გუშინ ესპანურმა გამოცემამ „COPE“ სენსაციური „ნიუსი“ გაავრცელა. „ბარსელონასთან“ დაახლოებული ჟურნალისტი ვიქტორ ნავაროს მტკიცებით, კლუბის პრეზიდენტი ჟოან ლაპორტა კატალონიურ გუნდში ინიესტასა და მესის დაბრუნებას შეეცდება.
ლეო მესის „პარი სენ ჟერმენთან“ 2-წლიანი კონტრაქტი აკავშირებს. რაც შეეხება ინიესტას. მას იაპონურ „ვისელ კობესთან“ მოქმედი კონტრაქტი 2024 წლამდე აკავშირებს, თუმცა თუ გავითვალისწინებთ ანდრესისა და „ბარსელონას“ ურთიერთობას, შეთავაზების შემთხვევაში შესაძლოა უკან დაბრუნდეს.
ამ საკითხთან დაკავშირებით ორი დღის წინ თავად ჟოან ლაპორტამ შემდეგი განცხადება გააკეთა:
„მესი და ინიესტა? მათ კლუბი დიდებული გახადეს, ლეო და ანდრესი ბრწყინვალე მოთამაშეები არიან. მომავლის პროგნოზირება არ შემიძლია, „ბარსაში“ შესანიშნავები იყვნენ და კვლავ თამაშობენ და მაგრამ ახლა სხვა კლუბებთან აკავშირებთ კონტრაქტები. თუმცა, ცხოვრებაში არასდროს იცი რა მოხდება. ეს მოხდა დანი ალვეშთან დაკავშირებით და მადლობას ვუხდი მას“.
მომავალ კვირაში ევროპის ჩემპიონთა ლიგის ჯგუფური ეტაპის შეხვედრები განახლდება. გუშინ გამოცემა „Marca“ ახლო წარსულში ცნობილ გერმანელ ფეხბურთელ ლოთარ მათეუსს ესაუბრა. ჰერ ლოთარმა ჩემპიონთა ლიგის მიმდინარე სეზონის ფავორიტები დაასახელა.
„ჩემთვის ლიგის მოგების მთავარი ფავორიტები „ჩელსი“, „ლივერპული“, „მანჩესტერ სიტი“ და “ბაიერნი“ არიან.
რაც შეეხება ესპანურ კლუბებს, „ბარსელონას“ საკუთარი პრობლემები აქვს. „ატლეტიკო“ ყოველთვის სახიფათო გუნდი იყო, მაგრამ ისეთი კარგები ვერ არიან, როგორიც „ლივერპული“ და „სიტია“. – განაცხადა ლოთარ მათეუსმა.
ალბათ გახსოვთ ცნობილი იტალიელი ფეხბურთელი, „ცნობილი შფოთისთავი“ მარიო ბალოტელი. კარგი ფეხბურთელი კი გახლავთ, მაგრამ როგორც პიროვნება მძიმე ხასიათით გამოირჩევა. ამ მიზეზის გამო არაერთი კლუბი გამოიცვალა და საკუთარი კარიერაც აღმავალი გზით ვერ წაიყვანა.
31 წლის მოთამაშე ამჟამად თურქული „ადანა დემირსფორის“ ღირსებას იცავს, რომლის მთავარი მწვრთნელიც ვინჩენცო მონტელაა. სხვათა შორის, ამავე გუნდში ირიცხება ახალგაზრდა ქართველი თავდამსხმელი გიორგი ხაბულიანი. თურქული გუნდის მაისურით ჩატარებულ 13 მატჩში ბალოტელიმ, ყველა ტურნირის ჩათვლით, 5 გოლი გაიტანა.
გუშინ მარიო ბალოტელიმ იტალიის ნაკრებში დაბრუნებისთვის მზადყოფნა გამოთქვა, სადაც 2018 წლის შემდეგ არ უთამაშია. მოგეხსენებათ, იტალიის ნაკრებმა ვერ მოიპოვა მუნდიალის პირდაპირი საგზური და ახლა ამას მარტში გასამართი „ფლეი ოფის“ გზით შეეცდება.
ჯერჯერობით, იტალიის ეროვნული გუნდის მთავარ მწვრთნელ რობერტო მანჩინის ბალოტელის განცხადებაზე კომენტარი არ გაუკეთებია.
„მანჩინისთან არასოდეს მქონია ცუდი ურთიერთობა და ასეა დღესაც. ახლა რატომ არ ვარ ნაკრებში? იმიტომ, რომ არ ვიყავი შესაფერის კონდიციებში. მაგრამ დარწმუნებული ვარ, მომავალი წლის მარტისთვის კარგ ფორმაში ვიქნები. მე ყველასთან შემიძლია თამაში, მაგალითად, ჩიროსთან (იმობილე) ერთად… ბოლო ორწლინახევრის განმავლობაში არ მითამაშია ნაკრებში და ვგრძნობ, რომ ახლა მზად ვარ, დავეხმარო „სკუადრა აძურას“. ვიცი, რასაც ითხოვს მანჩინი ჩემგან“, – განაცხადა გუშინ მარიო ბალოტელიმ.
ერთი „შფოთისთავი“ იტალიის ნაკრებში დაბრუნებას ცდილობს, აი, შვედეთის ეროვნულ გუნდში ცოტა ხნის წინ დაბრუნებული მეორე „მოურჯულებელი“ – ზლატან იბრაჰიმოვიჩი საკლუბო კარიერის მოწყობას ცდილობს.
იტალიური მედიის ინფორმაციით, შვედი ფეხბურთელი, რომელსაც 40 წელი ოქტომბერში შეუსრულდა, „მილანთან“ ხელშეკრულების გახანაგრძლივებას კიდევ ერთი წლით აპირებს.
იბრაჰიმოვიჩის მოქმედი კონტრაქტი მიმდინარე სეზონის ბოლოს იწურება, ახალი ხელშეკრულება კი კლუბსა და ფეხბურთელს შორის 2023 წლის ზაფხულამდე უნდა გაფორმდეს. ამ დროისთვის შვედი უკვე 42-ე წელში იქნება.
ზლატან იბრაჰიმოვიჩი, რომელსაც სხვადასხვა დროს „აიაქსში“, „იუვენტუსში“, „ინტერში“, „ბარსელონაში“, „მანჩესტერ იუნაიტედსა“ და „პსჟ“-ში უთამაშია, „მილანში“ 2020 წელს დაბრუნდა. შვედმა ფორვარდმა მიმდინარე სეზონში იტალიის ჩემპიონატის 6 მატჩში ითამაშა და 3 გოლი და 1 საგოლე პასი მიითვალა.
[sexy_author_bio]
