ქართველი მსახიობი მერაბ ნინიძე, რომელიც დღეს მსოფლიოს სხვადასხვა ქვეყნებში იღებენ ფილმში, ზაფხულის არდადეგებს ოზურგეთის მუნიციპალიტეტის სოფელ ნაგომარში ატარებდა.
ნაგომარში ორ ოჯახში უწევდა ცხოვრება, რადგან დედ-მამა გურიიდან იყვნენ წარმოშობით. როგორც იქ გვითხრეს, დედამისის მშობლების სახლში უფრო დიდ დროს ატარებდა და სწორედ აქ გეგმავს სახლის აშენებას მსახიობი.
უნიკალურ ეზოში ახლა მხოლოდ ძველი სახლის კიბეებია დარჩენილი.
“გურია ნიუსს” სოფელ ნაგომარში მცხოვრებ ქალბატონს მადონა ლომთაძეს ესაუბრა:
“მერაბ ნინიძე გურიაში იზრდებოდა. ყოველ ზაფხულს ჩამოდიოდა და ისვენებდა. ძალიან კარგი ბაბუა ყავდა _ ბატონი სერგო ახალაძე, ხელოვანი კაცი _ ერთხანს ფოთში თეატრის დირექტორი იყო, ნაგომარში კი მოგვიანებით გახსნა თეატრის წრე
.მერაბს დღესაც აქვს ნაგომრის დიდი სიყვარული. სახლს, სადაც მერები ჩამოდიოდა, ძალიან ლამაზი ეზო აქვს. აქ თავს იყრიდნენ მთელი სანათესაო, ნაცნობობა, სამეზობლო.
მერაბს ნათქვამი აქვს, რომ ჩემს სიბერეს ნაგომარში გავატარებო. ცოტა გაგვიკვირდა, მაგრამ ვიცით, რომ ეს გულწრფელად თქვა.
ბავშვობიდან ნიჭიერი ბავშვი იყო _ სპექტაკლებს დგამდა, შეიკრიბებოდნენ, კოცონს ანთებდნენ და ძალიან კარგი საღამოებს ატარებდნენ ბავშვები. ეზოში არის აკაციის ხე, დიდი ტოტებით _ მერაბი ამ ხეზე ადიოდა, მუსიკალურ ინსტრუმენტებს აიტანდა და უკრავდა.
ახლა მარტო ვცხოვრობ, მაგრამ იმ პერიოდს რომ ვიხსენებ, მაშინდელი სიყვარული და სითბო შერჩენილი აქვს გულს. მერაბი, როგორც შვილი, ისე მიყვარს.
ხშირად ჩამოდის, შვილებიც ჩამოყავს. ბიჭი საზღვარგარეთ ყავს, მაგრამ ქართული კარგად იცის _ ბებიამისმა მანანამ ასწავლა. სულით გურულია ეს ბავშვი, ისეთი ხასიათები აქვს”, _ თქვა ჩვენთან საუბრის დროს მადონა ლომთაძემ.
მერაბ ნინიძე 1965 წლის 3 ნოემბერს დაიბადა თბილისში. 1986 წელს დაამთავრა შოთა რუსთაველის სახელობის თეატრალური ინსტიტუტის სამსახიობო ფაკულტეტი, რის შემდეგაც, 1992 წლამდე მოღვაწეობდა შოთა რუსთაველის სახელობის აკადემიურ თეატრში.
მერაბ ნინიძის დებიუტი კინოში შედგა 1984 წელს, თენგიზ აბულაძის ფილმში „მონანიება”, რომელიც მოგვიანებით კანის კინოფესტივალის პრიზიორი გახდა. მერაბ ნინიძეს საქართველოში 20-ზე მეტ ფილმში აქვს როლები შესრულებული. 2001 წელს ითამაშა კაროლინა ლინკის ფილმში „არსად აფრიკაში”, რომელმაც მოიპოვა ოსკარის პრემია საუკეთესო უცხოენოვანი ფილმისთვის.
1995 წლიდან ცხოვრობს და მოღვაწეობს ვენაში, ავსტრიაში.
