„მიხეილ სააკაშვილის ფასი კაცურადაც ნულოვანია“_თინა ხიდაშელი

„მიხეილ სააკაშვილს სანდრო გირგვლიანის საქმეზე სიმართლის აღიარება ძალიან უჭირს, რადგან აღნიშნულმა საქმემ ის გაანადგურა. მიხეილ სააკაშვილი გირგვლიანის საქმეს ვერ პატიობს, როგორც საკუთარ თავს, ისე თავის გარემოცვას, ამიტომ  მას ადეკვატურობის მინიმალური დოზის შენარჩუნება უჭირს“,_აღნიშნა „გურია ნიუსთან“ თავდაცვის ყოფილმა მინისტრმა თინა ხიდაშელმა, რომელმაც  გადაცემა „კვირის აქცენტებში“ საქართველოს მესამე პრეზიდენტის, მიხიელ სააკაშვილის მიერ გაჟღერებული განცხადებები შეაფასა.

მისი თქმით, „სანამ მიხეილ სააკაშვილი ამ უმძიმეს საქმესთან დაკავშირებით საკუთარ თავზე მაღლა არ დადგება, სულ ასეთ მდგომარეობაში იქნება, ხან ღორს იძახებს, ხან მის სიტყვას ვციტირებ _ ჩათლახს“.

_ ქალბატონო თინა, სანდრო გირგვლიანის მკვლელობის საქმეზე სტრასბურგის სასამართლოს გადაწყვეტილების პარალელურად, საქართველოს ექსპრეზიდენტმა მიხეილ სააკაშვილმა, რომელმაც გირგვლიანის მკვლელებს სასჯელი გაუნახევრა და ევროპული სასამართლოს გადაწყვეტილებით, საქმის გაყალბებაში მონაწილეობდა,  ამტკიცებს, რომ აღნიშნულ საქმეში მისი ბრალეულობა არ იკვეთება. სააკაშვილის სიტყვების ციტირება: „გირგვლიანის მკვლელობაში მონაწილეობა არ მიმიღია, არაფერი კავშირი არ მაქვს და ამის პრეზიდენტზე დაბრალება დიდი ღორობაა“. იმ ფონზე, როცა განაჩენი ლეგიტიმურად დამდგარია, სააკაშვილი კვლავ საწინააღმდეგო პოზიციას რა მოტივით ამტკიცებს?

_ყველა ადამიანს  აქვს უფლება, ბოლომდე ამტკიცოს თავისი უდანაშაულობა, მაგრამ მიხეილ სააკაშვილის აღნიშნული განცხადება ყოველგვარ ზღვარს სცდება. როგორც ჩანს, მას სანდრო გირგვლიანის საქმეზე სიმართლის აღიარება ძალიან უჭირს, რადგან აღნიშნულმა საქმემ ის გაანადგურა. მიხეილ სააკაშვილი გირგვლიანის საქმეს ვერ პატიობს, როგორც საკუთარ თავს, ისე თავის გარემოცვას, ამიტომ  მას ადეკვატურობის მინიმალური დოზის შენარჩუნება უჭირს. იქამდე, სანამ მიხეილ სააკაშვილი ამ უმძიმეს საქმესთან დაკავშირებით საკუთარ თავზე მაღლა არ დადგება, სულ ასეთ მდგომარეობაში იქნება, ხან ღორს იძახებს, ხან მის სიტყვას ვციტირებ _ ჩათლახს.

_აღნიშნულ საქმეში საკუთარი თავის მართლების ფონზე, მიხეილ სააკაშვილმა აღიარა, რომ მაშინდელი შს მინისტრის, ვანო მერაბიშვილისთვის, რომელიც ევროპული სასამართლოს გადაწყვეტილებით, სანდრო გირგვლიანის მკვლელობის დაფარვაში, გამოძიების გაყალბებაში, დამნაშავე პირებისთვის ხელის დაფარებაში და მათთვის პასუხისმგებლობის თავიდან არიდებაში მონაწილეობდა, თანამდებობის შენარჩუნება შეცდომა იყო.

