ოზურგეთის მუნიციპალიტეტში, გარდა ცენტრალური ავტოსადგურისა, რომელიც გასულ წელს გავიდა ექსპლუატაციაში და აკმაყოფილებს მეორე კატეგორიის სტანდარტს, ქალაქის კიდევ რამდენიმე ადგილიდან ასრულებენ სოფლების მიმართულებით რეისებს ავტობუსები თუ მიკროავტობუსები. არა ერთ სოფელში, მაგალითად, შრომის, კონჭკათის, თხინვალის, მთისპირის მიმართულებით, დღეში ერთი, ორი ან სამი რეისი სრულდება, რეისების რაოდენობა კი დამოკიდებულია ძირითადად მგზავრების რაოდენობაზე, ასევე, გზის ვარგისიანობასა და ტრანსპორტით მგზავრობის ღირებულებაზე.
სააქციო საზოგადოება “ოზურგეთის სამგზავრო ავტოსადგურის დირექტორი”, შალვა ორაგველიძე “გურია ნიუსთან” საუბარში ამბობს, რომ წინა წლებში, როცა საწვავის ფასი გაიზარდა, უმნიშვნელოდ, მაგრამ მაინც გაიზარდა მგზავრობის ფასი. ახლა კი ყველა სოფლის მიმართულებით, სულ ცოტა, უკანასკნელი ერთი წლის მანძილზე, სარეისო ტრანსპორტი ჩვეულ რეჟიმში, უცვლელი სამგზავრო ტარიფით ემსახურება ხალხს.
კითხვაზე, არსებობს თუ არა ტრანსპორტის კანონით გათვალისწინებული ტვირთის ფასი, მაგალითად, 50 კილოგრამის ოდენობის ტვირთში იხდის თუ არა მოქალაქე თანხას, მან გვითხრა, რომ დღეისთვის ტრანსპორტის კანონი ასეთ რამეს არ არეგულირებს.
_ ახლა მძღოლები ინდმეწარმეები არიან _ კერძო სტრუქტურაა. ადრე, მგზავრობის ფასი ასე იანგარიშებოდა _ ცხრათეთრიანი ტარიფი ერთ კილომეტრზე. ახლა ასე არ არის. დღეისთვის მძღოლები ჩვენთან ათანხმებენ ყველაფერს, _ გვითხრა ორაგველიძემ.
სხვადასხვა სოფლის მიმართულებით, სარეისო ავტობუსები სხვადასხვა გრაფიკით მოძრაობენ. მაგალითად, სოფელ ჭანიეთში დღეში შვიდ რეისს აკეთებს, ასევეა გურიანთაში, მერიაში. თუმცა, შრომასა და კონჭკათში მხოლოდ ერთი ან ორი რეისი სრულდება. ეს, ძირითადად, მგზავრების რაოდენობის მიხედვით რეგულირდება.
როგორც მთელ საქართველოში, ისე ოზურგეთში, ახლა მძღოლები ბევრს საუბრობენ საწვავის ფასის მომატებაზე, თუმცა აქ ჯერჯერობით მგზავრობის ღირებულება უცვლელია, თუ არ ჩავთვლით ახლახან ქალაქ ოზურგეთიდან წულუკიძის ქუჩით გამავალ, სოფელ მელექედურის სარეისო მიკროავტობუსით მგზავრობის ფასის ათი თეთრით მატებას _ ამ მიმართულებით მგზავრობის ღირებულება აქამდე 50 თეთრი იყო, ახლა კი სამოცი თეთრი გახდა.
_ ეს არის ერთადერთი გამონაკლისი, რადგან ამ სოფელში შედარებით დაბალი ფასი ადრიდანვე შემორჩა. არის სოფლები, სადაც იგივე მანძილის გავლით, მგზავრობის ღირებულება 70 თეთრია. დღეისთვის, როცა საწვავმა კიდევ ერთხელ მოიმატა, ვეღარ გაუძლეს ამას მძღოლებმა. მოგეხსენებათ, ტექნიკური სერვისი საკმაო ხარჯებთან არის დაკავშირებული და მძღოლების ინტერესებიც უნდა იქნეს გათვალისწინებული. რა ქნას მძღოლმა, რომელსაც მგზავრობის მინიმალურ საფასურს უხდიან? _ გვითხრა შალვა ორაგველიძემ, რომელმაც, ასევე აღნიშნა, რომ მიუხედავად მინიმალური მატებისა, თუ მელექედურის მოახლეობა წინააღმდეგი იქნება მინიმალური ათი თეთრის მომატებაზე, მაშინ რამდენიმე რეისი მოაკლდება ამჟამად არსებულ რეისების რაოდენობას:
_ ვთქვათ, დღის განმავლობაში თუ სრულდებოდა შვიდი რეისი, ნაცვლად იქნება ხუთი ან ოთხი. წინააღმდეგ შემთხვევაში, მძღოლები ვეღარ შეძლებენ ამ მიმართულებით მუშაობას.
