გუშინ, ფრანგულმა სპორტულმა მასმედიამ გაავრცელა ცნობა, რომ მაროკოს ეროვნული გუნდისა და კლუბი „ანჟერის“ 22 წლის ნახევარმცველი აზედინ უნაჰი, დიდი ალბათობით ხვიჩა კვარაცხელიას „ნაპოლიში“ გადავა.
აზედინ უნაჰი „ანჟერში“ 2021 წლიდან ასპარეზობს და 47 მატჩში 2 გოლი აქვს გატანილი. მაროკოს ნაკრების წევრი კი 2022 წლიდანაა და 17 თამაშში თავი 2 გოლით გამოიჩინა.
იტალიურმა მედიამ საქართველოს ნაკრებისა და ფრანგული „მეცის“ შემტევი გიორგი მიქაუტაძე კლუბ „ჯენოას“ დაუკავშირა. ცნობილი გახდა რომ „ჯენოა“ მიმდინარე ზამთრის სატრანსფერო პერიოდში ახალი თავდამსხმელის შეძენას გეგმავს და ერთ–ერთი კანდიდატი 22 წლის ქართველია.
მართალია, მიქაუტაძემ „მეცთან“ ხელშეკრულება ერთი თვის წინ 2026 წლამდე გააგრძელა, მაგრამ გენუელები მზად არიან ფრანგულ კლუბს მის სანაცვლოდ 3 მილიონი ევრო გადაუხადონ.
„ჯენოა“ ამჟამად „სერია B“–ში ასპარეზობს, სადაც მესამე ადგილზეა. მისი მთავარი მწვრთნელი ცნობილი იტალიელი ფეხბურთელი ალბერტო ჯილარდინოა.
გიორგი მიქაუტაძემ „მეცის“ მაისურით მიმდინარე სეზონში 16 მატჩი ჩაატარა, 8 გოლი გაიტანა და 5 საგოლე გადაცემა მიითვალა.
საკალათბურთო ევროლიგის მორიგ ტურში თორნიკე შენგელიას, ყოფილი კლუბის, „ბასკონიას“ წინააღმდეგ დაპირისპირება მოუწია. ქართველის „ვირტუს ბოლონია“ დამარცხდა – 79:90.
საქართველოს ნაკრების მოთამაშე თავის გუნდში საუკეთესო იყო. მან, 20 წუთში 15 ქულა, 3 მოხსნა და 1 ჩაჭრა დააგროვა. ქართველმა კალათბურთელმა 12-დან 4 ორქულიანი, 3-დან 2 სამქულიანი და 1-დან 1 საჯარიმო ჩააგდო
გუშინ, ბრაზილიურმა საინფორმაციო საშუალებებმა გაავრცელეს ცნობა, რომ „ფეხბურთის მეფე“ – პელეს ჯანმრთლობა მკვეთრად გაუუარესდა.
სან პაულოს ალბერტ აინშტაინის სახელობის საავადმყოფომ დაადასტურა, რომ 82 წლის პელეს თირკმელებისა და გულის ფუნქციონირების პრობლემები აქვს, თუმცა ჯერაც ჩვეულებრივ პალატაში იმყოფება, სადაც ყველა საჭირო პროცედურას უტარებენ. მისი რეანიმაციაში გადაყვანა საჭირო არ გამხდარა.
ინსტაგრამზე სპეციალური განცხადება გაავრცელეს პელეს ქალიშვილებმაც:
„სახლში შობას ყველა ერთად ვერ შევხვდებით. ექიმებთან კონსულტაციების შემდეგ გადავწყვიტეთ, რომ სხვადასხვა მიზეზების გამო უმჯობესია, მამა საავადმყოფოში დარჩეს“.
პელეს 2021 წლის სექტემბერში მსხვილი ნაწლავის კიბოს დიაგნოზი დაუსვეს.
გუშინ, იტალიურ მედიაში გაჟღერდა ინფორმაცია, რომ მადრიდის „რეალი“ კილიან მბაპეს შეძენის იმედს არ კარგავს. მიუხედავად იმისა, რომ გასულ ზაფხულს გარიგება სკანდალურად ჩაიშალა, მადრიდული გუნდი კვლავ დაფიქრდა, რომ ძველი წყენა გვერდით უნდა გადადოს და რადაც არ უნდა დაუჯდეს, მბაპე ქალაქ მადრიდში გადაიყვანოს.
„რეალი“ მზად არის, მომავალი წლის ზაფხულში „პარი სენ–ჟერმენს“ 486 მილიონი ევრო გადაუხადოს, ხოლო უშუალოდ მბაპეს კონტრაქტში 630 მილიონი ევრო ჩადოს.
პორტუგალიელი კრიშტიანუ რონალდუ საუდის არაბეთში ჩავიდა, სადაც ადგილობრივ „ალ–ნასრთან“ 2030 წლამდე გააფორმებს კონტრაქტს.
37 წლის პორტუგალიელი კლუბში 2,5 წლის განმავლობაში მოთამაშის სტატუსით იქნება და ხელფასის სახით წელიწადში 200 მილიონ ევროს მიიღებს. შემდეგ კი საუდის არაბეთის ელჩი გახდება მსოფლიო ჩემპიონატის მასპინძლობის საკითხში. საუდის არაბეთი, ეგვიპტე და საბერძნეთი ერთობლივი განაცხადის შეტანას აპირებენ ფიფაში 2030 წლის მუნდიალის მასპინძლობის თაობაზე.
საფრანგეთის ფეხბურთის ფედერაციის პრეზიდენტმა ნოელ ლე გრემ ადგილობრივ მედიასთან კატარის მუნდიალის ფინალური შეხვედრის შემდეგ არგენტინელი ფეხბურთელების ქცევაზე ისაუბრა.
„ჩემს არგენტინელს კოლეგას მივწერე და ავუხსენი, რომ რაც მისი ნაკრების ფეხბურთელებმა გააკეთეს, არანორმალური იყო. მათი ქმედებები არც სპორტული ეთიკის ნორმებში ჯდებოდა, არც ადამიანურ ზნეობაში. წარმოუდგენლად მიმაჩნია ამგვარი საქციელის მიღება. მათ ყველა ზღვარს გადააბიჯეს. კილიან მბაპე სანიმუშოდ მოიქცა და არგენტინელებს პასუხი არ დაუბრუნა.“
ავტორი
