პარტია “ლელომ” ჩოხატაურის საკრებულოს გადაწყვეტილება ჩოხატაურის ცენტრში მდებარე ნოდარ დუმბაძის სახელობის სკვერის საპრივატიზაციო ნუსხაში შეტანის შესახებ სასამართლოში გაასაჩივრა, _ ამის შესახებ “ლელოს” წევრმა მალხაზ ჩხიკვაძემ სოციალურ ქსელში დაწერა.
“ 28 სექტემბერს, სასამართლოში გავასაჩივრეთ დუმბაძის სახელობის სკვერისთვის სტატუსის შეცვლისა და მის საპრივატიზაციო ნუსხაში შეტანის შესახებ ჩოხატაურის საკრებულოს განკარგულება…
სამართლებრივი გზით ვიბრძოლებთ, რომ გაუქმდეს ეს განკარგულება, რომელიც ეწინააღმდეგება როგორც ჩოხატაურელთა ინტერესებს, ასევე მოქმედ კანონმდებლობას...” _ წერს ჩხიკვაძე.
ჩვენ ვცადეთ, გაგვერკვია, თუ რა მოლოდინი აქვს სასამართლო პროცესთან დაკავშირებით, ჩოხატაურის საკრებულოს თავმჯდომარეს, ირაკლი კუჭავას.
_ ბატონო ირაკლი, ნოდარ დუმბაძის სკვერთან დაკავშირებით მინდა რომ გკითხოთ…
_ ამასთან დაკავშირებით მე ერთხელ უკვე გავაკეთე კომენტარი ტელევიზიით და სხვა კომენტარის გაკეთებას არ ვაპირებ.
_ “ლელომ” შეიტანა სასამართლოში სარჩელი და რას გვეტყვით, რა მოლოდინები გაქვთ სასამართლო პროცესთან დაკავშირებით?
_ არავითარ მოლოდინებზე არ ვისაუბრებ. ვისაუბრებ მხოლოდ იმაზე, რომ ყოველთვის სჯობია სამართლებრივ ჭრილში წყდებოდეს საკითხები და მე ამას მოვუწოდებდი ყოველთვის ჩვენს ოპონენტებს, ნაცვლად პოპულისტური განცხადებებისა. აქედან გამომდინარე, სამართლებრივ ჩარჩოებში მოექცევა პროცესი, ჩვენ შესაბამისად ვიმოქმედებთ. გმადლობთ!
ჩვენ ვესაუბრეთ ჩოხატაურის მუნიციპალიტეტის მერს, დავით შარაშიძესაც.
_ პირველად მესმის. როგორც წესი და კანონია, შეჩერებულია საკითხი და მივყვებით შემდეგ პროცედურებს. სასამართლოში რატომ შეიტანეს სარჩელი, მაგას ვერ ვხვდები. რაში სჭირდება სასამართლო? საკითხი შეჩერებულია და რაც არის პროცედურები საჭირო, მიხედავენ მერიის შესაბამისი სამსახურები. სასამართლო რა შუაშია, ვერ ვხვდები, _ გვიპასუხა შარაშიძემ.
“გურია ნიუსმა” კითხვა დაუსვა მალხაზ ჩხიკვაძესაც.
_ ბატონო მალხაზ, პარლამენტში ფრაქცია “ქართული ოცნების” თავმჯდომარის , მამუკა მდინარაძის მიერ ნოდარ დუმბაძის სკვერის ნაწილის გასხვისების თაობაზე გაკეთებული განცხადების შემდეგ, რატომ შეიტანეთ სარჩელი სასამართლოში? მდინარაძის ნათქვამი “თემა დახურულია” არ ნიშნავს იმას, რომ საკრებულო თავის განკარგულებას გააუქმებს?
