დღევანდელ ე.წ სასამართლოს ჰქვია 4 ოქტომბრით შეშინებული ქართველი ხალხით „დამანდრაჟებული“ კრიმინალური „კლანის“ მორიგი საცირკო წარმოდგენა, – ამის შესახებ საქართველოს მე-3 პრეზიდენტმა, მიხეილ სააკაშვილმა განაცხადა.
მისი თქმით, მას მრავალ წელს უსჯიან იმისათვის, რომ ის საკონსტიტუციო მოვალეობას ასრულებდა.
„უნდა მივულოცო მოლდოვას გამარჯვება – ჩვენი შეცდომა არ გაიმეორა. ეს არის პუტინისა და „ქოცების“ მარცხი.
რაც შეეხება დღევანდელ ე.წ სასამართლოს, მას ჰქვია 4 ოქტომბრით შეშინებული ქართველი ხალხით „დამანდრაჟებული“ კრიმინალური „კლანის“ მორიგი საცირკო წარმოდგენა. საქმე იმაშია, რომ ეს „სასამართლო“ უკვე ივლისში უნდა დასრულებულიყო, მაგრამ როცა გაისმა 4 ოქტომბრისთვის მოწოდება, სასწრაფოდ გადატანილი იქნა 4 ოქტომბრის კვირისთვის, რათა თქვენ პატრონს მისი ჭკუით დაეშინებინა ქუჩაში გამომსვლელი ხალხი. ამის სათქმელი კი ის არის, რომ თუ სააკაშვილის დაჭერა შეგვიძლია, ესე იგი ყველას დაჭერა შეგვიძლიაო.
ჩემზე საქმის აღძვრა და ტყვედ ჩავარდნის შემდეგ ციხეში გამწესება, იქ კი წამება და მოწამვლა, გათვლილი იყო თანამებრძოლების საბოლოო დათრგუნვაზე და საერთოდ დაჭერების ნორმად დანერგვაზე.
საერთოდ ივანიშვილის პოლიტპატიმრები იყოფა 4 ძირითად კატეგორიად: პირველი – მოსკოვიდან ბრძანებით დაჭერილები – მე, რომა შამათავა, სპეცრაზმელები და ოქრუაშვილი, რომელიც ახლა არანაირ საფრთხეს არ უქმნიდა მათ. მეორე – პოლიტიკური ლიდერები, მათ შორის მეც და ლევან ხაბეიშვილიც. მესამე – საპროტესტო მოძრაობის აქტივისტები და „სინდისის პატიმრები“. მეოთხე – ის ხალხი, ვინც ივანიშვილთან ბიზნესს აწარმოებდა და მას თვალში არ მოუვიდა. ამათ განსაკუთრებით სასტიკად ექცევა – გიორგი ჩიკვაიძე, რომელიც მოწამლეს, ბაჩიაშვილი აცემინა.
მრავალ წელს მისჯიან იმისათვის, რაც ჩემი საკონსტიტუციო მოვალეობა იყო, განმეხორციელებინა ჩემი საპრეზიდენტო უფლებამოსილებები, წარმედგინა ქვეყანა უცხოეთში. უსმინეთ ივანიშვილის ზებრის გამოსვლას გაეროში [მიხეილ ყაველაშვილი]. აქ ჩემს დროს ჩამოვიდა ამერიკის სამი პრეზიდენტი, 2 ვიცე-პრეზიდენტი, 2 სახელმწიფო მდივანი, საფრანგეთის და გერმანიის ლიდერები. მათი გამასპინძლების ხარჯები, ისევე როგორც ყველა სხვა ხარჯი, ოფიციალურად იყო დოკუმენტირებული და შესაბამისად, ოლიგარქის პროკურატურის მიერ უადვილესად აღმოსაჩენი იყო.
ამ ოფიციალურ დოკუმენტებს პირდაპირ მიაკრეს გაფლანგვის მუხლი და ეს გააკეთა ივანიშვილმა, რომელიც იძახდა, რომ 19 მილიარდი მქონდა მითვისებული, რომელმაც ღამე საკნიდან მერაბიშვილი გამოიყვანა და შესთავაზა გათავისუფლება ჩემი არარსებული უცხოური ანგარიშების ნომრების გადმოცემის ფასად.
კარგი რაც მოხდა, ხალხმა ამ წლებში დაიწყო კითხვების დასმა თუ სინამდვილეში რატომაა დაპატიმრებული სააკაშვილი, მათ შორის ისეთმა ხალხმა მოიკითხა ეს ამბავი, ვინც ადრე თვლიდა რადგან დაპატიმრებულია, ალბათ, მართლა რამე აქვს აქვს ჩადენილი და ახლა ამდენი სხვა ადამიანის დაჭერის შემდეგ როგორც იქნა მიხვდნენ, რომ ამ ქვეყანაში ხალხს თურმე უდანაშაულოდ იჭერენ.
არც ის არაა შემთხვევითი, რომ განზრახული აქვთ ჩემი საყვარელი ვენახის და იქ მდგომი 70კვ. მეტრი სახლის ჩამორთმევა. ამ სახლის ხელა ამ კორუმპირებული ბანდის თითოეულ წევრს ტუალეტები აქვთ ქართველებისგან მოპარული ფულით აშენებულ სასახლეებში.
