საქართველოს ეკონომიკისა და მდგრადი განვითარების მინისტრი გიორგი გახარია უძრავ-მოძრავ ქონებას არ ფლობს. ერთადერთი უძრავი ქონება, რომელიც მისი ოჯახის საკუთრებაშია მის მეუღლეს, მარიკა ფანცულაიას ეკუთვნის და ის თბილისში, მაზნიაშვილის ქუჩაზე მდებარე 395,00 კვ.მ-ის ფართობის მიწის ნაკვეთია, რომელიც ფანცულაიას 2011 წელს, 79900-ლარად შეუძენია. მარიკა ფანცულაიას საკუთრებაშია ასევე, 2016 წელს, 22000-დოლარად ნაყიდი მსუბუქი ავტომანქანა ტოიოტა RAV 4.
აღნიშნულის შესახებ გიორგი გახარიას ქონებრივ დეკლარაციაში წერია, რომელიც მან 2017 წლის 31 მაისს შეავსო.
რაც შეეხება ოჯახის ფინანურ მდგომარეობას, როგორც გიორგი გახარიას დეკლარაციაშია აღნიშნული, გასული წლის განმავლობაში მათ ჯამში 67 650, 57 ლარის შემოსავალი მიიღეს, რაც გასული წლის შემოსავალზე 7349 ლარით ნაკლებია.
კერძოდ, გიორგი გახარიას საქართველოს ეკონომიკისა და მდგრადი განვითარების სამინისტროდან, მინისტრის პოსტისთვის ერთი თვის განმავლობაში, 2016 წლის 27 ნოემბრიდან 31 დეკემბრამდე 6755,71 ლარის შემოსავალი მიუღია, მანამდე, საქართველოს ბიზნესომბუდსმენის თანამდებობიდან 11 თვის განმავლობაში 51774,83 ლარი აქვს მიღებული. ხოლო მის მეუღლეს, მარიკა ფანცულაიას კი, ავერსის ცენტრალური კლინიკიდან, სადაც ის ექიმი-ბაქტერიოლოგია, ერთი წლის განმავლობაში მხოლოდ 9 120 ლარის შემოსავალი მიუღია.
ქონებრივი დეკლარაციის შევსების მომენტში, გიორგი გახარიას საბანკო ანგარიშზე რაიფფაიზენ ბანკში ნახევარ მილიონ დოლარამდე თანხა იყო. კერძოდ, ამ ბანკის მიმდინარე ანგარიშზე გახარიას 452 900 დოლარი ჰქონდა. “საქართველოს ბანკის” მიმდინარე ანგარიშზე 4654,48 ლარი ერიცხებოდა; ამავე ბანკის საკრედიტო ანგარიშზე კი – 2943 ლარი; ხოლო მიმდინარე ანგარიშზე 323,56 ლარი; რაც შეეხება მარიკა ფანცულაიას, მას “საქართველოს ბანკის” მიმდინარე ანგარიშზე 137,00 ლარი, ხოლო ამავე ბანკის მეორე მიმდინარე ანგარიშზე 392 ლარი ერიცხებოდა.
გიორგი გახარიას სახელზე 11370– დოლარიანი ავტოგანვადებისათვის გაფორმებული საკრედიტო ხელშეკრულებაა, რისთვისაც გასულ წელს ბანკ „რესპუბლიკასთვის“ 6600,00 დოლარი გადაუხდია. ასევე, გიორგი გახარიას სახელზეა, 2102,41-დოლარიანი სადაზღვევო სესხის ხელშეკრულება, რისთვისაც ამვე ბანკისთვის 1200,00 დოლარი აქვს გადახდილი.
გიორგი გახარია 10000-ლარიანი საკრედიტო ბარათით მომსახურება, გასულ წელს 130,00 ლარი დაჯდომია.
აქვე უნდა აღინიშნოს, რომ გიორგი გახარიას რუსეთის ფედერაციში, მოსკოვის ოლქში, ქალაქ ოდინცივიში (ვოკზალნაია ქ. 19 ბინა 259) 76.00 კვ.მ-ის ფართობის ბინა 350 000-დოლარად 2016 წლის 22 ივლისს გაუყიდია. ეს ბინა 2016 წელს შევსებულ ქონებრვი დეკლარაციაში წერია.
გახარიას 2017 წელს შევსებულ დეკლარაციაში, ასევე აღარ წერია მამის, ზაურ გახარიას საკუთრებაშია არსებული ქონებაც, კერძოდ, 14 კვ. მეტრი ფართობის არასაცხოვრებელი ფართი თბილისში, ამაღლების ქუჩაზე; ასევე სიღნაღის რაიონის, სოფელ ხორნაბუჯში მდებარე 280 000 კვ.მეტრის ფართობი და წავკისში მდებარე 1 600 კვ. მეტრი ფართობის მიწის ნაკვეთები.
