იტალიის „სერია A“-ს მეექვსე ტურში „ნაპოლიმ“ საკუთარ მოედანზე „უდინეზე“- 4:1 დაამარცხა, ხვიჩა კვარაცხელიამ კი 19 მარტის შემდეგ პირველად გაიტანა.
ქართველმა ფეხბურთელმა გოლის გარდა, საგოლე პასიც გააკეთა, პენალტიც მოიპოვა, ორჯერ ბურთი ძელსაც გაარტყა. იტალიურმა მედიამ ის მატჩის საუკეთესო ფეხბურთელად დაასახელა.
Mediaset 7.5 ქულა – „ქართველი შეუჩერებელია. მან ორჯერ გაარტყა ბურთი ძელს და საუცხოო გოლი გაიტანა, სილვესტრის გვერდის ავლით. იპოვა ღიმილი და გოლი, რომელიც 19 მარტიდან აკლდა“.
Eurosport 7.5 ქულა – „უდინეზესთან“ მიუწვდომელია და მასთან თამაში შეუძლებელი იყო. გაიტანა (სეზონში პირველად), გააკეთა საგოლე პასი სიმეონეზე, ორჯერ ბურთი ძელს გაარტყა და გააგიჟა საწყალი პერესი. თამაში, რომელიც შეესაბამება მის რეპუტაციას“.
Calcionapoli1926 8 ქულა – „ორი ძელი მართლაც მეტისმეტი იყო. ფაქტობრივად განმათავისუფლებელი გოლი გაიტანა, ლამაზი გოლი, რომელიც არანაკლებ სანახაობრივ თამაშს მოჰყვა. ძალიან კარგად გამოიმუშავა პენალტი, რითაც ანგარიში გაიხსნა, შემდეგ საგოლე პასიც გააკეთა. მოკლედ, KVARA IS BACK!”
Tuttonapoli 8.5 ქულა – „აჯობა ებოსელეს, რომელმაც საჯარიმოში წააქცია. ორჯერ ძელს ურტყამს ბურთს, მეორე შემთხვევაში ფენომენალური მოქმედებით. შემდეგ აჩერებს დროს გოლით, რომელიც ღირს არა ბილეთის, არამედ მთელი სეზონის აბონემენტის ფასი“.
Tuttomercatoweb 8 ქულა – „აი ისევ: მთელი თავისი არაპროგნოზირებადობით და ყველა იმ მოქმედებით, რამაც შარშან იტალიასა და ევროპაში მეტოქე გუნდებიც დაცვა გააგიჟა. დიდი იმპულსის თამაში, წარმოუდგენელი ძელის შემდეგ არ ნებდება და დაჯილდოვდა გოლით და საგოლე პასით“.
Calciomercato.it 8.5 ქულა – „მოიპოვა პენალტი, ორჯერ ძელს გაარტყა, მეტოქეებს უმარტივესად ატყუებს. ნამდვილი სიამოვნებაა მისი თამაშის ყურება. ბიოლს ართმევს ბურთს, მიფრინავს კარისკენ, სილვესტრის ატყუებს და გოლს იტანს. ყველაფერი მშვენიერია. საკითხავია, რატომ არ დავამატოთ საგოლე პასი და სიმეონეზე ეს პასიც მოდის“.
ხვიჩა კვარაცხელიამ „უდინეზესთან“ მატჩის შემდეგ ტელეკომპანია „DAZN“-თან კომენტარი გააკეთა:
„გოლი მაკლდა, მაგრამ ფეხბურთში ესეც ხდება, არის მსგავსი მომენტები, ამ დროს, როცა თვეებია გოლი არ გაგიტანია, ნორმალურია ნერვიულობა. ძალიან მიხარია, რომ გუნდს გამარჯვებაში დავეხმარე, ასე უნდა გავაგრძელოთ.
რა შეიცვალა ბოლო დღეებში? გამარჯვებას ვიმსახურებდით. „ბოლონიასთან” მატჩის შემდეგ ერთმანეთს ვესაუბრეთ და მნიშვნელოვანი იყო ლამაზი თამაშით მოგება, მწვრთნელთან ერთად ვთქვით, რომ სანახაობრივად უნდა გვეთამაშა.
არ აქვს მნიშვნელობა გოლს ვინ გაიტანს, მთავარია გუნდში წვლილი ყველამ შევიტანოთ. ეს ნამდვილი „ნაპოლია“? ალბათ დავბრუნდით, შესანიშნავი ფეხბურთელები გვყავს და უნდა ვეცადოთ მაქსიმუმი გავაკეთოთ. ფორცა „ნაპოლი“!“ – განაცხადა კვარაცხელიამ.
