“საჯარო მოხელეების ხელფასები 2026 წლამდე ყოველწლიურად, მინიმუმ, 10%-ით გაიზრდება და ჯამში, 50%-იანი მატება იქნება” _ ეს წინადადება ქვეყნის პრემიერმა ირაკლი ღარიბაშვილმა ჯერ კიდევ გასული წლის აგვისტოში მთავრობის ერთ-ერთ სხდომაზე გააჟღერა.
მაშინ, პრემიერის თქმით, საჯარო მოხელეების ხელფასი 2026 წლამდე ყოველწლიურად, მინიმუმ, 10%-ით გაიზრდება.
“რა თქმა უნდა, მეტი თანხები გვექნება გადასანაწილებელი უწყებების მიხედვით და უფრო მეტი პროექტები დაფინანსდება. ეს, ასევე, გვაძლევს საშუალებას, რომ საჯარო სექტორში დასაქმებულთათვის შრომითი ანაზღაურება გაიზარდოს. 2020 წლამდე, პრაქტიკულად, არც ერთ წელს არ გაზრდილა ხელფასები საჯარო სექტორში, რაც, ვფიქრობ, დიდი შეცდომა იყო. ჩამორჩენა კერძო და საჯარო სექტორში არსებულ შრომის ანაზღაურებებს შორის ძალიან დიდია, ამიტომ ამას სჭირდება მოწესრიგება. იანვარში ანაზღაურება 10%-ით გაიზარდა ყველა საჯარო მოხელისთვის, ამის შემდეგ ყოველ წელს, 2026 წლამდე, მინიმუმ, 10%-ით გაიზრდება საჯარო მოხელეების ხელფასები და ჯამში, გამოვა 50%-იანი მატება უახლოესი წლების განმავლობაში. ამ დინამიკას სჭირდება შენარჩუნება. გვაქვს კარგი ინიციატივები, რომლებსაც გავაჟღერებთ და დავიწყებთ სექტემბრიდან. მინდა ხაზი გავუსვა იმ სტაბილურობის მნიშვნელობას, რომელიც მმართველმა გუნდმა შევინარჩუნეთ ამ პერიოდში. მინდა მოსახლეობას ვუთხრა, რომ ჩვენთან შენარჩუნდება მშვიდობა და მაღალი ეკონომიკური ზრდა, რაც ნიშნავს მეტ კეთილდღეობას ჩვენი მოქალაქეებისთვის და ქვეყნისთვის”, _ აღნიშნა მაშინ ირაკლი ღარიბაშვილმა.
უკვე თებერვალიც მიიწურა, თუმცა, ლანჩხუთის მუნიციპალიტეტში მომატებული ხელფასი ჯერაც არ მიუღიათ საკრებულოს რიგით წევრებს, რომლებსაც, რეგლამენტის თანახმად, საკრებულოს პირველი პირის ასაღები ხელფასის 15 პროცენტის ოდენობით ეკუთვნით სადეპუტატო უფლებამოსილების თანხა.
აღმოჩნდა, რომ როგორც საკრებულოს, ასევე, მერიის საჯარო მოხელეთა ხელფასების მატების საკითხი საკრებულომ წინა ორ სხდომაზე დაამტკიცა და მათ იანვრიდან ნამატი თანხები უკვე ჩაერიცხათ. რიგით წევრების შემთხვევაში კი ასე არ მოხდა და საპროცედურო და იურიდიულ საკითხთა კომისიის თავმჯდომარემ, გიორგი ხელაძემ თებერვლის ბოლო სხდომაზე გამოიტანა საკითხი, რომელიც მარტიდან სადეპუტატო უფლებამოსილების თანხის 680 ლარიდან 750 ლარამდე გაზრდას ითვალისწინებს.
ვინაიდან ლანჩხუთის მუნიციპალიტეტის საკრებულოს 27 წევრიდან, 20 თანამდებობის პირია, მათ უკვე დაუმტკიცდათ ხელფასების მატება და იანვრიდან ნაცდურიც მიიღეს. ის 7 რიგითი წევრი კი, დაჩაგრული დარჩა და, ბუნებრივია, ამან მათი სამართლიანი გულისწყრომა გამოიწვია, ვინაიდან როგორც საკრებულოს წევრებმა, მათ საჯარო მოხელეთა ხელფასების მატებას უკვე დაუჭირეს მხარი, თავად კი ოფსაიდში აღმოჩნდნენ.
უფლებამოსილების თანხის გაზრდის საკითხის კენჭისყრაზე დაყენებამდე სწორედ ეს გულისწყრომა დააფიქსირა ლესისა და ჯურუყვეთის მაჟორიტარმა დეპუტატმა ელისო ჭიჭინაძემ და იმ კოლეგების სათქმელიც თქვა, რომლებსაც საკრებულოში თანამდებობა არ უკავიათ.
“პირველ რიგში, დიდი მადლობა მინდა გადავუხადო რამდენიმე ადამიანს, რომლებიც აქტიურობდნენ, ბატონი მერის ხელმძღვანელობით, იმისთვის, რომ სადეპუტატო უფლებამოსილების თანხა ყოფილიყო უფრო მეტად ღირსეული ჩვენთვის, რომ ჩვენც უფრო მეტად ღირსეულად გავახორციელოთ ის უფლება-მოვალეობა, რაც დაგვაკისრა ამომრჩეველმა. რა მნიშვნელობა აქვს, საკრებულოში მაჟორიტარი თუ პარტიული სიით ვართ. მე ჩემს თავზე ვისაუბრებ, თუ ადრე ერთი ადმინისტრაციული ერთეულის მაჟორიტარი ვიყავი, ახლა მეორე ადმინისტრაციული ერთეული დამემატა ოთხი სოფლით. როცა სახელმწიფომ საჯარო მოხელეებისთვის 10%-იანი მატება დაიწყო ხელფასებზე, მივესალმეთ ამას რიგითი დეპუტატებიც და რიგგარეშე სხდომაზე აქტიურად მოვედი, რომ დროში არ გაწელილიყო და ჩემი ხმაც შეწეოდა კოლეგებს, რომლებიც იანვრიდან აიღებდნენ ამ 10% დანამატს.
მე ვკითხულობ, ისევე არ უნდა მოქცეულიყვნენ ჩემი მეგობრები, ჩემი კოლეგები იმ შვიდი ადამიანის მიმართ?! საკრებულოს 27 წევრიდან 20 თანამდებობის პირია, შვიდი ვართ რიგითი დეპუტატი, რომლებიც მხოლოდ სადეპუტატო უფლებამოსილების თანხას ვიღებთ. შეიძლებოდა თუ არა, რომ იმავე რიგგარეშე სხდომაზე, ანდაც მანამდე მოწვეულიყო რიგგარეშე სხდომა და ჩვენ თებერვლის თვის დანამატი აგვეღო?! ეს გულგრილობაა, მეგობრებო! ძალიან კარგად ვიცი ჩემი უფლებები და მოვალეობები, კარგად ვიცი ვალდებულებები და ისე ვცხოვრობ, რომ ვალდებულებებს უფრო წინ ვაყენებ, ვიდრე ჩემს უფლებებს. ძალიან გთხოვთ, მეტი კოლეგიალობა იყოს”, _ თქვა ჭიჭინაძემ.
საბოლოოდ, კენჭისყრის შედეგად გადაწყდა, რომ მარტის ბოლოს საკრებულოს არათანამდებობის პირი დეპუტატები 70 ლარით გაზრდილ თანამდებობრივ სარგოს მიიღებენ, იანვარ-თებერვლის თვის ნაცდურის გარეშე.
ავტორი
