გუშინ, კატარის მუნდიალზე მესამე ადგილის მფლობელი გაირკვა. ხორვატიის ეროვნულმა გუნდმა დაძაბულ ბრძოლაში მაროკო დაამარცხა – 2:1.
დღეს კი კატარის მუნდიალზე მსოფლიოს ჩემპიონის ვინაობა გახდება ცნობილი. შეძლებს საფრანგეთი ზედიზედ ორჯერ უძლიერესის წოდების შენარჩუნებას? მიაღწევს ლეო მესი საკუთარი ცხოვრების უპირველეს ამოცანას?
შეიძლება მიკერძოებულად გამომივიდეს, მაგრამ გულშემატკივართა უდიდესი ნაწილი ლეო მესისა და მის არგენტინას გულშემატკივრობს. რასაკვირველია ამის უმთავრესი მიზეზი ისევ და ისევ ლეო მესის ფაქტორია. ალბათ უსამართლობა იქნება რომ ამ შესანიშნავმა მოთამაშემ კარიერა მსოფლიო ჩემპიონის ტიტულის გარეშე დაასრულოს. ლეო ფინალურ დაპირისპირებაში მეორედ იასპარეზებს. ბრაზილიის მუნდიალზე საწადელს ვერ მიაღწია, როდესაც მისი გუნდი გამართულ გერმანულ მანქანასთან დამარცხდა. იმედია დღეს ნავსი გატყდება და ლეოს ქუჩაზეც დიდი ზეიმი იქნება.
გუშინ, ცნობილმა არგენტინელმა მწვრთნელმა მაურისიო პოჩეტინომ მსოფლიოს ჩემპიონატის ფინალზე ისაუბრა:
„არგენტინელი ვარ, არგენტინაში ვთამაშობდი და ბავშვობაში ყოველთვის ვოცნებობდი მსოფლიო ჩემპიონატის მოგებაზე. მესიც არაფრითაა განსხვავებული. კარგად ვიცი, რომ ის ოცნებობს ამ თასის მოპოვებაზე. ყველა არგენტინაში და ზოგადად, ყველა ადამიანს, ვისაც უყვარს ფეხბურთი, სურს, რომ მესიმ კვირას თასი მოიგოს, იმიტომ რომ მესი ფეხბურთია. თან, როგორც მან თქვა, ეს მისი ბოლო თამაში იქნება მსოფლიო ჩემპიონატზე“.
ლეო მესის მხარს უჭერს ახლო წარსულში გამოჩენილი ბრაზილიელი მოთამაშე რონალდინიოც.
„ერთი წუთითაც არ მეპარება ეჭვი, რომ მესი გაანადგურებს საფრანგეთს! ყოველ შემთხვევაში, ანგარიში იქნება არგენტინელების სასარგებლოდ, ისინი მოიგებენ მსოფლიო თასს. მესი ჩემი ძველი და ძვირფასი მეგობარია. ის ფეხბურთელზე მეტია. მე ვუფრთხილდები ამ ურთიერთობებს და ვცდილობ, ჩემი ენერგეტიკის ნაწილი გადავცე“, – განაცხადა რონალდინიომ.
ფინალური შეხვედრის წინ პრესკონფერენცია ჩაატარა არგენტინის ნაკრების მთავარმა მწვრთნელმა ლიონელ სკალონიმ:
„საფრანგეთის ნაკრები მხოლოდ მბაპე არაა, მიუხედავად იმისა, რომ ის შესანიშნავი მოთამაშეა. მათ ჰყავთ სხვა ფეხბურთელები, რომლებიც მას ეხმარებიან და უკეთეს მოთამაშედ აქცევენ. ფრანგებს შესანიშნავი გუნდი ჰყავთ. მბაპე ჯერ კიდევ ახალგაზრდაა და აგრძელებს პროგრესს, ამაში ეჭვი არ მეპარება. მისი შეჩერება გუნდური საქმეა.
