თვითმმართველობის არჩევნებიდან სამი თვე გავიდა. დასრულდა თუ არა ოზურგეთის მუნიციპალიტეტის მერიაში მობილობის პროცესი, რატომ არის მერიის რამდენიმე სამსახური ხელმძღვანელი პირების გარეშე, რაზეც კონკურსის გამოცხადება დაანონსდა, რატომ არ მოხდა აქამდე ა(ა)იპ რეორგანიზაცია და როდის დაინიშნებიან მერის წარმომადგენელები ?_ აღნიშნული კითხვებით წერილობით, ოზურგეთის მერიის იურიდიული სამსახურის უფროსს ლაშა თავაძეს მივმართეთ. თავაძის თქმით, ოზურგეთის მუნიციპალიტეტის მერიაში „საჯარო სამსახურის შესახებ“ საქართველოს კანონის 52-ე მუხლით გათვალისწინებული მობილობის პროცესი დასრულებულია.
_ ბატონო ლაშა, როგორც ვიცით, რამდენიმე სამსახური უფროსის გარეშეა, რატომ არ დანიშნულა აქამდე ხელმძღვანელი პირები? რა არის ამის მიზეზი? გამოცხადდა თუ არა კონკურსი აღნიშნულ სამსახურებში ხელმძღვანელ პირებზე?
_ როგორც მოგეხსენებათ, ოზურგეთის მუნიციპალიტეტის მერიაში მობილობის პროცესის დასრულების შედეგად წარმოიშვა ისეთი ვაკანტური თანამდებობები (სამსახურის უფროსების), რომლებზეც ვერ გახორციელდა მობილობის პროცესი, გამომდინარე იქედან, რომ აღნიშნული სამსახურები დამტკიცებული დებულებებით განსაზღვრული უფლება-მოვალეობებისა და ფუნქციების შესაბამისად, არსებითად განსხვავდება 2017 წელს გაუქმებულ ქალაქ ოზურგეთის მუნიციპალიტეტში და ოზურგეთის მუნიციპალიტეტში არსებული სამსახურების ფუნქციებისგან. ვაკანსიების წარმოშობის შედეგად, საჯარო სამსახურის ბიუროსთან კოორდინაციით შევათანხმეთ საჯარო მოხელეთა დამატებითი საკვალიფიკაციო მოთხოვნები. მერიის მიერ ვაკანსიების შესახებ ინფორმაცია ატვირთულია საჯარო სამსახურის მიერ ადმინისტრირებულ ვებ-გვერდზე. ამ დროსთვის ველოდებით საჯარო სამსახურის ბიუროდან კონკურსის გამოცხადების შესახებ შეთანხმებას, რაც საქართველოს მთავრობის 2017 წლის 21 აპრილის #204 -ე დადგენილების მე-6 მუხლის თანახმად, ბიუროს ვალდებულებას წარმოადგენს.
_ დასრულდა თუ არა ა(ა)იპ-ების რეორგანიზაცია და თუ არ დასრულდა, განმარტეთ სამართლებრივად, რა არის ამის მიზეზი? როდის ინიშნებიან ა(ა)იპ-ების ხელმძღვანელები? არიან თუ არა გათავისუფლებული დირექტორები. როგორც საზოგადოება ამბობს, ეს პროცესი ხელოვნურად ჭიანურდება მმართველი გუნდის მიერ, ეთანხმებით თუ არა ამ მოსაზრებას?
_ ოზურგეთის მუნიციპალიტეტის მერიამ, საკრებულოს თანხმობის საფუძველზე, დაიწყო არასამეწარმეო (არაკომერციული) იურიდიული პირების რეორგანიზაციის პროცესი შერწყმა-გაერთიანების მიმართულებით. რეორგანიზაციის პროცესის დაწყების თაობაზე მიღებული გადაწყვეტილებები დარეგისტრირდა საჯარო რეესტრის ეროვნულ სააგენტოში. რეგისტრაციის შემდეგ რეორგანიზაციის პროცესში მყოფ იურიდიულ პირებს, „საქართველოს სამოქალაქო კოდექსის“ 38-ე მუხლის და „მეწარმეთა შესახებ“ საქართველოს კანონის მე-14 მუხლის მე-3 პუნქტის და მე-144 მუხლის მე-6 პუნქტის შესაბამისად, ამოწმებს ფინანსთა სამინისტროს შემოსავლების სამსახური. კერძოდ, მითითებული კანონების თანახმად, საჯარო რეესტრის ეროვნული სააგენტო ელექტრონულ ინფორმაციას უგზავნის საქართველოს ფინანსთა სამინისტროს მმართველობის სფეროში შემავალ საჯარო სამართლის იურიდიულ პირს _ შემოსავლების სამსახურს, რომელიც შეტყობინების მიღებიდან 10 სამუშაო დღის ვადაში უზრუნველყოფს მარეგისტრირებელი ორგანოსათვის სუბიექტის საგადასახადო ვალდებულების არსებობის რისკის თაობაზე ინფორმაციის მიწოდებას.
ხოლო, რეორგანიზაციის პროცესის დასრულება ხორციელდება საჯარო რეესტრის ეროვნული სააგენტოს მიერ იურიდიული პირის მიმართ წარმოშობილი საგადასახადო ვალდებულების არსებობის ან/და არარსებობის თაობაზე შემოსავლების სამსახურის მიერ მიწოდებული ინფორმაციის შედეგად და ხელმძღვანელობაზე უფლებამოსილი პირის წარდგენით.
