“ნაციონალური მოძრაობა,, და ,,ევროპული საქართველო“, რომელთა გზები 2017 წლის იანვარში გაიყარა, წინასაარჩევნოდ ერთიანდებიან.
ყოფილმა თანაგუნდელებმა სამპუნქტიანი შეთანხმებას ხელი ბრიუსელში ევროპის სახალხო პარტიის თავმჯდომარის, ჯოზეფ დოულის შუამდგომლობით მოაწერეს.
ხელშეკრულების მიხედვით, ყოფილი თანაგუნდელები საპრეზიდენტო არჩევნების მეორე ტურში გასულ საუკეთესო შედეგის მქონე კანდიდატს დაუჭერენ მხარს.
,,გურია ნიუსმა“ ,,ნაციონალური მოძრაობის“ წევრს რომან გოცირიძეს მიმართა კითხვით, რატომ გადაწყდა ყოფილ თანაპარტიელებთან გაერთიანება და არჩევნებში გამარჯვების რა შანსებს ხედავს ,,ნაციონალური მოძრაობა“?
_ახლა გადამწყვეტი მომენტია საპრეზიდენტო არჩევნების სახით. ,,ქართული ოცნების“ რეიტინგი კატასტროფულად ვარდება, გამომდინარე იქიდან, რომ ამ ექვსი წლის განმავლობაში ვერ მიაღწიეს წარმატებას ვერც ერთი მიმართულებით და განსაკუთრებით მძიმე მდგომარეობაა ეკონომიკაში. დადგა ხელისუფლების შეცვლის დრო და ეს მემორანდუმი, რომელიც გავაფორმეთ, ითვალისწინებს იმას, რომ თუკი გაიმართება მეორე ტური, რომელი პარტიაც არ უნდა იყოს წარმოდგენილი ოპოზიციური ფლანგიდან, გარდა პრორუსული ორიენტაციის პარტიებისა, ყველამ საუკეთესო შედეგის მქონე ერთ კანდიდატს დავუჭიროთ მხარი.
მთავარი არის ის, რომ ჩვენ უნდა გავერთიანდეთ და შევძლოთ გამარჯვება პირველ ტურში. ,,ნაციონალური მოძრაობა“ და ,,ევროპული საქართველო“ რეიტინგით დღეს მთავარი ოპონენტები არიან ხელისუფლების. ვხედავთ, რომ არის სახელისუფლებო კრიზისი და ამ კრიზისის ფონზე ოპოზიციას აქვს შანსი, რომ გაიმარჯვოს საპრეზიდენტო არჩევნებში“,_ გვითხრა გოცირიძემ.
ყოფილი პარტიების გაერთიანებაზე აზრი ვკითხეთ მმართველი გუნდის წარმომადგენელს. როგორც დავით ჭიჭინაძე გვეუბნება, ,,ნაციონალური მოძრაობა“ არასდროს დაშლილა, ამიტომ ეს გაერთიანებაც არ გაკვირვებია.
,,როცა ადამიანები ერთმანეთს შორდებიან, შორდებიან სამუდამოდ. ისინი ეტყობა შვებულებაში იყვნენ ერთმანეთისგან, ცოტა დაისვენეს და შემდეგ დაინახეს, რომ უერთმანეთოდ ვერ ძლებენ. პირდაპირ ჩანს, რომ ,,ევროპული საქართველო“ სააკაშვილის გარეშე არაფერს წარმოადგენს. ვფიქრობ, საზოგადოებისთვის ნათელია, რომ მათი განქორწინება იყო დროებითი. როგორც ჩანს, დაინახეს გაერთიანების საჭიროება და ღმერთმა მშვიდობაში მოახმაროთ ერთმანეთი“,_გვითხრა ჭიჭინაძემ.
პარტიების კოჰაბიტაციაზე საუბრობს ,,გურია ნიუსთნ“ პოლიტოლოგი, გია ხუხაშვილი. მისი თქმით, საპრეზიდენტო არჩევნებში პარტიების გაერთიანება ხელშესახები შედეგის მომტანი ვერ იქნება.
,,დიდი ხანია ვამბობდი, რომ არაფერი ადამიანების ისე აკავშირებთ, როგორც ერთობლივი დანაშაული, აქედან გამომდინარე, ასეთი განვითარება მოსალოდნელი იყო, არა იმიტომ, რომ მათ ერთმანეთი შეუყვარდათ. მათ ერთმანეთი ეზიზღებათ, მაგრამ აერთიანებთ თავის დროზე ჩადენილი სერთო დანაშაული და არ აძლევთ დაშორების საშუალებას. ორივე პარტია ,,ნაციონალური მოძრაობაა“. ,,ევროპული საქართველო“ კი დაირქვეს, მაგრამ სრულად იზიარებენ იმ ნარატივს, რაც ,,ნაციონალურ მოძრაობას“ გააჩნია. ასე რომ, მათ გაერთიანებაში პერსპექტივას ვერ ვხედავ“,_გვითხრა ხუხაშვილმა.
რა შედეგს მოიტანს ყოფილი თანაპარტიელების გაერთიანება ოქტომბრის არჩევნების შედეგებით გახდება ცნობილი. ამ დროისთვის არც ერთ საპარლამენტო პარტიას საკუთარი საპრეზიდენტო კანდიდატი დასახელებული არ ჰყავს. საპრეზიდენტო კანდიდატების შესახებ ინფორმაცია, სავარაუდოდ, უახლოეს მომავალში გახდება ცნობილი. პროცედურულად, წელს პრეზიდენტი, გამონაკლისის სახით, 6 წლის ვადით აირჩევა.
