„ნაპოლი“ – „იუვენტუსის“ მატჩის (2:1) შემდეგ ნეაპოლური კლუბის მთავარმა მწვრთნელმა ფრანჩესკო კალცონამ ისაუბრა.
„კვარაცხელია და ოსიმენი უძლიერესი ფეხბურთელები არიან, ამ გუნდისთვის ფუნდამენტური. მათ სირთულეები ჰქონდათ, მაგრამ ახლა თავის დონეს თითქმის დაუბრუნდნენ. მინდა სხვებზეც ვისაუბრო, შეცვლაზე შესული ფეხბურთელები ძალიან გვეხმარებიან, ეს კარგის ნიშანია.
10 დღეში სასწაულები არ ხდება, დრო საჭიროა, რაც არ გვაქვს. ბიჭებს ვთხოვ, რომ სწრაფად გაითავისონ ყველაფერი, რასაც აკეთებენ. თუმცა, ბუნებით ისეთი ადამიანი ვარ, რომ ბოლომდე კმაყოფილი არასდროს ვარ.
კარგის ნიშანია, რომ ეს თამაში მოვიგეთ, ეს ნიშნავს, რომ ბიჭებს სურთ კარგ შედეგს მიაღწიონ, ბედნიერი ვარ გუნდის ნახვით, რომელსაც გაუმჯობესება სურს. თუ იმარჯვებ, უფრო მეტი სურვილი გაქვს, რომ კიდევ გაიმარჯვო. გამარჯვებით ბედნიერი ვარ, მაგრამ ჯერ კიდევ ბევრი გვაქვს გასაკეთებელი“, – განაცხადა კალცონამ.
ხვიჩა კვარაცხელიას მიმდინარე სეზონში ყველა ტურნირზე 35 მატჩში 9 გოლი აქვს გატანილი, 5-ჯერ საგოლე პასი გააკეთა და 2-ჯერ თერთმეტმეტრიანი მოიპოვა.
„ნაპოლიმ“ „43 ქულა დააგროვა და მეშვიდე ადგილზე გადავიდა. მომდევნო ტურში 8 მარტს, „ტორინოს“ უმასპინძლებს. „იუვენტუსი“ 57 ქულით მეორე ადგილს ინარჩუნებს, მაგრამ „მილანს“ მხოლოდ ქულით უსწრებს.
იტალიურმა მედიამ ქართველი ფეხბურთელის თამაში შემდეგნაირად შეაფასა:
Eurosport 7 ქულა: „მასზე ჯარიმდებოდნენ, ყოველთვის კარს უმიზნებდა და თამაშს ცვლიდა. პირადი შეტევით დარტყმა მოახერხა, მაგრამ შჩესნიმ ადვილად აჯობა. შემდეგ ანგარიში გახსნა ჰაერიდან ერთი შეხებით. მეორე ტაიმში ნაკლებად შესამჩნევი იყო, მაგრამ ვეას გაკონტროლებითაც იყო დაკავებული“.
Sportmediaset 7 ქულა: „პირველივე წუთებიდან დააგროვა ჯარიმები და ყვითელი ბარათები მეტოქეებისთვის. უმიზნებს მეტოქეს და როგორც ყოველთვის ქმნის მომენტებს, ამჯერადაც მოახერხა გოლის გატანა, ზედიზედ მეორედ. როგორ? ჰაერიდან ერთი შეხებით აჯობა შჩესნის რიკოშეტის წყალობითაც“.
Il Giornale 6.5 ქულა: „ბრწყინვალე გოლი გაიტანა მარჯვენა ფეხით, მიწაზე დაუშვებლად და რიკოშეტით, რამაც შჩესნის გამოსავალი არ დაუტოვა. შარშანდელი სეზონივით ბაგირზე ვერ დადის, მაგრამ დღეს მოედანზე ერთ-ერთი საუკეთესო იყო“.
Calciomercato 7.5 ქულა: „როგორც ყოველთვის არაპროგნოზირებადია და მეტოქეებისთვის ყოველთვის საფრთხეს წარმოადგენს. ორი ყვითელი ბარათი რამდენიმე წუთში გამოიმუშავა, შემდეგ ლამაზი გოლით ანგარიში გახსნა“.
Tuttomercatoweb 7 ქულა: „როგორც ყოველთვის მასზე ჯარიმდებიან და 2-3 მეტოქეც გააფრთხილებინა. სცენაზე ავიდა ტაიმის ბოლოს, როდესაც ჰაერიდან გოლი გაიტანა, რომლის აღნიშვნა თითქოს ნიშნავდა: „მე მინდა აქ დარჩენა“.
საინტერესოა, რომ იტალიურმა მედიამ გოლის ზეიმის დროს მის ჟესტზეც გაამახვილა ყურადღება: „მე აქ ვარ!“ – თითქოს, კვარამ ჟესტით სწორედ ეს აჩვენა გულშემატკივრებს.
აღსანიშნავია, რომ მსგავს სტილში გოლებს კრიშტიანუ რონალდუ აღნიშნავდა, რომელიც როგორც ცნობილია, კვარას ბავშვობის კუმირია.
გუშინ, ტელეკომპანია „Rai“-ს ჟურნალისტმა ჩირო ვენერატომ ხვიჩა კვარაცხელიასა და მის კონტრაქტზე ისაუბრა.
„კვარასთან კონტრაქტის განახლების საკითხი ჯერ კიდევ ჰაერშია. ფეხბურთელს სურს ხელფასის მომატება, სიტუაცია წინ სწრაფად არ მიიწევს, მაგრამ ის არ დატოვებს „ნაპოლის“. დე ლაურენტისი მას მეგა ხელფასს შესთავაზებს ტრანსფერის 2025 წლის ზაფხულში გადადების სანაცვლოდ. როგორც ოსიმენის შემთხვევაში მოხდა, მისთვისაც შეიძლება გამოსასყიდი ფასი კონტრაქტში ჩაიდოს. კვარაცხელიას ისეთი დიდი კლუბები აკვირდებიან, როგორებიც „ბარსელონა“, „ჩელსი“, „ლივერპული“ და „პარი სენ-ჟერმენია“, – თქვა ვენერატომ.
ავტორი