მესი და მბაპე? ხვალინდელი თამაში არგენტინა საფრანგეთია. ორივე გუნდს ჰყავს სხვა მოთამაშეები და იარაღები, რომლებსაც თამაშის გადაწყვეტა შეუძლიათ და ამისთვის აუცილებელი მხოლოდ ეს ორი მოთამაშე არაა. იმედი ვიქონიოთ, რომ ყველაფერი ჩვენს სასიკეთოდ დასრულდება.“
ფინალური შეხვედრის წინ „ადიდასს“ სერიოზული პრობლემები წარმოეშვა. არგენტინის ნაკრებში ლიონელ მესის ათნომრიანი ორიგინალი მაისურები მარაგში მსოფლიოს მასშტაბით ამოიწურა. მსურველი ძალიან ბევრია და მარაგის ამოწურვამ დიდი ქაოსი გამოიწვია.
ლეო მესი თავის ბოლო მუნდიალს თამაშობს. ამ ფაქტის გამო მის მაისურზე მოთხოვნა დიდია. „ადიდასმა“ დაადასტურა, რომ წარმოების გაზრდა ფინალურ მატჩამდე შეუძლებელია.
„ადიდასი“ ახლა მუშაობს, რომ რაც შეიძლება უმოკლეს დროში მესის მაქსიმალურად ბევრი მაისური გამოუშვას, რადგან არგენტინის ნაკრების მიერ ფინალის მოგების შემთხვევაში, პროდუქტზე მოთხოვნა კიდევ უფრო გაიზრდება.
გუშინ, პრესკონფერენცია ჩაატარა საფრანგეთის ნაკრების მთავარმა მწვრთნელმა დიდიე დეშამმაც.
„არგენტინას გულშემატკივრებისგან ძალიან დიდი მხარდაჭერა აქვს. სტადიონზე ფრანგი ქომაგებიც იქნებიან, მაგრამ უმეტესობა არგენტინის გულშემატკივარი იქნება. სტადიონზე სადღესასწაულო ატმოსფეროს ველოდები, რადგან არგენტინელები ვნებიანი ხალხია. ასეთი ატმოსფერო მატჩისთვის ძალიან კარგია, რადგან ეს ფინალია. ხვალინდელი მატჩის შემდეგ ერთ–ერთ გუნდს მაისურზე სამი ვარსკვლავი ექნება.
ბენზემა? რომ არ გიპასუხოთ, დაწერთ, რომ გაბრაზებული ვარ. გუნდში რამდენიმე ტრავმირებულია, მათ შორის ბენზემა და ბოლოს ლუკას ერნანდესიც გამოგვაკლდა, მაგრამ 24 ფეხბურთელი მყავს. არ მაინტერესებს, ვინ ვის ეპატიჟება თამაშზე, მე ხვალ 24 ფეხბურთელი მეყოლება. კითხვის დასმა ტრავმირებულებთან დაკავშირებით, რბილად რომ ვთქვათ, უხერხულია, თუ მეტი არა.
ჩემი მომავალი? საფრანგეთის ნაკრები ჩემს კარიერაში საუკეთესო თავგადასავალია. ძალიან ბედნიერი ვარ, რომ აქ ვითამაშე და ახლა ვმუშაობ, მაგრამ არასდროს ვყოფილვარ საფრანგეთის ნაკრები, საფრანგეთი ჩემზე მაღლა დგას, მე არ ვარ ყველაზე მნიშვნელოვანი, მთავარი ხვალინდელი თამაშია.
ვირუსი? ეს არის თემა, რომელიც გაინტერესებთ, ეს მესმის, მაგრამ მაქსიმალურ ზომებს ვიღებთ მასთან გასამკლავებლად. სასტუმროდან რომ გამოვედი, ფეხბურთელებს ეძინათ. არ მაქვს უახლესი ინფორმაცია, დღეს გვექნება სიტუაციაზე მონაცემები, დრო კი ხვალამდე. მბაპე? კილიანს სიმშვიდე სჭირდება, ის მოედანზეა ორიენტირებული. კარგ კონდიციაშია და მხოლოდ იმაზე ფიქრობს, რაც მოედანზე უნდა გააკეთოს.