_ რატომ მოხდა, რომ მაინც და მაინც ამ ერთ სოფელში იმთავითვე შედარებით დაბალი ფასი დარჩა და იგივე მანძილის გავლისას სხვა სოფლებში 60-70 თეთრს იხდიან?
_ ახლა ამის მიზეზებს ვეღარ ვეძებთ. ფაქტია, რომ დარჩა და დღევანდელი კრიზისიც კონკრეტულად ამ რეისზე, ამის გამოა, _ გვითხრა ორაგველიძემ.
ოზურგეთი-ციხისფერდის რეისის მძღოლი ვაჟა ხინთიბიძე ამბობს, რომ აქ მგზავრობის ღირებულება 70 თეთრია და მიუხედავად საწვავის ფასის ზრდისა, ფასის გაზრდა არ უფიქრია.
მგზავრ ციური ცხომელიძის თქმით, საწვავის ფასის ზრდის გამო, არცაა გასაკვირი, მგზავრობის ღირებულება გაიზარდოს:
_ მძღოლი ამხელა გზაზე ტყუილად ხომ არ ივლის?! _ კითხულობს ის.
ნატანები-ნაღობილევი- მერიის მიმართულებით, ოზურგეთიდან მიმავალ მიკროავტობუსის მძღოლს გულადი ქურასბედიანს როცა ვკითხეთ, მოიმატა თუ არა მგზავრობის ფასმა, შემოგვწყრა:
_ საიდან მოიტანეთ?! ჰკითხეთ ნებისმიერ მგზავრს. ისე, არ გამაბრაზოთ, თორემ მართლა მოვუმატებ. თუ ტყუილად ილაპარაკებთ, მოიმატაო, აბა, რა უნდა ვქნა? _ გადმოგვძახა უკვე დაძრული მანქანიდან.
ოზურგეთი-ძიმითის რეისის მძღოლი რეზო მახარაძე ამბობს, რომ მგზავრობის ღირებულება ოზურგეთიდან სოფლამდე, დიდი ხანია ლარნახევარი ღირს და არც რაიმე სმენია ამ მოკლე პერიოდში სამგზავრო ფასის ზრდაზე.
რაც შეეხება მგზავრების მიერ ტვირთის გადატანას, ერთი ადამიანი რამდენსაც გადაიტანს, ჩანთების რაოდენობას მნიშვნელობა არ აქვს, ამაში დამატებით ღირებულებას არავინ ითხოვს.
_ თუ ერთ ადამიანს დიდი რაოდენობის ტვირთი აქვს გადასატანი, მაშინ ჩვეულებრივად, მოელაპარაკება მძღოლს და გადაუხდის. ამაში რაა გასაკვირი? _ ამბობს შალვა ორაგველიძე.
ჩვენ ასევე გავესაუბრეთ ლიხაურის, მაკვანეთის, ჭანიეთის მძღოლებს. მათ თქვეს, რომ არაფერი შეცვლილა, როგორც მგზავრების გადაყვანის, ისე მათ მიერ ტვირთის გადაზიდვის მხრივ:
_ ისედაც არ არის მგზავრები და ფასი რომ მოვუმატო, სულ არ იქნება ან ახლო სოფლებიდან ფეხით დაიწყებენ სიარულს, _ გვითხრეს მათ.
რაც შეეხება ტრანსპორტის ტექნიკურად გამართულობის და ზაფხულში კონდიცირების საკითხს, ეს, მგზავრების თქმით, მარადიული პრობლემაა:
_ კიდევ კარგი, ჯერჯერობით, თბილი ზამთარია და მიკროავტობუსების მძღოლებს, ვისაც გამართული ტრანსპორტი არ ჰყავს, გათბობის ჩართვა არ სჭირდებათ, თორემ კი ვისხდებით სიცივეში. ტექნიკურ გამართულობას რაც შეეხება, ეს მთლად უარესი _ ზოგი ტრანსპორტი იმდენად გაუმართავი და ძველია, მართლაც საფრთხის წინაშე დგანან, როგორც მძღოლები, ისე მგზავრები, _ ამბობენ ისინი.