_ მიხეილ სააკაშვილს სხვებთან მიმართებაში შეცდომების აღიარება არ უჭირს. აი, საკუთარ თავთან დაკავშირებით ვერ გადადის სენტიმენტებში, ამიტომ არის ასე მძიმე მდგომარეობაში. სტრასბურგის სასამართლოს გადაწყვეტილებაში გირგვლიანის საქმესთან დაკავშირებით ერთმნიშვნელოვნად წერია, რომ ამ ადამიანის წინააღმდეგ სახელმწიფო კონსპირაციულად მოქმედებდა. დამნაშავე ადამიანების ჩამონათვალში კი მიხეილ სააკაშვილი პირველი წერია. სააკაშვილის ფასი სამართლებრივად, პოლიტიკურად და კაცურადაც კი აბსოლუტურად ნულოვანია.

_როგორც ირკვევა, 2008 წლის დასაწყისში, აგვისტოს ომამდე, საქართველოს მესამე პრეზიდენტი რუსეთთან კულუარულ მოლაპარაკებებს აწარმოებდა და ოკუპანტ ქვეყანას ოკუპირებული ტერიტორიების დათმობის ნაცვლად, ჩრდილოატლანტიკურ კურსზე, ნატოში ინტეგრაციაზე უარის თქმას სთავაზობდა, რაც რუსეთისთვის მაინცდამაინც მომხიბვლელი წინადადება არ აღმოჩნდა. სააკაშვილის სკანდალური სიტყვების ციტირება: „ 2008 წლის დასაწყისში პირდაპირ ვუთხარი _ ნატოზე უარს ვამბობთ, ტერიტორიები დაგვიბრუნეთ და დავამყაროთ მშვიდობა“. რუსეთთან ამგვარი მოლაპარაკებები რომ არ გაჭრიდა, ნათელი იყო, სააკაშვილს ახლა აღნიშნულზე აპელირება  რა მიზნით დასჭირდა?

_ პირველ ყოვლისა, უნდა აღვნიშნო, რომ  მიხეილ სააკაშვილის აღნიშნული განცხადება მოღალატეობრივად ჟღერს. ამ შეთავაზებაზე პუტინი რომ დასთანხმებოდა, სააკაშვილს რა გარანტია ჰქონდა, რომ რუსეთი საქართველოს ტერიტორიულ მთლიანობას კვლავ არ დაარღვევდა და იმავეს გაიმეორებდა, რაც 90-იან წლებში აფხაზეთის ომის დროს მოხდა?! და შემდეგაც ძალიან ბევრჯერ გამეორდა. ეს ყველაფერი არის ზღვარგადასული პოპულიზმი, რომელსაც მიხეილ სააკაშვილის მხრიდან მუდმივად ვისმენთ. გიგა ბოკერიამ, დავით ბაქარაძემ და გიგი უგულავამ აღნიშნულის შესახებ თუ იცოდნენ, ისინი ძალიან სასაცილო მდგომარეობაში ჩაიგდებენ თავს. ეს პირები ზურა აბაშიძისა და ჟენევის მოლაპარაკებების ფორმატს აკრიტიკებენ და თავად საერთოდ ნატოზე უარის თქმის მდგომარეობაში ყოფილან ჩავარდნილნი. დიდი იმედი მაქვს, მიხეილ საკაშვილი იტყუება და  ყველაფერს იგონებს. პირადად არ მჯერა, რომ თავის დროზე, ტერიტორიების დაბრუნების მიზნით, ნატოზე უარის თქმას დაპირდა.

_მაშინდელი პარლამენტის თავმჯდომარე ნინო ბურჯანაძე, სააკაშვილსა და პუტინს შორის მოლაპარაკებებს „პალიტრანიუსის“ გადაცემაში „360 გრადუსი“, ფაქტობრივად, ადასტურებს. მისი თქმით, სააკაშვილმა აღნიშნული ფრაზა თქვა რუსეთის პრეზიდენტთან საუბრის დროს  _ „ჯერ დაგვიბრუნეთ აფხაზეთი და „სამხრეთ ოსეთი“ და მერე ჩვენ შეიძლება ნატოზე უარი ვთქვათ“. ბურჯანაძე აქვე დასძენს, რომ სააკაშვილის განცხადება დამატებითი შესწავლის საგანი უნდა გახდეს.