_ საქართველოში მოქმედი კანონმდებლობით, საკრებულოს გადაწყვეტილების გაუქმება შეიძლება ან თვითონ საკრებულოს დაგაწყვეტილებით, ან სასამართლოს მიერ, ასე რომ, კანონთან მიმართებაში მდინარაძის გამონათქვამს ფასი არ აქვს და არცაა საინტერესო. ის, რომ მისი გამონათქვამით საკრებულოს მიერ მიღებული გადაწყვეტილება არ უქმდება და ის ისევ ძალაში რჩება, იმდენად ელემენტარული რამაა, წესითა და რიგით, კარგად უნდა იცოდეს ღრმადპატივცემულმა ბატონმა, და თუ ვინმეს ჰგონია, რომ პარლამენტის წევრის გამონათქვამი კანონზე მაღლა დგას, ეს მისი კვალიფიკაციის პრობლემაა… ასე რომ, ჯერჯერობით საკრებულოს მიერ მიღებული გადაწყვეტილება არც შეჩერებულია და არც გაუქმებული.
28 სექტემბერს გაიმართა ჩოხატაურის საკრებულოს სხდომა, რომლის დღის წესრიგშიც კი არ ყოფილა აღნიშნული განკარგულების გაუქმება. ამავე დროს 28 სექტემბერს იწურებოდა საკრებულოს მიერ 29 აგვისტოს მიღებული გადაწყვეტილების სასამართლოში გასაჩივრების ვადა. ჩვენ დაველოდეთ საკრებულოს იმისთვის, რომ თვითონვე გაეუქმებია მიღებული გადაწყვვეტილება და ამით გამოესწორებია საკუთარი შეცდომა და რადგან არ გააუქმა, გავასაჩივრეთ სასამართლოში.
მდინარაძის იმედად მტერი იყოს, რა ვიცი საიდან დაუბერავს ქარი და როდის რა იდეა შეაწუხებს. არ შეუცვლიათ საკუთარი გადაწყვეტილებები თუ რა… არც ისაა მათგან მოულოდნელი, რომ სიტყვით ერთი თქვან და საქმით კი სხვას რამ გააკეთონ ან გააფუჭონ. კიდევ ერთხელ გავიმეორებ, რომ ამ გადაწყვეტილების გაუქმება ძალიან იოლად შეუძლია საკრებულოს, თუნდაც სასამართლო განხილვამდე მოიწვიონ რიგგარეშე სხდომა და გააუქმონ. საკრებულომ კი არა, პარლამენტში ოცნებამ 5 წუთში მოასწრო მათ მიერვე პირველი მოსმენით მიღებული „რუსული კანონის“ ჩაგდება.
მჯერა, რომ სასამართლოს წესით მაინც გაუქმდება ეს განკარგულება და აღარ გაიყიდება დუმბაძის სახელობის სკვერის ნაწილი, რადგან ეს განკარგულების მიღება მოხდა მოქმედი კანონმდებლობის დარღვევით და ამ სასამართლო სისტემაშიც კი არ მეგულება ისეთი მოსამართლე, რომელიც 2 მინიმალურ მოთხოვნას ვერ დააკმაყოფილებდეს: 1. შეეძლოს წაკითხულიდან შინაარსის გამოტანა და 2. იცოდეს100-ის ფარგლებში ანგარიში.
მოკლედ, ჩვენ ავირჩიეთ სამართლებრივი გზა და ის პროცედურები, რასაც ითვალისწინებს კანონმდებლობა და იმედია, რომ მიზანს მივაღწევთ”, _ გვითხრა მალხაზ ჩხიკვაძემ.
ინფორმაციისთვის, ჩოხატაურის საკრებულოს სხდომაზე 29 აგვისტოს წარადგინეს საკითხი ჩოხატაურში დუმბაძის ქუჩაზე მდებარე 290.00 კვ.მ. არასასოფლო-სამეურნეო დანიშნულების მიწის ნაკვეთის (ნ. დუმბაძის სახელობის პარკი; ს/კ – 28.01.21.718) ძირითადი (განუსხვისებელი) ქონების კატეგორიის სტატუსის დაკარგვისა და ჩოხატაურის მუნიციპალიტეტის ქონების საპრივატიზაციო ობიექტების 2023 წლის დამატებითი ნუსხისა და დამატებითი პრივატიზაციის გეგმის დამტკიცების შესახებ. საკითხის დაყენებას ბოიკოტი მოჰყვა “ნაციონალური მოძრაობის” მხრიდან.
