შემოქმედელი მიტროპოლიტმა მეუფე იოსებმა გუშინ ჩოხატაურში, იოაკიმე და ანას სახელობის საკათედრო ტაძარში იქადაგა.
ქადაგების დროს მან თქვა, რომ თუ ადამიანების გარკვეული ნაწილი ვერ მივა ეკლესიაში და არ დაესწრება სააღდგომო ლიტურგიას, ცოდვად არ ჩაითვლება.
„შეგიძლიათ დარჩეთ სახლში თუ რამე დაავადებები გჭირთ, ან გეშინიათ, მერე რა, მეც მეშინია, იცით? ვერ გეტყვით, რომ არ მეშინია, მაგრამ ღმერთის უფრო მეშინია, ვიდრე ამ ვირუსის. რომც დამემართოს კორონა ვირუსი რა პრობლემაა, რა ვიცი, შეიძლება ქუჩაში დამემართოს, შეიძლება სუპერ მარკეტში ისეთი ამბებია ეკლესია მონაგონია. ნებისმიერ ადგილას შეიძლება დამემართოს კორონა ვირუსი, რა ვქნა, თუ ღვთის ნებაა, დამემართება, თუ არაა ღვთის ნება- არ დამემართება. ვაჟკაცობა, რომ მე ვირუსი არ დამემართება, არ შეიძლება. პირიქით, შეიძლება უფრო დაგემართოს. თავმდაბლობით მივიდეთ უფალთან და ვთხოვოთ უფალო, შემაძლებინე აღდგომის ღამეს თაყვანი გცე და მოვიდე შენს წმინდა ტაძარში. თუ ვერ მოხვალთ, არც ესაა პრობლემა. ერთი კვირის მანძილზე თქვენ შეგიძლიათ ეზიაროთ. მე ვერც იმას გეტყვით, არ მოხვიდეო, არც იმას გეტყვით – მოდიო. თქვენი გადასაწყვეტია. მე აუცილებლად მოვალ. მიუხედავად იმისა, რომ თქვენსავით მეც მეშინია, იმიტომ რომ უამრავი ადამიანია, ვინც გარდაიცვალა და ძალიან დიდი პრობლემებია მსოფლიოში. “ – თქვა ქადაგების დროს მეუფე იოსებმა.
მისივე თქმით, აშკარად, ეს ვირუსი შექმნილია სხვადასხვა მიზეზების გამო, მაგრამ ჩვენ რწმენით, სასოებით, სიყვარულით შევხვდეთ ამ დიდ განსაცდელს.
„30 წელია სასულიერო პირი ვარ და ასეთი მარხვა, განსაცდელი არ მქონია. ყველაფერი ღვთის ნებაა, ხალხო! დაგვემართება- დაგვემართება, რა ვქნათ. შეიძლება გარეთ გავიდე, აგური დამეცეს და გარდავიცვალო. კორონა ვირუსი მომკლავს, შიმშილი მომკლავს თუ აგური დამეცემა, რა მნიშვნელობა აქვს, მაგრამ ჩვენ მაინც უნდა გავუფრთხილდეთ. პირბადე აუცილებელია, რომ ჩვენ სხვას არ გადავდოთ ჩვენი ავადმყოფობა. არ არის სასურველი ხელზე კოცნები. მე დარწმუნებული ვარ, არც ჩემგან გადაგედებათ, არც ეკლესიიდან. ეკლესიაში არსებობს 7 საიდუმლო და 7 საიდუმლოდან არაფერი არ გადაგედებათ. ეს არის საკურნებელი სულისა და ხორცისა. დანარჩენი- ჩვენ შეგვიძლია დავიცვათ და გავუფრთხილდეთ ერთმანეთს.
წინასწარ გილოცავთ აღდგომის ბრწყინვალე დღესასწაულს. წარმოიდგინეთ, ადრე მუსლიმები შემოდიოდნენ ადრე საქართველოში და ხოცავდნენ ქრისტიანებს. შემოვარდებოდნენ და ვინც წირვაზე იდგა ყველას კუწავდნენ. რა მნიშვნელობა აქვს ჩემთვის თავი მომაჭრის ვინმე თუ საავადმყოფოში გარდავიცვლები.
როდესაც კონსტანტინეპოლი აიღეს და აია სოფიას ტაძარში შევარდნენ მუსულმანები. არც ერთი ქრისტიანი იქ ცოცხალი არ დატოვეს და მღვდელი, რომელიც აზიარებდა ხალხს, შეტრიალდა, შევიდა საკურთხეველში, გავიდა კედელში და გაქრა. წინასწარმეტყველებაა, რომ ის მღვდელი გამოვა საკურთხევლიდან და გააგრძელებს ზიარებას. ზიარება, ლიტურგია ამაზე დიდი არ არსებობს. ლიტურგია ეს არის უპირველესი, ამის გარეშე აზრი არა აქვს ეკლესიის არსებობას. აქ რომ ლიტურგია არ ჩატარდეს ეს იქნება ჩვეულებრივი სახლი.
შევთხოვოთ ღმერთს, გამოგვიყვანოს ამ უდიდესი განსაცდელიდან. გავუფრთხილდეთ ერთმანეთს. დავიცვათ ერთმანეთისგან დისტანცია. გაიკეთეთ დეზინფექცია. სანამ პანდემია გავრცელდებოდა, მე პატრიარქს ვიცნობ 40 წელია. მას ჯიბეში სულ ჰქონდა სპირტი. როდესაც წირვას დაასრულდებდა, დაისხურებდა ხელებზე და იწმინდავდა. ხოდა ახლა ეს აუცილებელია. სისუფთავე აუცილებელია,”_ თქვა ქადაგების დასასრულს მეუფე იოსებმა.
