ქალაქ ოზურგეთში მცხოვრები ცავლინა აფხაზავა ხელისუფლების წარმომადგენლებისგან დახმარებას ითხოვს. როგორც “გურია ნიუსთან“ ქალბატონი ცავლინა ამბობს, 3 წლის წინ ახალგაზრდა, 42 წლის რძალი გარდაეცვალა და ისეთ ადგილას დაასაფლავეს, რომელიც ყოველი გაწვივებისას იტბორება.
“არაფერს ვითხოვ ისეთს, რომ ხელისუფლება ვერ დამეხმაროს. რძლის გარდაცვალებისას არ მქონდა 1000 ლარი, კარგი მიწა რომ მეყიდა. ვიყიდე ისეთ ადგილას, სადაც გორაა, ამის საშუალება გვქონდა. წლებია ვიხვეწები, გაკეთდეს სასაფლაოსთან ჯებირივით რამე, მაგრამ არავინ მეხმარება. საშუალება რომ მქონდეს, დამოუკიდებლად გავაკეთო, არავისგან ვითხოვდი დახმარებას.
მეშინია წყალმა არ წამართვას მკვდარი. მძიმე სოციალური მდგომარეობა მაქვს, მაგრამ არ ვითხოვ ამ კუთხით დახმარებას, ოღონდ ეს პრობლემა მომიგვარონ და დამეხმარონ. ვეხვეწები ყველას, ვისთან არ ვიყავი მისული და არაფერი გამომდის“, _ გვითხრა ცავლინა აფხაზავამ.
როგორც ჩვენი რესპონდენტი ამბობს, ის ახლა შვილთან ერთად ცხოვრობს, რომელიც შშმ პირია, ორი შვილი კი თავშესაფარში არიან, ყოფილი საავადმყოფოს შენობაში.
სახლში, სადაც ორი ადამიანი ცხოვრობს, რთული სიტუაცია დაგვხვდა. სამზარეულოსა და საძინებელ ოთახში ფანჯარას მინა არ აქვს. მაცივარში მხოლოდ წყლით სავსე ბოთლები და უფასო სასადილოდან წინა დღეს მოტანილი საჭმელი ელაგა.
„აქ რომ მოვლენ, ადამიანები თუ არიან, ხომ უნდა მომხედონ, მაგრამ ამაზე არ ვფიქრობ ახლა, რადგან ვითხოვ ჯებირის გაკეთებას სასაფლაოზე. ვიყავი მაჟორიტარი დეპუტატის, არჩილ თალაკვაძის ბიუროში ლაშა ჭელიძესთან, ვიყავი ოზურგეთის მერთან კონსტანტინე შარაშენიძესთან, ვიყავი მის მოადგილესთან ირაკლი სირაძესთან, მაგრამ ეს პრობლემა ისევ პრობლემად რჩება.
გასაგებია, რომ ახლა არჩევნებია და შეიძლება არ აქვთ ამის საშუალება, მაგრამ ამ ქვეყანაში სულ არჩევნებია და ეს ზამთარი კიდევ წინ არის. როგორი ამინდი იქნება, არავინ იცის და მეშინია, მიცვალებული წყალმა არ წაიღოს. იმიტომ არიან ესენი ხალხის რჩეულები, რომ ყურადღება არ მომაქციონ?! მე ხომ მათი ამომრჩეველი ვარ. ოთხი ხმა მიიღო ჩემი ოჯახიდან „ოცნებამ“, მაგრამ მერე რა?! სოციალურად დაუცველი ვარ, მაგრამ ის თანხა არ გვყოფნის, რადგან ოთხივეს წამლები გვჭირდება და ხან პურის ფული არ გვაქვს, ეს წამალი კი ყოველ დღე გვჭირდება“, _ თქვა ჩვენთან საუბრისას ცავლინა აფხაზავამ.
პარლამენტარი არჩილ თალაკვაძის ბიუროს ხელმძღვანელი ლაშა ჭელიძე ჩვენთან საუბრის დროს ამბობს, რომ ყველაფერს ცდილობს, რომ ცავლინა აფხაზავას დაეხმარნონ.
“ვიცი ამ ქალბატონის შესახებ. წერილით მოგვმართა და მაშინვე ჩავაყანე საქმის კურსში ა(ა)იპ „ოზურგეთის მუნიციპალური მომსახურების სერვისცენტრის“ ხელმძღვანელი თენგიზ ქუტიძე და ა(ა)იპ ოზურგეთის მომსახურების ცენტრის, სასაფლაოს მომსახურების განყოფილების უფროსი, ზვიად ჭანუყვაძე. დავიწყეთ მუშაობა და შედგა ხარჯთაღრიცხვა. პრობლემის მოსაგვარებლად საჭიროა 12 ტომარა ცემენტი, 3 კბმ ხრეში, არმატურა და ხის მასალა. ამ ამბის შესახებ იციან ოზურგეთის მუნიციპალიტეტის მერიაში, მაგრამ ამ წლის ბიუჯეტში ამისთვის თანხა არ არის. უყურადღებოდ ნამდვილად არ დაგვიტოვებია. ასევე, ვმუშაობთ სხვა კუთხითაც, რომ როგორმე შევიძინოთ ეს ცემენტი, არმატურა და ა.შ. თუ ეს მოხდება, მაშინ სასაფლაოს მომსახურების განყოფილებიდან მოგვეხმარება რამდენიმე ადამიანი და მე პირადად, რაც კი იქნება სასაფლაოზე ასატანი, ავიტან“, _ გვითხრა ლაშა ჭელიძემ.
ოზურგეთის მუნიციპალიტეტის მერიის პრესსამსახურის ხელმძღვანელის, ეკატერინე მგელაძის ინფორმაციით, ცავლინა აფხაზავას აღნიშნული პრობლემის შესახებ ოზურგეთის მუნიციპალიტეტის მერიისთვის განცხადებით არ მოუმართავს. მომართვის შემთხვევაში, მერიის შესაბამისი სამსახური საკითხს განიხილავს შემდგომი რეაგირებისთვის.