ყვარელს თქვენთვის დიდი სიმბოლური მნიშვნელობა აქვს. ეს ვენახი გახდა რუსული ღვინის ემბარგოს მიმართ წინააღმდეგობის ცენტრი, სწორედ ამ ვენახში ტარდებოდა უმნიშვნელოვანესი დიპლომატიური მოლაპარაკებები. იქ საწნახელში იდგნენ ამერიკელი სენატორები, რომელთაც ქართულ ღვინოს „თავისუფლების სასმელი“ უწოდეს, პრეზიდენტები, პრემიერები, მინისტრები და მონაკოს პრინცი.
ამ ვენახის ჩამორთმევა, ისევე როგორც მთლიანად ეს სამარცხვინო სასამართლო პროცესები ემსახურება მხოლოდ ერთ რამეს – შურისძიებას იმის გამო, რომ მე დავამარცხე კორუფცია საქართველოში, შემდეგ სერიოზულად შევავიწროვე იმავენაირი კორუფცია უკრაინაში და საერთოდ ვითვლები მსოფლიოს მასშტაბით კორუფციასთან და კრიმინალთან ერთ-ერთ ყველაზე წარმატებულ მებრძოლად“, – განაცხადა მიხეილ სააკაშვილმა.
მისივე თქმით, ახლა „ხალხმა უნდა აიღოს ძალაუფლება ხელში, ისე როგორც მოლდოვაში“.
„ხალხს, რომელმაც გაძარცვა ქვეყანა, ცოლებს ტყეებს ჩუქნიან, მილიარდებს იპარავენ, მე ჩემი პრეზიდენტობის შემდეგ, ბიუჯეტში თავისუფალი 3 მილიარდი დავტოვე, რომელიც ჯიბეში ჩაიდეს.
მე, რომელმაც საქართველო ხელახლა ავაშენე, საქართველოში ბინაც არ გამაჩნია. მე ვარ ძალიან წარმატებული და თქვენ ხართ სრულიად „ლუზერები“. მე მიცნობს და მაფასებს მსოფლიოს უმეტესობა და თქვენ მიუხედავად თქვენი მილიარდებისა, არავინ ხართ, რომ მე და ჩემს თანამებრძოლებს სრული მორალური უპირატესობა გვაქვს და ის, რომ ისტორიას შემორჩება ჩემი სახელი და მიუხედავად თქვენი უბადრუკი მცდელობისა ისტორიის გადაწერის, იგივე ისტორია მე გამამართლებს.
ისინი ამბობენ, რომ მე დამნაშავე ვარ და რა არის ჩემი დანაშაული? ის ხუთჯვრიანი დროშა, რომელიც დღეს ამაყად ფრიალებს? დიახ! ეს არის ჩემი დანაშაული! ახალი ბათუმი, სვანეთი და ქუთაისი არის ჩემი დანაშაული?
მათ უნდათ, რომ დაგავიწყდეთ სიამაყის და გამარჯვების შეგრძნება! ის განცდა, როდესაც მსოფლიოს დავანახეთ, თუ რა შეუძლია საქართველოს!
საქართველოში ციხეებში ისხდნენ ჩვენი ქვეყნის მტრები – რუსი ჯაშუშები! ახლა კი ციხეები სავსეა საუკეთესო ქართველი პატრიოტებით!
ჩვენი საქართველო თავის საუკეთესო ახალგაზრდებს მსოფლიოს საუკეთესო უნივერსიტეტებში აგზავნიდა, რათა დაბრუნებულიყვნენ და სამშობლო ეშენებინათ!
მათი საქართველო კი ჩვენს ახალგაზრდებს კომბოსტოს საკრეფად აგზავნის, რათა ქართულ კოშმარს გაექცნენ!
ჩვენ დონალდ ტრამპს ბათუმში ვმასპინძლობდით და ცათამბჯენების აშენებაზე ვესაუბრებოდით!
ჯერ ერთმა ქალმა დაგვამახსოვრა თავი რომის პაპის დაკრძალვაზე ტრამპისთვის მხარზე ხელის „მიპარვით“ მოთათუნებით; ახლა კი ყაველაშვილი პოზირებს 2-3-წამიან ფოტოში, თითქოს მადამ ტუსოს მუზეუმში იღებდეს სურათს!
ვიცი, რომ ჩვენ ისტორია გაგვამართლებს. უახლოეს დღეში ველი პროვოკაციებს, მაგრამ არაფერი გამოუვათ. ხალხმა უნდა აიღოს ძალაუფლება ხელში, ისე როგორც მოლდოვაში, რუსეთი უნდა დამარცხდეს. ჩვენ გვაქვს განსაკუთრებული მისია, აიღეთ ხელისუფლება ხელში და ნურაფრის გეშინიათ.
ახლა კი ცირკის „კლოუნებო“, გააკეთეთ თქვენი საქმე. მოგიწევთ სამართლიანი სასამართლოს პირობებში სასამართლოზე წარდგენა“, – განაცხადა მიხეილ სააკაშვილმა.
