ორი დღის წინ, საქართველოს ნაკრების ყოფილმა მთავარმა მწვრთნელმა ვლადიმირ ვაისმა ხვიჩა კვარაცხელიას შესახებ ისაუბრა. ბრატისლავის „სლოვანის“ ამჟამინდელი თავკაცი ცნობილი იტალიელი ჟურნალისტი ჯანლუკა დი მარციოს ვებგვერდს ესაუბრა.
„საქართველოს ეროვნულ ნაკრებში დებიუტი ჩემი ხელმძღვანელობით ჰქონდა 18 წლის ასაკში, როცა ყაზანის „რუბინში“ თამაშობდა. ლობოტკას მსგავსად მასაც გასაოცარი კარიერა აქვს. როდესაც მკითხეს, მზად იყო თუ არა „ნაპოლისა“ და „სერია A“-სთვის, ვუპასუხე, რომ თუ მიწაზე დარჩებოდა, ვარსკვლავი გახდებოდა. ვამაყობ იმით, რაც მან მოახერხა, „სერია A“-ს სეზონის საუკეთესო ფეხბურთელი გახდა. მეორე სეზონი კი კვარასთვის იტალიაში კურთხევის წელი იქნება. თუმცა, ცხადია, რომ გაცილებით რთული იქნება, რადგან მეტოქე გუნდებმა შეისწავლეს და იციან, მის წინააღმდეგ თავი როგორ დაიცვან. გასულ სეზონში ის იტალიურ ფეხბურთთან ადაპტაციას გადიოდა, რომელიც განსხვავდება ქართული და რუსული ფეხბურთისგან. ერთ ან ორი მეტოქის წინააღმდეგ ის წარმოუდგენელია, ალბათ, მხოლოდ დაცვით ფაზაში აქვს მოსამატებელი.
კვარასთან უიღბლო შემთხვევაც მაკავშირებს. ჩრდილოეთ მაკედონიასთან ფლეი ოფის ფინალამდე ორი დღით ადრე კოვიდი აღმოაჩნდა და ასე დავკარგეთ ოცნება. ეს იყო ტრაგედია ქართული ფეხბურთისთვის და ჩემთვისაც, რადგან დარწმუნებული ვარ, რომ მასთან ერთად ევრო 2020-ზე გავიდოდით. შემდეგ დავმარცხდით, ეს იყო ჩემს ცხოვრებაში ძალიან ცუდი დღე, ნამდვილად ერთ ნაბიჯში ვიყავით ევროპის ჩემპიონატთან“, – განაცხადა ვლადიმირ ვაისმა.
ხვიჩა კვარაცხელიას თემას გამოეხმაურა ცნობილი იტალიური გამოცემა „La Gazzeta dello Sport“.
„გარსიას უნდა, რომ ხვიჩას მარჯვენა ფეხი თამაშისას უფრო და უფრო დაიტვირთოს. ჩააწვდის ორივე მხრიდან კუთხურსა და სტანდარტულებს. მოგვიანებით კი ცნობილი გახდება, თუ ვინ შეასრულებს პენალტებს. შესაძლოა ეს საპასუხისმგებლო ვალდებულებაც გუნდის ქართველმა ლიდერმა შეითავსოს. მოგეხსენებათ, გასულ წელს ამ საკითხში იყო პატარ-პატარა დაბრკოლებები, თუმცა გარსია და მისი სამწვრთნელო შემადგენლობა ამ პრობლემის აღმოფხვრისთვის ბევრს მუშაობს“,– დაწერა იტალიურმა გამოცემამ.
ზაფხულის სატრანსფერო ფანჯრის პერიოდი ნელნელა იწურება, მიუნხენის ბაიერნმა კი ჯერჯერობით, მეკარის პრობლემა ვერ მოაგვარა. როგორც უკვე არაერთხელ ვთქვით, მანუელ ნოიერი დიდხნიანი პაუზის შემდეგ დაბრუნდა, მაგრამ სეზონის სტარტს გამოტოვებს და ჯერჯერობით უცნობია, საერთოდ რა ფორმაში იქნება.
გერმანული გამოცემა „SPOX“ „ბაიერნს“ გიორგი მამარდაშვილის შეძენას ურჩევს და აღნიშნავს, რომ სავარაუდო კანდიდატთა სიაში ის ყველაზე საიმედოა.
„ყველაზე საიმედო კანდიდატი ყველა მეკარეს შორის არის 22 წლის გიორგი მამარდაშვილი. მან „ვალენსიაში“ გასულ სეზონში გაიბრწყინა და ტოპ ტალანტად ითვლება. სამომავლოდ ის შეიძლება, „ბაიერნის“ პირველი მეკარე გახდეს. მაგრამ თუ ნოიერი მალე ფორმაში შევა, მაშინ ქართველ ახალგაზრდას ნუბელის მსგავსად საფრთხეს შეუქმნის, მამარდაშვილი იძულებული იქნება მიუნხენში რთული თვეებისთვის მოემზადოს.
საკითხავია, აწყობს თუ არა ეს მამარდაშვილს. მას შეუძლია უბრალოდ გააგრძელოს განვითარება „ვალენსიაში“ და „ბაიერნში“ ნოიერის წასვლის შემდეგ გადასვლა. ნოიერს კონტრაქტი მიუნხენურ კლუბში 1 წლის შემდეგ იწურება. თუ „ბაიერნი“ მომდევნო წლებისთვის გამოსავალს მოძებნის და ნოიერიც ფორმაში ვერ იქნება, მაშინ ის უბრალოდ უნდა გაუშვან – ამ დროისთვის, მეკარის დილემა „ბაიერნს“ უკვე მოგვარებული უნდა ჰქონდეს“, – დაწერა გამოცემამ.
გუშინ, კიდევ ერთმა პოპულარულმა გერმანულმა გამოცემამ „ბილდი“ დაწერა, რომ მიუნხენის „ბაიერნი“ ახალი მეკარის ძებნის პროცესში ესპანელ დავიდ დე ხეაზე გადაერთო.
„ბილდის“ მტკიცებით, ნოიერი ჯერ კიდევ ვერ ვარჯიშობს სრული დატვირთვით. 34 წლის შვეიცარიელ იან ზომერს არ უნდა, რომ „ბაიერნის“ მეორე მეკარე იყოს და მისი მიზანია, რომ ეს გუნდი რაც შეიძლება მალე დატოვოს. ოღონდ, მიუნხენელები მას ჯერ არ ყიდიან მილანის „ინტერში“, რადგან თუ ახალი მეკარე არ მიიყვანეს, ნოიერის გარდა მხოლოდ ერთი პროფესიონალი კარის დარაჯი ჰყავთ – 34 წლის სვენ ულრაიხი.
დე ხეა „მანჩესტერ იუნაიტედში“ ანდრე ონანამ შეცვალა. მანჩესტერელები ესპანელს კონტრაქტს კი სთავაზობდნენ, მაგრამ მისთვის მიუღებელი პირობებით. შესაბამისად, დე ხეამ, რომელსაც „იუნაიტედის“ ფორმით 545 მატჩი აქვს ჩატარებული, შეთავაზებაზე უარი თქვა და კლუბი დატოვა. მეკარე, რომელსაც ესპანეთის ნაკრებში 45 მატჩი აქვს ჩატარებული, ახლა უკლუბოდაა.
ავტორი
