11 თებერვალს გარემოს დაცვისა და ბუნებრივი რესურსების კომიტეტის თავმჯდომარე ნინო წილოსანმა საპარლამენტო სამუშაო ჯგუფის წევრებმა და საქართველოს გარემოს დაცვისა და სოფლის მეურნეობის მინისტრმა ლევან დავითაშვილმა კომპანია „RMG“-ში გარემოს დაცვითი სამუშაოები დაათვალიერეს. სამუშაო ვიზიტი გარემოს დაცვისა და ბუნებრივი რესურსების კომიტეტთან არსებულ სამუშაო ჯგუფში დაიგეგმა და მისი ინიციატორი „საყდრისის კომიტეტი“ გახლდათ, პარალელურად „საყდრისის კომიტეტმა“ სამუშაო ვიზიტში ჩართვა საქართველოს გარემოს დაცვისა და სოფლის მეურნეობის მინისტრს ლევან დავითაშვილსაც სთხოვა. ვიზიტის დროს სტუმრებმა დაათვალიერეს და იმსჯელეს იმ მასშტაბურ სამუშაოებზე, რომელიც კომპანიაში გარემოს დაცვითი მიმართულებით უკვე წელიწადნახევარია მიმდინარეობს. როგორც უკვე ცნობილია, 2018 წლის ივნისში „საყდრისის კომიტეტის“ თითქმის ერთწლიანი აქტიურობის შედეგად პარლამენტის გარემოს დაცვისა და ბუნებრივი რესურსების კომიტეტთან შეიქმნა ქვემო ქართლის რეგიონში დაბინძურების შემსწავლელი საპარლამენტო სამუშაო ჯგუფი (ხელმძ. კახა კუჭავა, „საყდრისის კომიტეტი“, „მწვანე პოლიტიკის საზოგადოებრივი პლათფორმა“ ) რომელიც აქტიურ უწევს მონიტორინგს კომპანია „RMG“-ის გარემოს დაცვითი ვალდებულების შესრულებას.
ვიზიტის დროს, შემაჯამებელ სიტყვაში ლევან დავითაშვილმა „საყდრისის კომიტეტის“ მნიშვნელოვან როლზეც ისაუბრა – „მადლობა თქვენ – “საყდრისის კომიტეტის” ყველა წევრს, ეს არაერთხელ გვითქვამს და ახლაც უფრო მეტად შეგვიძლია ავღნიშნოთ – მნიშვნელოვანია თქვენი როლი და ეს მნიშვნელოვანი იყო საწყისი ეტაპიდანვე, როდესაც არის ზომიერი სამართლიანი კრიტიკა და როდესაც არის ორიენტირები შედეგებზე და არ ამხოლოდ პროცესზე, ჩვენ შედეგებს მართლაც ვიღებთ. პირველი დღიდანვე როდესაც თქვენთან დავიწყეთ ურთიერთობები ეს ცხადი იყო და თქვენი ამოცანა იყო მიგვეღო შედეგი, გესმით ეკონომიკური საქმიანობის მნიშვნელობა, კომპანიის საქმიანობის მნიშვნელობა, რადგან ეს დაკავშირებულია აქ დასაქმებული ადამინების ეკონომიკურ და სოციალურ პირობებთან, ასევე რეგიონის ეკონომიკასა და განვითარებასთან. ეს ელემენტები გვესმის, მაგრამ ძალიან მნიშვნელოვანია და ალბათ წარმოუდგენელია, რომ ჩვენ არ ვიფიქროთ გარემოს ზემოქმედებაზე და გარემოზე მიყენებული ზემოქმედების გამოსწორებაზე”.
„საყდრისის კომიტეტი“ 11 თებერვლის ვიზიტთან დაკავშირებით პოზიციას პარლამენტში -სამუშაო ჯგუფის უახლოეს შეხვედრაზე გაახმოვანებს.