არგენტინა 2018 წლისგან განსხვავებული გუნდია, მიუხედავად იმისა, რომ 8 ფეხბურთელი იგივეა. ამიტომ არ ვაპირებ შედარებას, აზრი არ აქვს. ის მერვედფინალი იყო, ეს ფინალია. არგენტინამ ექვსივე თამაში განსხვავებული სისტემით ჩაატარა, მათი თამაში შევისწავლეთ. მაროკომ პირველად ითამაშა 5 მცველით ჩვენს წინააღმდეგ, მანამდე ეს არ გაუკეთებიათ, ამიტომ, ყველა სიტუაციისთვის მზად უნდა ვიყოთ.
ფინალი ყოველთვის განსაკუთრებულია. არსებობს ემოციური მხარეც, რომელიც ყველა მოთამაშეს სხვადასხვანაირი შეიძლება ჰქონდეს. ასეთი მატჩისთვის მოსამზადებლად მთავარი სიმშვიდის შენარჩუნებაა. ვიცი, რომ არგენტინელებს და შესაძლოა, ზოგიერთ ფრანგსაც უნდათ, რომ მესი მსოფლიოს ჩემპიონი გახდეს“. – განაცხადა დიდიე დეშამმა.
პრესკონფერენციაზე კომენტარი გააკეთა საფრანგეთის ნაკრების კაპიტანმა უგო ლორისმაც:
„ეს არის ფინალი ორ დიდ ერს შორის. როდესაც მესის მსგავს მოთამაშეს უპირისპირდები, მასთან ფრთხილად უნდა იყო, მაგრამ ამ თამაშში მხოლოდ ის არ არის. ეს ფინალია და ყველა ფეხბურთელს დიდი ყურადღება უნდა მივაქციოთ. დროდადრო ტანჯვისთვის მზად უნდა ვიყოთ და სიტუაციები კარგად ვმართოთ. მთელი თამაში ბურთის ფლობა ძნელია, დიდ გუნდს ვეთამაშებით. გვექნება თამაშის გეგმა, რომელიც უნდა დავიცვათ.
მქონდა პრივილეგია, რომ 2018 წელს ეს თასი მომეგო, მაგრამ სიმართლე გითხრათ, აწმყოზე ვარ ორიენტირებული, რაც ადრე მოხდა, უკვე წარსულია. გვინდა ჩვენი ისტორია დავწეროთ. დიდი მატჩისთვის და ნებისმიერი შემთხვევისთვის უნდა მოვემზადოთ, მიუხედავად გარემოებებისა, ვირუსისა და დაღლილობისა. საქმე უნდა დავასრულოთ“.
საინტერესოა რომ, საფრანგეთის ნაკრებში მსოფლიოს ჩემპიონატის ფინალის წინ საკადრო პრობლემები იზრდება. გუსინდელი ვარჯიში ოთხმა ფეხბურთელმა გამოტოვა.
„აქლემის ვირუსის“ გამო საწვრთნელ პროცესში რაფაელ ვარანმა და იბრაჰიმა კონატემ ვერ მიიღეს მონაწილეობა, ხოლო ტეო ერნანდესმა და ორელინ ჩუამენმა ტრავმების გამო.
„მილანის“ მცველს მუხლის დაზიანება აღენიშნება, „რეალის“ ნახევარმცველს კი – ბარძაყის. ჯერჯერობით, არ არის ცნობილი, რამდენად საგანგაშოა მათი ტრავმები.
საფრანგეთის ნაკრებს ბოლო დღეებში „აქლემის ვირუსის“ გამო ადრიენ რაბიო, დაიო უპამეკანო და კინგსლი კომანიც გამოაკლდნენ.
და კვლაც პოლიტიკა. ორი დღის წინ, უკრაინის პრეზიდენტის ოფისმა თხოვნით მიმართა ფიფას, 18 დეკემბრის ფინალის წინ საშუალება მიეცა ვოლოდიმირ ზელენსკისთვის, სიტყვით მიემართა მსოფლიო საზოგადოებისთვის.
სამწუხაროდ, ფეხბურთის მმართველმა საერთაშორისო ორგანიზაციამ უკრაინულ მხარეს უარით უპასუხა. ამისი არგუმენტი ის გახლავთ, რომ კატარის მუნდიალის დროს აქციები და მოწოდებები, რასაც არ უნდა ემსახურებოდეს ის, აკრძალულია და ფიფას არ სურს გამონაკლისის დაშვება.
ავტორი
