მეუფე იაკობი აგონიურ მდგომარეობაშია, ამ განცხადებით, მსჯავრდებული დეკანოზის ადვოკატები მეუფე იაკობის მიერ ქადაგებისას გუშინ გაკეთებულ განცხადებებს ეხმაურებიან.
დეკანოზის უფლებადამცველები აბსურდულს უწოდებენ მეუფის ბრალდებებს და მაღალი რანგის სასულიერო პირს ცილისწამებაში ადანაშაულებენ.
მათი თქმით, მეუფის მტკიცება, თითქოს, გიორგი მამალაძე რუსეთში მსახურობდა, სიმართლეს არ შეესაბამება.
„მან კარგად იცის, რომ სტრასბურგის სასამართლოში საკუთარი წვლილი ე.წ. ციანიდის საქმეში არ დაიმალება და აქედან გამომდინარე არის გამოწვეული მისი აგონიური მდგომარეობა. რუსეთის საპატრიარქოს იურისდიქციაში კი არ მსახურობდა, საქართველოს საპატრიარქოს მიერ იყო წარდგენილი უკრაინაში, ქართველ ემიგრანტებთან, ჩაეტარებინა წირვა-ლოცვები,“ – განაცხადა ადვოკატმა, გიორგი ფანცულაიამ.
დეკანოზ გიორგი მამალაძის ადვოკატი, მიხეილ რამიშვილი აღნიშნავს, რომ თუ ამდენი წელი იცოდნენ ვითომ, რუსეთში მსახურებაზე და გამოდევნაზე, რატომ დუმდნენ და რატომ მიიღო მაშინ დეკანოზი საპატრიარქომ.
შეგახსენებთ, რომ საკვირაო ქადაგებისას მეუფე იაკობმა დეკანოზი გიორგი მამალაძე ავაზაკად და დაჯგუფების წევრად მოიხსენია.
„ამდენი ხანი არ იციან ავაზაკობა იმისი? თუნდაც ავიღოთ რუსეთის ეკლესიის წევრი იყო, იმათი ეკლესიის მღვდელმსახური იყო მამალაძე. მანქანა რომ დაუწვეს, ცოცხალმა, რომ ძლივს გამოასწრო და ჩვენმა ეკლესიამ რატომ შეიფარა, ჩემთვის დღესაც გაუგებარია, იმ ავაზაკს რატომ იცავენ? დაუსვან მეუფე პეტრეს კითხვას, იცის თუ არა ეგ საკითხი და რატომ იცავს მერე? თურმე მე ვყოფილვარ სირცხვილი და 2013 წლის 17 მაისის გამო მე ვყოფილვარ ერის სირცხვილი,“ – განაცხადა მეუფე იაკობმა.
წყარო: რუსთავი2
