ბელარუსის დედაქალაქში საგანგებოდ დაეშვა ავიაკომპანია Ryanair-ის თვითმფრინავი, რომელიც ათენიდან ვილნიუსში მიფრინავდა. ამის შესახებ ინფორმაციას BBC ავრცელებს.
გამოცემის ინფორმაციით, ბორტზე ოპოზიციურად განწყობილი ჟურნალისტი, ტელეფრამ-არხის Nexta ყოფილი მთავარი რედაქტორი რომან პროტასევიჩი იმყოფებოდა. დაშვების შემდეგ ჟურნალისტი დააკავეს. ბორტზე მოხვედრამდე პროტასევიჩი იუწყებოდა, რომ აეროპორტში მას უთვალთვალებდნენ
მინსკის აეროპორტში განაცხადეს, რომ თვითმფრინავი ბორტზე არსებული ბომბის შესახებ შეტყობინების გამო დასვეს, დაჯდომის ნებართვა კი მფრინავებმა თავად მოითხოვეს. ბელარუსის პრეზიდენტთან, ალექსანდრ ლუკაშენკოს დაახლოებულმა ტელეგრამ-არხმა კი გამოაქვეყნა პოსტი სათაურით „ბელარუსმა ევროპა დაიცვა“.
„დოიჩე ველე“-ს ინფორმაციით, ჟურნალისტმა რომან პროტასევიჩმა თვითმფრინავის მგზავრებს განუცხადა, რომ მას ბელარუსში სიკვდილით დასჯა ელოდა
ათენი-ვილნიუსის რეისის მგზავრების განცხადებით, მას შემდეგ რაც თვითმფრინავმა მოულოდნელად გეზი შეიცვალა, ბორტზე მყოფი ერთი ბიჭი ძალიან აღელდა.
„თვითმფრინავის მოულოდნელი შემობრუნების შემდეგ, ერთმა ბიჭმა [პროტასევიჩმა] პანიკა დაიწყო. მისი ბარგი ასაფრენ ბილიკზე გადაყარეს და ის გვერდით გაიყვანეს. ჩვენ მას ვკითხეთ, რა ხდებოდა, მან გვითხრა ვინ იყო და დაამატა: ”აქ სიკვდილით დასჯა მელოდება. ის კანკალებდა,“– განაცხადეს მგზავრებმა მედიასთან საუბარში.
მათი თქმით, თვითმფრინავის შებრუნებამდე ბორტზე არანაირი კონფლიქტი არ მომხდარა. ერთ-ერთმა მგზავრმა „რადიო თავისუფლებას“ განუცხადა, რომ თვითმფრინავის მინსკში დაჯდომის შემდეგ მგზავრები იქიდან გადაიყვანეს, მათი ნივთები კი ძაღლებს შეამოწმებინეს.
აშშ, გერმანიის, ლატვიის, ლიეტუვის, დიდი ბრიტანეთის მთავრობების წარმომადგენლებმა ბელარუსის მთავრობის ქმედება დაგმეს და ჟურნალისტის დაუყოვნებლივი გათავისუფლება მოითხოვეს.