გავრცელებული ცნობით, პარკის ტერიტორიის ნაწილი უნდა გაყიდულიყო აუქციონზე და იქ, საქართველოს ბანკის ფილიალის შენობა აშენებულიყო.
საკითხს ოპოზიციონერი პოლიტიკოსების და საზოგადოების ნაწილის მხრიდან პროტესტი მოჰყვა.
3 სექტემბერს, კვირას, როდესაც ჩოხატაურის საკვირაო ბაზარში თითქმის მთელი მოსახლეობა თავს იყრის, „ნაციონალური მოძრაობის“ წევრებიც, ჩოხატაურის და ოზურგეთის რეგიონული ფრთიდან შეიკრიბნენ და არიგებდნენ ფლაერებს, რომ ნოდარ დუმბაძის სკვერი საფრთხეშია და “გურიის ოლიგარქიული კლანი” (მაჟორიტარი დეპუტატი ვასილ ჩიგოგიძე, მერი დავით შარაშიძე და საკრებულოს თავმჯდომარე ირაკლი კუჭავა) ჩოხატაურს ჰყიდიან. მათ ჩიგოგიძე დაადანაშაულეს “პარკის ხარზე ჯიბეების გასქელებაში“.
ბაზარში „ნაციონალური მოძრაობის“ ოზურგეთისა და ჩოხატაურის ორგანიზაციის წევრების გამოჩენა დაპირისპირებაში გადაიზარდა. ოპოზიციურმა სპექტრმა ძალადობრივ ორგანიზებულ დახვედრაში ჩიგოგიძე დაადანაშაულა. მომხდარ დაპირისპირებასთან კავშირს “ქართული ოცნება” უარყოფს. პარტიის წარმომადგენლები ამბობენ, რომ ყველაფერი “ნაციონალური მოძრაობის” წევრების მიერ მოწყობილი პროვოკაციის გამო მოხდა და წინასწარ დაგეგმილი არ ყოფილა. ფაქტზე გამოძიება ჯგუფური ძალადობის მუხლით დაიწყო და 4 ადამიანი დააკავეს. თუმცა, ოზურგეთის რაიონულმა სასამართლომ ისინი გირაოთი გაათავისუფლა.
ჩოხატაურში განვითარებულ მოვლენებს პარლამენტის სხდომაზე მამუკა მდინარაძე გამოეხმაურა და განაცხადა, რომ სკვერის ნაწილის გაყიდვა და იქ რამის აშენება დაუშვებელია.
“სკვერში, ბაღში და ა.შ. შეიძლება აშენებული იქნას მხოლოდ საერთო სარგებლობის, საზოგადოებრივი და სახელმწიფო მნიშვნელობის შენობა. თემა ამით არის დახურული. ვერავინ იმ ადგილს ვერ გაყიდის. ცოტა გვიან გავიგეთ ჩვენ. დაუშვებელია რომ სკვერის ნაწილი გაიყიდოს. გავერკვიე გუშინ დეტალებში. ჩვენს მუნიციპალიტეტებს, საკრებულოებს, დღეიდან ყველას ვთხოვ კარგად დაიმახსოვრონ, ვინც არ უნდა იყოს და თქვენ როგორ გააპროტესტოთ ის ისწავლეთ, და როგორ უნდა მოიქცეს ყველა. სკვერის გაყიდვა იმისთვის რომ იქ რამე აშენდეს არის შეუძლებელი და ვერ გაიყიდება. ეს იქნება მაგალითი, რომ სკვერს ვერ მოაჭრი რაღაც ნაწილს და ვერ გაყიდი რომ იქ რაღაც აშენდეს”,_ განაცხადა მდინარაძემ.
ამ დროისთვის კი ნოდარ დუმბაძის სახელობის სკვერში სარეაბილიტაციო სამუშაოები მიმდინარეობს.
ავტორი
