვირდება, რომელსაც „მეცთან“ კონტრაქტი 2026 წლის ზაფხულამდე აკავშირებს.
ჯუნტოლი ელოდება მოვლენების განვითარებას, რათა ნახოს შესაძლებლობა რეალური მოლაპარაკებების დასაწყებად.
გიორგი მიქაუტაძე 23 გოლით გასულ სეზონში „ლიგა 2“-ის საუკეთესო ბომბარდირი გახდა, ასევე სეზონის საუკეთესო ფეხბურთელად დაასახელეს.
იტალიური გამოცემა „IL Mattino“-ს ცნობით, „ნაპოლის“ ახალი მთავარი მწვრთნელი რუდი გარსია, მომდევნო სეზონში გუნდის ლიდერად ხვიჩა კვარაცხელიას მოიაზრებს.
„რუდი გარსია ხვიჩა კვარაცხელიასგან ყველაზე მეტს ელოდება. ქართველი ფეხბურთელი „მარადონაზე“ კიდევ დიდი ხნის განმავლობაში გაიბრწყინებს. მის ახალ მწვრთნელს ტექნიკური ფეხბურთელები ძალიან მოსწონს. გარსია ხვიჩას ხარისხის გაუმჯობესებას მოსთხოვს, რადგან ფრანგი თვლის, რომ ახალგაზრდა გარემარბი „ნაპოლის“ ლიდერი უნდა გახდეს“, – დაწერა გამოცემამ.
ნეაპოლში ჩატარებული ბრწყინვალე სეზონის შემდეგ, ვიქტორ ოსიმენმა მსოფლიოს არაერთი გრანდის ყურადღება მიიპყრო. ნიგერიელმა თავდამსხმელმა იტალიის ჩემპიონობაში ერთ-ერთი მთავარი როლი ითამაშა და ყველა ტურნირის ჩათვლით 39 შეხვედრაში 31 გოლი დაუგროვდა. გასაკვირი არაა, რომ მიმდინარე სატრანსფერო ფანჯრის დროს მისთვის ტოპ-კლუბები იბრძვიან.
მიუხედავად „მანჩესტერ იუნაიტედის“, მიუნხენის „ბაიერნის“, ლონდონის „ჩელსისა“ და სხვა გუნდების ინტერესისა, ოსიმენმა ნიგერიულ გამოცემა „Soccernet“-თან საუბრისას აღნიშნა, რომ ის ნაპოლიში ბედნიერია.
„ძალიან ვამაყობ იმით, რომ სკუდეტოს გამარჯვებული ვარ. ჩემთვის, ეს უდიდესი რამ არის. ახლა ტიტულებზე ვარ დამოკიდებული, რადგან ეს პროფესიონალურ დონეზე ჩემი პირველი ჩემპიონობაა.
ერთი სული მაქვს სეზონი როდის დაიწყება. ამაზე უკეთესი ადგილი არ არსებობს. ბედნიერი ვარ, რომ სწორი გადაწყვეტილება მივიღე და აქ მოვედი. ნეაპოლიტანელებთან ერთად ასეთი უდიდესი რამის მიღწევა არის ის, რაც ჩემში ყოველთვის ღიმილს გამოიწვევს. ჩემი შვილთაშვილები გააცნობიერებენ, რომ მათმა ბაბუამ რაღაც განსაკუთრებული გააკეთა“,- განაცხადა ოსიმენმა.
ავტორი