გამომდინარე აქედან, მერია მოკლებულია სამართლებრივ საფუძვლებს აღნიშნული პროცესების დასრულებამდე მიიღოს გადაწყვეტილება გაერთიანების შედეგად წარმოქმნილი ა(ა)იპ-ების ხელმძღვანელების დანიშვნასთან დაკავშირებით.
დღეის მდგომარეობით, დანიშნულია მხოლოდ გაერთიანების შედეგად შექმნილი ა(ა)იპ „ოზურგეთის მუნიციპალიტეტის მომსახურების ცენტრის“ და ა(ა)იპ „ოზურგეთის მუნიციპალიტეტის სამუზეუმო გაერთიანების“ დირექტორები.
რაც შეეხება, დირექტორების გათავისუფლებას, ორგანიზაციული ცვლილებების შედეგად, დირექტორის თანამდებობიდან გათავისუფლებული არიან: ა(ა)იპ „ქალაქ ოზურგეთის მუნიციპალიტეტის გაერთიანებული სპორტის განვითარების ცენტრის“, ა(ა)იპ „ოზურგეთის მუნიციპალიტეტის მომსახურების ცენტრის“, ა(ა)იპ „ქალაქ ოზურგეთის მუნიციპალიტეტის სკოლამდელი სააღმზრდელო-საგანმანათლებლო ცენტრის“, ა(ა)იპ „ოზურგეთის მუნიციპალიტეტის სკოლამდელი აღზრდის ცენტრის“, ა(ა)იპ „ქალაქ ოზურგეთის მუნიციპალიტეტის სერვისცენტრის“ და ა(ა)იპ „ოზურგეთის მუნიციპალიტეტის სამუზეუმო გაერთიანების“ დირექტორები.
_ როდის ინიშნებიან სოფლების წარმომადგენლები? გამოცხადდა თუ არა კონკურსი? რატომ გაიწელა დროში აღნიშნული პროცესი, ხომ არ შეიძლება ვივარაუდოთ, რომ ამასაც ხელისუფლება გამიზნულად აჭიანურებს? დაასახელეთ კონკრეტული თარიღი, როდის დაიწყება სოფლებში წარმომადგენლის დანიშვნა.
რაც შეეხება ადმინისტრაციულ ერთეულებში მერის წარმომადგენლებს, მათ მიმართ მობილობის პროცესი არ გახორციელებულა, გამომდინარე იქედან, რომ ისინი, 2017 წელს გაუქმებულ ოზურგეთის მუნიციპალიტეტის გამგეობაში შრომითი ხელშეკრულებით დასაქმებული პირები იყვნენ. 2017 წლის 29 ნოემბრიდან ოზურგეთის მუნიციპალიტეტის მერიაში მათი თანამდებობები გარდაიქმნა პროფესიულ საჯარო მოხელეებად. ამ დროსათვის, ველოდებით საჯარო სამსახურის ბიუროდან კონკურსის გამოცხადების შესახებ შეთანხმებას, რა პროცედურებიც ზემოთ აღვნიშნეთ.
_ ამ სამი თვის განმავლობაში ორივე ა(ა)იპ თანამშრომლები, ანუ ქალაქისაც და სოფლებისაც ხელფასებს იღებენ, ზარალდება თუ არა ბიუჯეტი?
_ მუნიციპალიტეტის ბიუჯეტი ა(ა)იპ-ების დაფინანსების მხრივ არ ზარალდება, გამომდინარე იქედან, რომ ოზურგეთის მუნიციპალიტეტის 2018 წლის ბიუჯეტით გათვალისწინებული ასიგნებების ფარგლებში ფინანსდებიან მუნიციპალიტეტის მიერ დაფუძნებული იურიდიული პირები. 2017 წელს გაუქმებულ ქალაქ ოზურგეთის მუნიციპალიტეტისა და ოზურგეთის მუნიციპალიტეტის ბიუჯეტებით ა(ა)იპ-ების დაფინანსება გათვალისწინებული იყო, რაც აისახა 2018 წლის ბიუჯეტში. შესაბამისად, ბიუჯეტი ამ კუთხით არ გაზრდილა.
_ როგორც გვეუბნებიან, საჯარო რეესტრი ხელოვნურად უშლის ხელს ამ პროცესებს, რა არის ამის მიზეზი, ვის ბრალია კონკრეტულად, მერის, იურიდიულის სამსახურის უფროსის, ა(ა)იპ ხელმძღვანელების თუ საჯარო რეესტრის.
_ აღნიშნულთან დაკავშირებით, კიდევ ერთხელ განგიმარტავთ, რომ მერიის სამართლებრივი უზრუნველყოფისა და ზედამხედველობის სამსახურის ან/და მერიაში არსებული სხვა სამსახურების (თანამდებობის პირების) ბრალეულობით ვითარება გამოწვეული არ არის. ვინაიდან როგორც ზემოთ აღვნიშნეთ ა(ა)იპ-ების რეორგანიზაციის პროცესის დასრულება, მათი ხელმძღვანელების დანიშვნა მითითებული კანონმდებლობით გათვალისწინებულ ვადებთან და პროცედურებთან არის დაკავშირებული.