„ნაპოლის“ მთავარმა მწვრთნელმა რუდი გარსიამ კი შემდეგი განცხადება გააკეთა:
„კვარამ გოლი გაიტანა და გონებით გაცილებით მსუბუქი იქნება. დიდხანს ვესაუბრე და ვურჩიე, რომ ამაზე არ ეფიქრა. უნიკალური ფეხბურთელია, მენტალურად ძლიერი, ცოტაა ისეთი მოთამაშე, რომელიც მეტოქეს ატყუებს და როცა მოედანზე ბედნიერია, ყველაფერი ისე მშვიდად მოდის, როგორც დღეს საღამოს.
დიდი კვარაც დაბრუნდა. საგოლე პასი გააკეთა, პენალტი მოიპოვა, ბურთი ორჯერ გაარტყა ძელს, მერე კი ყოჩაღი იყო, ყველაფერი გააკეთა, რადგან ამ ორი ძელის შემდეგ არ დანებდა და ლამაზი გოლი გაიტანა, რომელიც ჩემი აზრით დაეხმარება მომდევნო მატჩებში უფრო მეტად მშვიდად იყოს, ვინაიდან აღარ იფიქრებს გოლზე, რომელსაც მარტის შემდეგ ელოდა. როგორც მას ვუთხარი, მხოლოდ თამაშისგან სიამოვნების მიღებაზე უნდა ეფიქრა, რადგან ის არის სანახაობრივი ფეხბურთელი, რომელსაც უყვარს მეტოქის მოტყუება, უყვარს კარგად თამაში და საკმარისი იყო მხოლოდ ამაზე მოეხდინა კონცენტრაცია და გოლს გაიტანდა, როგორც დღეს საღამოს გააკეთა“, – განაცხადა რუდი გარსიამ.
გუშინ, ცნობილმა იტალიელმა ჟურნალისტმა ფაბრიციო რომანომ ვიქტორ ოსიმენის სიტუაციაზე ისაუბრა:
„რა თქმა უნდა, ფეხბურთელი იმედგაცრუებულია. ზოგი ამბობს, რომ ის აღშფოთებულია ამ სიტუაციით. კონტრაქტი 2025 წელს ეწურება, ბევრი აგვისტოში ამბობდა, რომ განახლებაზე შეთანხმებას მიაღწიეს, მაგრამ ასე აბსოლუტურად არ არის. შეთავაზება მაგიდაზეა, მაგრამ საბოლოო შეთანხმება ჯერ კიდევ არ არის მიღწეული. ცხადია, თუ სიტუაცია გაუარესდება, ეს ნიშნავს, რომ „ნაპოლის“ მისი გაყიდვა მომდევნო ზაფხულს მოუწევს“, – თქვა რომანომ.
„ნაპოლი“ და მისი პრეზიდენტი, აურელიო დე ლაურენტისი კი იტალიის პროკურატურის ყურადღების ცენტრში მოექცა.
ადგილობრივი მედიის მტკიცებით, დე ლაურენტისის წინააღმდეგ რომის პროკურატურამ საქმის გამოძიება დაიწყო. უფრო კონკრეტულად, ვიქტორ ოსიმენის ტრანსფერის.
2020 წელს „ნაპოლიმ“ ოსიმენი ფრანგული „ლილიდან“ 71 მილიონ ევროდ შეიძინა, საიდანაც იტალიელებმა მხოლოდ 50 მილიონი გადაიხადეს. დანარჩენ 21 მილიონ ევროდ კი, ნეაპოლელთა იმ დროისთვის მესამე მეკარე, ორესტის კარნეზისი და ახალგაზრდა ფეხბურთელები, ჩირო პალმიერი, ლუიჯი ლიგუორი და კლაუდიო მანცი შეფასდნენ, რომელთაც პროფესიონალურ დონეზე არც მანამდე და არც მას მერე არ უთამაშიათ.
არსებობს ეჭვი, რომ დე ლაურენტისმა ფინანსური კაპიტალი ხელოვნურად გაზარდა და საქმე ცრუ აღრიცხვასთან გვაქვს.
უცნობია, სასჯელი, რომელიც ბრალის დამტკიცების შემთხვევაში აურელიო დე ლაურენტისს და „ნაპოლის“ ელოდებათ. თუმცა, არაა გამორიცხული კლუბს ქულები დააკლონ.
ავტორი
