საფეხბურთო კლუბ “მერცხალის” ფეხბურთელებმა ორდღიანი პროტესტი ამ ეტაპზე დაასრულეს და ვარჯიში გააგრძელეს.
ფეხბურთელების ერთმა ნაწილმა “გურია ნიუსთან” საუბრის დროს თქვეს, რომ 26 თებერვალს, სამშაბათს, ოზურგეთის მუნიციპალიტეტის მერს უნდა შეხვდნენ და მაშინ გადაწყდება, გააგრძელებენ თუ არა ისინი ვარჯიშს. ფეხბურთელები ხელფასის დანიშვნას ითხოვენ.
“ფეხბურთის განვითარების ფონდიდან იმ შემთხვევაში ერიცხება ფეხბურთელს პრემია, თუ მოიგებენ თამაშს. გასულ წელს 18 თამაშიდან, მხოლოდ ერთი წააგეს და ამით რატომღაც არავინ არ დაინტერესებულა. ეს ბიჭები არიან ადგილობრივები და სჭირდებათ მეტი ყურადღება, დაფასება”, _ გვითხრა “მერცხალის” ერთ-ერთმა ქომაგმა.
“გუნდს აქვს 17 მოგება, ფეხბურთელებს კი ხელფასი არ აქვთ. ეს არის სამართლიანობა? როგორც ვიცი, რამდენიმე მუნიციპალიტეტში ბიუჯეტიდან ერიცხებათ ფეხბურთელებს ხელფასი და ეს ოზურგეთი რა გახდა?! ყველგან წინსვლაა ამ კუთხით და ჩვენთან კი უკან მიდის ყველაფერი”, _ ეს სიტყვები ერთ-ერთი ფეხბურთელის მშობელს ეკუთვნის.
ფეხბურთელების სახელით მედიის წარმომადგენლებთან მერაბ ანდღულაძემ და ირაკლი გოგუაძემ ისაუბრეს. მათი თქმით, ვარჯიში იმიტომ განახლდა, რომ ფორმაში ყოფილიყვნენ ფეხბურთელები:
“კლუბის ადმინისტრაციამ უნდა იზრუნოს, რომ ფეხბურთელებს ხელფასი ჰქონდეთ. მხოლოდ დაპირებებია და მეტი არაფერი. ბიჭებს გადაწყვეტილება გვაქვს მიღებული _ თუ იქნება ხელფასი, გავაგრძელებთ ფეხბურთის თამაშს, თუ არ იქნება, მაშინ წავალთ. ფეხბურთელს თავის მოვალეობა აქვს, დამლაგებელს _ თავისი და კლუბის ადმინისტრაციას _ თავისი. აქედან გამომდინარე, ვითხოვთ მოხდეს ხელფასის დანიშვნა, რადგან ასე გაგრძელება არ შეიძლება!”
ა(ა)იპ “ოზურგეთის მუნიციპალიტეტის საფეხბურთო კლუბ “მერცხალის” გენერალური დირექტორის მურთაზ აბაშიძის მოსაზრება საკითხთან დაკავშირებით “გურია ნიუსმა” რამდენიმე დღის წინ გაავრცელა.
“მე დღეს სტადიონზე დავაყენე საკითხი, რომ ჩემი ხელფასი ფეხბურთელებს მივცე. ასევე, მივმართე სხვებსაც და ვკითხე, თქვენ რას შვებით,-მეთქი? არავის უთქვამს, რომ ჩემ გვერდში არიან და 20-30 ლარს დადებდნენ. ოზურგეთელები უნდა დამიდგნენ გვერდში, რადგან იღუპება “მერცხალი”. მოვუწოდებ ოზურგეთელებს _ შევქმნათ საფეხბურთო კლუბ “მერცხალის” ფონდი, რომელშიც მე, ხარაგაულში დაბადებული კაცი, პირობას ვდებ, რომ პირადად მთელ ჩემს ხელფასს ჩავრიცხავ და ასევე, “მერცხალის” გულშემატკივრებსაც იმავეს მოვუწოდებ”, _ თქვა მურთაზ აბაშიძემ ჩვენთან საუბრის დროს.
ფეხბურთელების თქმით, ეს მხოლოდ დაპირებაა, ფაქტი კი ის არის, რომ ფეხბურთელებს ხელფასი არ აქვთ.
ოზურგეთის სტადიონის დირექტორი მამუკა გოგუაძე ამბობს, რომ ყველაფერი იმ შეხვედრაზე გაირკვევა, რომელიც ოზურგეთის მუნიციპალიტეტის მერიაში არის ჩანიშნული:
“მე მესმის ფეხბურთელების პროტესტის. იმედია, ყველაფერი დადებითად გადაწყდება”, _ თქვა მამუკა გოგუაძემ.
