პანკისის სპეცოპერაციის დროს დაჭრილი 19 წლის თემირლან მაჩალიკაშვილი საავადმყოფოში გარდაიცვალა. პანკისის ხეობაში ფიქრობენ, რომ დაჭრილის სამკურნალოდ საზღვარგარეთ გადაყვანა დაგვიანდა, რამაც ფატალური შედეგი გამოიწვია. პანკისელი ახალგაზრდის გარდაცვალებასთან დაკავშირებით, შეფასებები გაკეთდა პოლიტიკურ სივრცეში, მმართველი გუნდი გამოძიების შედეგების დასრულებას ელოდება, ხოლო ოპოზიცია ხელისუფლებას არაქმედითუნარიანობაში ადანაშაულებს. რა შეფასებები შეიძლება გაკეთდეს პანკისელი ახალგაზრდის თემირლან მაჩალიკაშვილის გარდაცვალებასთან დაკავშირებით _ ამ თემაზე სასაუბროდ ,,გურია ნიუსი“ პოლიტოლოგი გია ხუხაშვილს ესაუბრა. როგორც ხუხაშვილი ჩვენთან საუბრისას აცხადებს, პოლიტიკოსები თბილი კაბინეტებიდან გაკეთებული განცხადებებით შემოიფარგლებიან და რეალური კომუნიკაცია ადამიანებთან არ გააჩნიათ. პოლიტოლოგი ხელისუფლებას ობიექტური გამოძიების ჩატარებისკენ მოუწოდებს და დასძენს, რომ არაობიექტური გამოძიების შემთხვევაში, საქართველო გარკვეული საფრთხეების წინაშე დადგება.
,,დიდი ტრაგედია მოხდა, გარდაიცვალა ახალგაზრდა ბიჭი და აუცილებელია, რომ ობიექტური გამოძიება ჩატარდეს. ყველაზე მეტად რაც მაშფოთებს, ის არის, რომ ,,ქართული ოცნების“ პოლიტიკური ელიტა, ფაქტობრივად, პარაზიტებად გადაიქცა. პოლიტიკოსები მხოლოდ ტელეეკრანებიდან და თბილი კაბინეტებიდან საუბარს მიეჩვივნენ და რეალური კომუნიკაცია ადამიანებთან არ გააჩნიათ. სიტუაცია საკმაოდ დრამატული და საშიშია. იმის ნაცვლად, რომ პრემიერ-მინისტრი პანკისში ჩავიდეს და თავის თანამოქალაქეებს ეფერებოდეს, დღესაც მთავრობის სხდომიდან განცხადებების გაკეთებით შემოიფარგლება. თბილი კაბინეტიდან საუბარი იმის შესახებ, რომ ქისტები ძალიან გვიყვარს, პრობლემას ვერ მოაგვარებს. პოლიტიკოსებმა კეთილი უნდა ინებონ, ერთი ადგილი აწიონ ადგილზე ჩავიდნენ და მგლოვიარე ხალხს მოეფერონ. ობიექტური გამოძიება უნდა ჩატარდეს, რათა გაირკვეს რა იყო პანკისელი ახალგაზრდის თემირლან მაჩალიკაშვილის დაღუპვის ძირითადი მიზეზი. თუ ასე არ მოხდა, უნდა ველოდოთ გართულებებს, მით უმეტეს, მაშინ, როცა ტერორიზმის პრევენციასთან დაკავშირებით როგორც ჩანს მთლად კარგად არა გვაქვს საქმე“, _ განაცხადა გია ხუხაშვილმა.
,,გურია ნისუსი“ საკითხთან დაკავშირებით მმართველი გუნდის წარმომადგენელს ესაუბრა. როგორც ,,ქართული ოცნების“ წევრი გია ჟორჟოლიანი ჩვენთან საუბრისას აცხადებს, თემირლან მაჩალიკაშვილის საქმესთან დაკავშირებით გამოძიება სრულფასოვნად უნდა ჩატარდეს.
,,შემთხვევა გამოძიებული უნდა იყოს დეტალურად და, რა თქმა უნდა, პარლამენტი და სრულიად პოლიტიკური სპექტრი კარგად უნდა გაერკვეს საქმის დეტალებში. აუცილებელია, პასუხი გაეცეს დეტალურად თუ რა შემთხვევასთან გვაქვს საქმე. რასაკვირველია, ეს არის ქვეყნის უსაფრთხოებასთან დაკავშირებული საკითხი, ამიტომ ყველა კითხვას უნდა გაეცეს პასუხი“, _ განაცხადა გია ჟორჟოლიანმა.
19 წლის თემირლან მაჩალიკაშვილი 2017 წლის 26 დეკემბერს, სუს-ის მიერ პანკისში ჩატარებული სპეცოპერაციის დროს თავის არეში დაიჭრა. სპეცოპერაციის შედეგად, სულ 4 პირი დააკავეს. ყველა მათგანს თბილისში, ბერი გაბრიელ სალოსის გამზირზე ჩატარებული სპეცოპერაციისას განეიტრალებულ პირებთან კავშირი და მათი დახმარება ედება ბრალად.
სუსის ცნობით, პანკისის ხეობასა და თბილისში ჩატარებული სპეცოპერაციის დროს დაკავებული ხუთი მოქალაქე დაეხმარა აჰმედ ჩატაევს საქართველოს საზღვარზე გადმოსვლაში. სუსის ცნობით, დაკავებული პირები 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე, მათივე ცნობით, იგეგმებოდა თავდასხმები საქართველოში მომუშავე დიპლომატიურ კორპუსებზე.
