2022 წელს საქართველოს მთავრობამ დაიწყო ახალი სოციალური პროგრამა – „საზოგადოებრივ სამუშაოებზე დასაქმების ხელშეწყობის ქვეპროგრამა“, რომელიც მიზნად ისახავს სიღარიბის შემცირებასა და სოციალურ შემწეობებზე დამოკიდებულების შეზღუდვას. პროგრამის ფარგლებში, სოციალურად დაუცველ პირებს საზოგადოებრივი სამუშაოს შესრულება 300 ლარის ოდენობით უნაზღაურდებათ, ასევე უნარჩუნდებათ სოციალური დახმარება 4 წლის ვადით.
მიუხედავად იმისა, რომ პროგრამა უკვე მესამე წელია მიმდინარეობს, მისი რეალური შედეგები და პროცესი გაუმჭვირვალეა. სტატისტიკური მონაცემებით, 2022-2023 წლებში ქვეპროგრამაში 69 322 ბენეფიციარი ჩაერთო, თუმცა, ეს რიცხვი ბევრად ჩამორჩება მთავრობის თავდაპირველ მოლოდინებს. დღემდე არ არსებობს სრული ინფორმაცია, თუ რა არის მონაწილეთა დაბალი ჩართულობის მიზეზი, ან რა პრინციპით ხდება ვაკანსიების შექმნა. ასევე, უცნობია, თუ რამდენად ეხმარება პროგრამა სოციალურად დაუცველ პირებს შრომის ბაზარზე დამკვიდრებაში.
პროექტი, რომელსაც მუნიციპალური დემოკრატიის განვითარების ცენტრი USAID-ის სამოქალაქო საზოგადოების ჩართულობის პროგრამის მხარდაჭერით ახორციელებს, მიზნად ისახავს შეისწავლოს, რამდენად ეფექტიანად ემსახურება სამთავრობო პროგრამა სოციალურად დაუცველთა მდგომარეობის გაუმჯობესებას და მათ დასაქმებას შრომის ბაზარზე; გამოავლინოს მისი ძირითადი ხარვეზები, საჭიროებები და შეიმუშაოს რეკომენდაციები, რომლებიც ყველაზე მოწყვლადი ჯგუფის – სოციალურად დაუცველთა უფლებებისა და მდგომარეობის რეალურ გაუმჯობესებას შეუწყობს ხელს; ასევე, გამოავლინოს, ხომ არ ხდება ამ პროგრამისა და მისი ბენეფიციარების გამოყენება პოლიტიკური მიზნებისთვის, ან რა გავლენას ახდენს ის მუნიციპალიტეტების სერვისებზე.
პროექტი განხორციელდება ხუთ სამიზნე მუნიციპალიტეტში: რუსთავში, გორში, ნინოწმინდაში, ხარაგაულსა და ოზურგეთში. მუნიციპალიტეტები შერჩეულია ისეთი კრიტერიუმებით, როგორიცაა მოსახლეობის ეთნიკური მრავალფეროვნება, მთის რეგიონების დასახლებები და დასაქმების სხვა პროგრამების პარალელური მოქმედება.
პროექტი ასევე მოიცავს ადგილობრივი არასამთავრობო ორგანიზაციების, სამოქალაქო აქტივისტებისა და საკრებულოების ჩართულობას, რაც ხელს შეუწყობს პროგრამის შესახებ ინფორმაციის გავრცელებასა და დისკუსიის გახსნას მისი გაუმჯობესების საკითხებზე.
მონიტორინგი გამოავლენს პროგრამის რეალურ სურათს, ხოლო ბენეფიციარები მიიღებენ მეტ ინფორმაციას, რა შესაძლებლობები აქვთ მათ სოციალურ შემწეობებზე დამოკიდებულების დასაძლევად და შრომის ბაზარზე დასამკვიდრებლად.
