გუშინ, არგენტინის ნაკრებისა და მაიამის „ინტერის“ შემტევი ლიონელ მესი, პორტალ „FourFourTwo“-ს მიხედვით 21-ე საუკუნის საუკეთესო ფეხბურთელად აღიარეს.
რეიტინგში მეორე ადგილი „ალ-ნასრის“ თავდამსხმელმა კრიშტიანუ რონალდუმ დაიკავა, მესამეზე კი „ემირეითსის“ ნახევარმცველი ანდრეს ინიესტაა.
„ტოპ 10“-ში ასევე შედიან „ბარსელონას” ყოფილი ნახევარმცველი ჩავი, მისი ყოფილი თანაგუნდელი რონალდინიო, „რეალის” ყოფილი ნახევარმცველი ზინედინ ზიდანი, „არსენალის” ყოფილი ფორვარდი ტიერი ანრი, „ბაიერნის” მეკარე მანუელ ნოიერი, „მილანის” ყოფილი ნახევარმცველი კაკა და „გრემიოს” ფორვარდი ლუის სუარესი.
დღეს, ჩემპიონთა ლიგის მორიგ ტურში, ხვიჩა კვარაცხელიას „ნაპოლი“ მადრიდში „რეალს“ დაუპირისპირდება. საინტერესოა რომ ქართველი ფეხბურთელი „სანტიაგო ბერნაბეუზე“ პირველად ითამაშებს.
რასაკვირველია დღევანდელ დაპირისპირებას იტალიური მედია აქტიურად ეხმაურება.
„Gazzetta Dello Sport“: „კვარა გამონაკლისი ფეხბურთელია, არასდროს ჩვეულებრივი, რაც რუდი გარსიამ ბოლომდე ვერ გააცნობიერა. „ნაპოლიში“ კი ეს ძალიან კარგად იციან და ამიტომ, ეცდებიან, რაც შეიძლება მალე უზრუნველყონ ის ახალი, უფრო ხანგრძლივი ხელშეკრულებით, ქართველი ფეხბურთელის ტექნიკურ ღირებულებასთან მიახლოებული ხელფასით. აღსანიშნავია, რომ ხვიჩას ზაფხულში ანჩელოტის „რეალიც“ აკვირდებოდა.
როდესაც მან „ნაპოლისთან“ კონტრაქტი გააფორმა, ასეთ საღამოზე ოცნებობდა. ამაზე ფიქრი აჩქარებს გულისცემას, რადგან ხვიჩა კვარაცხელია „სანტიაგო ბერნაბეუზე“ პირველად გავა, სტადიონზე, რომელსაც ბავშვობიდან ტელევიზორით აღტაცებული უყურებდა. არ არსებობს უკეთესი თეატრი, სადაც კვარა შეძლებს უგოლო სერიის შეწყვეტას ჩემპიონთა ლიგაზე, სადაც 13 თვეზე მეტია გოლი არ გაუტანია. „ნაპოლი“-„აიაქსი“ 2022 წლის 12 ოქტომბერს გაიმართა. მას შემდეგ მან შეცვალა თავისი და კლუბის ისტორია – ხვიჩამ იტალიის ჩემპიონატი პირველივე სეზონში მოიგო, გახდა „სერია A“-ს სეზონის საუკეთესო ფეხბურთელი და ულამაზესი გოლის ავტორიც. მას შემდეგ იქორწინა, „ოქროს ბურთის“ რეიტინგში მე-17 ადგილი დაიკავა და მისი უდიდებულესობა, ლიონელ მესის კომპლიმენტებიც მიიღო პარიზში. ყველაფერი წარმოუდგენლად ლამაზი და შესაძლოა, მოულოდნელიც იყო, მაგრამ ახლა ევროპაშიც საჭიროა ცვლილება, რადგან ეს ხანგრძლივი უგოლო პაუზა მის უზარმაზარ ნიჭს არ შეეფერება“.
„La Repubblica“: „მადრიდის საღამო ძალიან მნიშვნელოვანი იქნება ხვიჩა კვარაცხელიასთვის, რომელიც შაბათს ბერგამოში გოლით და მანამდე ეროვნულ ნაკრებში შესანიშნავი თამაშებით ხვდება „რეალთან“ თამაშს, რამაც საქართველოს მეფე ევროპის ყურადღების ცენტრში მოაქცია. მადრიდი კიდევ ერთი გამოფენა იქნება „ნაპოლისთვის“ და მისი ლიდერებისთვის, რომლებიც ჩემპიონთა ლიგაზე ჯერ კიდევ უგოლოდ არიან. ამასობაში, კვარა „ნაპოლისთან“ მალე კონტრაქტს გაახანგრძლივებს, მანამდე კი შემდეგი გაჩერება „რეალია“.
ცნობილი გახდა, რომ მილანის „ინტერი“ დაუკავშირდა „ნაპოლის“ ნახევარმცველის, პიოტრ ჟელინსკის წარმომადგენლებს, რათა გაერკვია, რა თანხა უნდა გადაიხადონ, რომ ფეხბურთელი მილანურ კლუბს თავისუფალი აგენტის სტატუსით შეუერთდეს.
„ინტერს“ მოუწევს პოლონელს გადაუხადოს ხელმოწერის ბონუსი 4-5 მილიონი ევროს ოდენობით, ასევე შესთავაზოს ხელფასი 8 მილიონი ევროს ფარგლებში.
თუ ფეხბურთელი ოთხწლიან კონტრაქტს მოაწერს ხელს, „ინტერს“ ყველა გადახდის გათვალისწინებით დაახლოებით 37 მილიონი ევროს დახარჯვა მოუწევს.
ჟელინსკის შრომითი ხელშეკრულება „ნაპოლისთან“ 2024 წლის ზაფხულამდეა ძალაში. მანამდე მედიაში გავრცელდა ინფორმაცია, რომ „ნაპოლი“ ფეხბურთელთან მაღალი ხელფასის მოთხოვნის გამო ახალ კონტრაქტზე ვერ შეთანხმდა.
ლონდონის „ჩელსი“ კი „ნაპოლის“ თავდამსხმელის, ვიქტორ ოსიმენის შეძენას აპირებს.
ბრიტანული მედიის ცნობით, ინგლისელები მზად არიან ნიგერიელში 100 მილიონ გირვანქა სტერლინგზე მეტი გადაიხადონ, რაზეც ნეაპოლელები უარს ვერ იტყვიან, მით უფრო, რომ ფეხბურთელის ოცნება პრემიერლიგაში თამაშია. გამორიცხული არ არის, გარიგება იანვარშიც კი შედგეს.
ავტორი
