წელს, ლანჩხუთში, არა ერთი მსხვილი ინფრასტრუქტურული პროექტის გახორციელებაა დაგეგმილი და ამ მხრივ ინტენსიური სამუშაოები მიმდინარეობს: კეთდება პროექტები, მუშავდება ხარჯთაღრიცხვები, ცხადდება ტენდერები და ზოგ შემთხვევაში, გამარჯვებულები უკვე გამოვლენილებია, ზოგ შემთხვევაში კი ეს პროცესი დასრულების პირასაა მისული. როგორც მერიის ინფრასტრუქტურის სამსახურში გავარკვიეთ, უკვე გადაწყვეტილია, სად და რა ინფრასტრუქტურული პროექტი გახორციელდება.
დავიწყოთ გარდამავალი პროექტით, რომელიც შარშან დაიწყო და წელს უნდა დასრულდეს. ასეთია ეგნატე ნინოშვილის სახლ-მუზეუმთან მისასვლელი გზის ასფალტირების სამუშაოები, რომელსაც შპს “საგზაო” ახორციელებს. სამუშაოების დასრულებისთვის ეს ფირმა წელს 326 400 ლარს დახარჯავს და მთლიანობაში 4-კილომეტრიანი გზის მონაკვეთი ბოლომდე ასფალტირებული იქნება.
ცნობილია, ასევე, ის შემსრულებელი, რომელიც ქალაქის ტერიტორიაზე ორ მრავალბინიან საცხოვრებელ კორპუსს გადახურავს _ საუბარია ჟორდანიასა და კუპრეიშვილის ქუჩებზე მდებარე კორპუსებზე, რომელთა გადასახურად შპს “დაისი” 150 ათას ლარს დახარჯავს. აღნიშნული სამუშაოები ჟორდანიას ქუჩაზე თითქმის უკვე დასრულებულია.
ასევე, გამოვლენილია იმ საკმაოდ სოლიდური თანხის მქონე პროექტის გამარჯვებული, რომელიც ქალაქის ქუჩებზე სანიაღვრე არხების მოწყობას ითვალისწინებს. პროექტით, რომლის ღირებულება 895 ათასი ლარია, მოხდება ქალაქის რამდენიმე ქუჩის კეთილმოწყობა: კერძოდ, ებრალიძის, გურიელის, გურიის, მშვიდობის, ბაგრატიონის ჩიხის, თავისუფლების შესახვევის, წმინდა ნინოს შესახვევისა და ჩიხის, ასევე, ბარათაშვილის შესახვევისა და ჩიხის სანიაღვრე არხების მოწყობა. როგორც მერიის ინფრასტრუქტურის, არქიტექტურისა და სივრცითი მოწყობის სამსახურის უფროსმა ლევან ჩხაიძემ გვითხრა, ამ პროექტის ტენდერში გამარჯვებული ცნობილია, თუმცა, ვინაიდან ხელშეკრულება ჯერ არ გაფორმებულა, მის ვინაობას ვერ გაასაჯაროებს.
ანალოგიური სიტუაციაა ოთხი სოფლის წყლის სისტემების მოწყობა-რეაბილიტაციის პროექტზე. კერძოდ, გვიმბალაურის, ღრმაღელის, ჩოჩხათისა და სუფსის წყალმომარაგების მასშტაბურ სამუშაოებზე უნდა დაიხარჯოს მილიონ 376 ათასი ლარი და ტენდერში გამარჯვებული ორგანიზაცია აქაც ხელშეკრულების გაფორმების სტადიაშია და მერია სამუშაოების დაწყებას მოკლე ხანში აანონსებს.
რაც შეეხება სოფელ გვიმბალაურში, ყოფილი ტექნიკუმის ტერიტორიაზე საფეხბურთო აკადემიის მშენებლობას, მისი მთავარი კორპუსის მშენებლობა მალე დასრულდება. ასევე, მოეწყობა ხელოვნურსაფარიანი სტადიონი. ამის პარალელურად მუნიციპალიტეტი აკადემიის ეზოს კეთილმოწყობას გეგმავს და საამისოდ მილიონ ლარზე ოდნავ მეტ თანხას დახარჯავს. ამ კუთხით უახლოეს დღეებში გამოცხადდება ტენდერი, რომლის გამარჯვებული მოაწყობს საპარკინგეს, სანიაღვრე სისტემას, შეღობავს ტერიტორიას და მთავარი კორპუსისა და სასადილოს უზრუნველყოფს ინვენტარით.
960 ათას ლარამდე თანხაა გამოყოფილი მაღალმთიან სოფლებში გზის გარკვეულ მონაკვეთებზე ბეტონის საფარისა და ასფალტირებისთვის. ეს სამუშაოები მამათის, აცანის, მაჩხვარეთის, ღრმაღელის, ჩოჩხათის, გვიმბალაურის, ნიგვზიანის და ჩიბათის ტერიტორიულ ერთეულებში გახორციელდება.
ამასთანავე, დაგეგმილია ცენტრალურ მაგისტრალზე არსებული ქალაქის ინფრასტრუქტურის მოწყობა. კერძოდ, ყოფილი ყველ-კარაქის საწარმოდან სოფელ გვიმბალაურამდე უნდა მოხდეს ტროტუარებისა და ბილიკების მოწყობა, რამდენიმე ადგილზე უნდა შეიცვალოს სანიაღვრე სისტემა, მთლიანად უნდა განახლდეს გარე განათების სისტემა, მოეწყოს გამწვანება. ამავე პროექტში გათვალისწინებულია ქალაქის სამი ხელოვნურსაფარიანი სტადიონის რეაბილიტაცია, ქალაქის ქუჩების (ძირითადად, თავისუფლების ქუჩის) ორმოვანი შეკეთება, თუმცა, როგორც ინფრასტრუქტურის სამსახურის უფროსი, ლევან ჩხაიძე ამბობს, ეს პროექტი უფრო გარდამავალ სახეს მიიღებს და წელს სტადიონების კეთილმოწყობასა და ორმოვან შეკეთებაზე გაკეთდება აქცენტები, ხოლო დანარჩენი მომავალი წლისთვის გახორციელდება.
ცალკე თემაა სტიქია და მისი პრევენცია. ამ მხრივ გარკვეული სამუშაოებია დაგეგმილი. კერძოდ, საუბარია მარჯანიშვილის, გოგიჩაიშვილის და ურუშაძის ქუჩების სანიაღვრე არხების მოწყობაზე, რომელიც წელსვე მოეწყობა. რაც შეეხება ხიდების სარეაბილიტაციო მასშტაბურ პროექტს, შპს “გზამშენი” მის დაპროექტებას ახორციელებს და მაისის ბოლოსთვის ცნობილი იქნება, მაჩხვარეთისა და ნიგვზიანის ტერიტორიულ ერთეულებში ორ-ორი ხიდის, ასევე, როგორც ჩოჩხათის სოფლებში მდებარე ოთხი დიდი ხიდის სარეაბილიტაციო თანხების ოდენობა. ესეც გარდამავალი პროექტია და მთლიანობაში 6 მილიონამდე ლარის დახარჯვა იგეგმება.
რაც შეეხება სოფლის განვითარების პროგრამას, ამ კუთხით, მთლიანობაში, 748 ათასი ლარის სამუშაოები გახორციელდება მუნიციპალიტეტში. ლევან ჩხაიძის თქმით, პროექტების მნიშვნელოვანი ნაწილი უკვე შესრულებულია.