_ნინო ბურჯანაძის დადასტურება არ არის ლეგიტიმური. მისი პოზიცია საინტერესოა, მაგრამ, ბურჯანაძე 100%-ით სანდო არ არის. გიგა ბოკერიას და დავით ბაქრაძის განცხადება იქნება განსაკუთრებით ლეგიტიმური.

_საქართველოს მესამე პრეზიდენტი უარყოფს ინფორმაციას იმის შესახებ, რომ რუსეთის პრეზიდენტი ვლადიმერ პუტინი მის მიმართ ნეგატიურად არის განწყობილი და რომ აგვისტოს ომის გამომწვევი მიზეზი საქართველოს, როგორც წარმატებულ სახელმწიფოდ ჩამოყალიბება გახდა. ეთანხმებით მის პოზიციას?

_ ეს მიხეილ სააკაშვილის მიერ გაკეთებული ის იშვიათი განცხადებაა, რომელშიც დავეთანხმები. ამ 30 წლის განმავლობაში საქართველო რუსეთთან შედარებით ზედმეტად წარმატებული ქვეყანა იყო და არის, შესაბამისად, რუსეთისთვის ერთ-ერთი მოტივი ომის წამოწყების აღნიშნული ფატიც გახდა. ოკუპანტ ქვეყანას არ შეუძლია მის საზღვართან წარმატებული და დემოკრატიული სახელმწიფო არსებობდეს, რადგან მათთვის აღნიშნული საფრთხეს წარმოადგენს. რუს ხალხს ავტორიტარიზმისა და ტოტალიტარიზმის ქვეშ ცხოვრება ნამდვილად უნდათ,  მაგრამ საზოგადოებას დაკარგული აქვს იმედი იმისა, რომ სამყაროს ამ ნაწილში ცივილიზებული, დემოკრატიული და წარმატებული სახელმწიფო გაჩნდება, ოპტიმიზმის გაჩენას კი თავად პუტინი ეწინააღმდეგება.

_“პუტინს ყოველთვის ჰქონდა ჩემ მიმართ რაღაც სიმპათია“_ ამბობს სააკაშვილი. სიმპათია რაში გამოიხატა, ტერიტორიების ანექსიაში თუ  რაიმე სიკეთე ახსოვს ქართულ სახელმწიფოს ოკუპანტი ქვეყნისგან?

_მიხეილ სააკაშვილსა და ვლადიმერ პუტინს ერთმანეთის მიმართ სიმპათიები, წესით, უნდა გააჩნდეთ, რადგან ზუსტად ერთნაირი სტილის მმართველები არიან. სააკაშვილს რატომ დასჭირდა აღნიშნულზე ხაზის გასმა, ცოტა გაუგებარია.

_მიხეილ სააკაშვილი საქართველოში ყოფნის შემთხვევაში საკუთარ მხარდამჭერებს  „ქართული ოცნების“ მმართველობის“ სამ დღეში დასრულებას დაჰპირდა, ციტირება: „თუ მექნება საშუალება ჩემს ბიბლიოთეკამდე მივაღწიო, სიტყვაზე, სადაც სამი დღე ვიქნები, გარწმუნებთ, ხალხი ივანიშვილს მშვიდობიანად დაემშვიდობება“. როგორ ფიქრობთ, ყოფილ პრეზიდენტს ქართულ საზოგადოებაში ისეთი გავლენა შერჩა, რომ ხალხი მისი ხელმძღვანელობით “ოცნებას“ სახლში გაუშვებს და ხელისუფლებაში კვლავ „ნაციონალურ მოძრაობას“ დააბრუნებს?

_აღნიშნული გამორიცხულია. იმ შემთხვევაში, თუ მიხეილ სააკაშვილი საქართველოში ჩამოვა, ციხეში აღმოჩნდება. ეს არის მისი ერთადერთი რესურსი. ციხეშიც არის ბიბლიოთეკა და  შეიძლება, კარგ მდგომარეობაშიც აღმოჩნდეს.