ამერიკის შეერთებული შტატების სახელმწიფო მდივანი, რექს ტილერსონი აცხადებს, რომ ის და პრეზიდენტი რუსეთისთვის სანქციების დაწესებით ბედნიერები არ არიან, თუმცა, ვიცე-პრეზიდენტმა, მაიკ პენსმა საქართველოში ვიზიტისას სანქციების დაწესების შესახებ განსხვავებულად ისაუბრა. ამის შესახებ ინფორმაციას THE NEWDELHITIMES ავრცელებს.
ამერიკის შეერთებული შტატების სახელმწიფო მდივანმა, რექს ტილერსონმა სამშაბათს გამართულ ყოველდღიურ ბრიფინგზე, ამერიკის შეერთებული შტატების საგარეო პოლიტიკის შესახებ, რომელიც ჩრდილოეთ კორეას, ვენესუელას, ჩინეთს, ახლო აღმოსავლეთს, რუსეთსა და უკრაინას ეხება, საკუთარი შეხედულებებზე ისაუბრა.
რუსეთის პრეზიდენტის მიერ მოსკოვში ამერიკელი დიპლომატების შემცირების შესახებ დასმულ კითხვაზე, ტილერსონმა უპასუხა, რომ რუსეთის საგარეო საქმეთა მინისტრი, სერგეი ლავროვი არაერთხელ გააფრთხილა ორ ქვეყანას შორის არსებული ცუდი ურთიერთობის შესახებ, მაგრამ მათ თავიანთი ქმედებებით კავშირის გაუარესება კიდევ უფრო შეძლეს.
მისივე თქმით, რუსეთისთვის დამატებითი სანქციების დაწესება სასარგებლო არაა.
„კონგრესის ქმედებებმა დააწესოს სანქციები არც პრეზიდენტი და არც მე არ გაგვაბედნიერა. არ ვფიქრობთ, რომ ეს ჩვენს ძალისხმევას დაეხმარება, მაგრამ მათ გადაწყვეტილება მიიღეს“,_ამბობს ის.
ტილერსონის თქმით, პრეზიდენტი ტრამპი კონგრესმენთა გადაწყვეტილებას დაეთანხმა და კანონპროექტს ხელს მოაწერს.
„ჩვენ უბრალოდ ვიმუშავებთ მასზე“,_დასძენს ის.
მაუწყებლის ინფორმაციით, ამერიკის შეერთებული შტატების ვიცე-პრეზიდენტმა, მაიკ პენსმა საბჭოთა კავშირის ყოფილ რესპუბლიკაში, საქართველოში ვიზიტისას სანქციების შესახებ განსხვავებულად ისაუბრა და რუსეთის მეზობელი ქვეყნების დარწმუნებას ცდილობდა, რომლებსაც მოსკოვის ექსპანსიონისტული პოლიტიკა აშფოთებთ.
როგორც პენსმა თქვა, პრეზიდენტი ტრამპი სანქციებს ხელს მალე მოაწერს და აღმოსავლეთ ევროპის, უკრაინის, ბალტიისპირეთის ქვეყნების და საქართველოს დამოუკიდებლობისა და სუვერენიტეტის დაცვა ამერიკის მოვალეობაა.
„ამერიკის შეერთებულ შტატებს რუსეთთან საერთო ინტერესებზე დამყარებული ურთიერთობა ურჩევნია. პრეზიდენტმა და კონგრესმა შეთანხმებული შეტყობინება გაუგზავნეს რუსეთს, რომ ურთიერთობის გასაუმჯობესებლად და სანქციების მოსახსნელად რუსეთმა ის ქმედებები უნდა შეცვალოს, რისთვისაც სანქციები დაუწესდა,_განაცხად პენსმა.
მაუწყებლის ინფორმაციით, სანქციებზე ხელმოწერის თარიღი ჯერ უცნობია.
როგორც THE NEWDELHITIMES იუწყება, თეთრი სახლის პრეს მდივნი, სარა ჰაკაბი სანდერსი ამბობს, რომ ტრამპი სანქციებს ხელს მოაწერს, მაგრამ როდის, ამის თქმა პრეს მდივანმა ვერ შეძლო.
მაუწყებლის ცნობით, საგარეო პოლიტიკის ექსპერტები პრეზიდენტს მოუწოდებენ სანქციებს ხელი რაც შეიძლება მალე მოაწეროს, რადგან რუსეთის მიმართ სიმკაცრე უკრაინას, საქართველოს და სხვა ქვეყნებს, რომლებსაც რუსეთის აგრესიის ეშინიათ სარგებელს მოუტანს.
„მჯერა რომ ნაბიჯები, რასაც კონგრესი ახლა დგამს უკრაინაში ჩვენი პოლიტიკისთვის სასარგებლოა. მოსკოვს მოუწევს დონბასში მის პოლიტიკას გადახედოს“,_ამბობს ყოფილი ელჩი და ატლანტიკური საბჭოს დირექტორი, ჯონ ჰერბსტი.
მისივე თქმით, თუ მოსკოვი თავის პოლიტიკას დონბასში შეცვლის, მაშინ ეს გრძელვადიან პერსპექტივაში საქართველოში მის პოლიტიკაზეც იქონიებს გავლენას.
მაუწყებლის ცნობით, პრეზიდენტს კანონპროექტზე ხელის მოსაწერად ვადა 7 აგვისტომდე აქვს. თუ ის ხელს არ მოაწერს , მაშინ კონგრესს ვეტოს დაძლევა მოუწევს.
