პოლიტიკის ექსპერტი, სოსო ცინცაძე სალომე ზურაბიშვილს, რომელიც, შესაძლოა, მმართველი გუნდის საპრეზიდენტო კანდიდატი გახდეს, ნეგატიურად აფასებს. მისი თქმით, ზურაბიშვილს ქართული საზოგადოებისთვის თავი არაფრით დაუმახსოვრებია, ამიტომ ის დადებით შეფასებას არ იმსახურებს.
პოლიტოლოგი, 10 ოპოზიციური პარტიის მიერ დასახელებულ საპრეზიდენტო კანდიდატს, გრიგოლ ვაშაძეს უფრო იწონებს, ვიდრე სალომე ზურაბიშვილის კანდიდატურას.
,,სალომე ზურაბიშვილი ისე არის დამოუკიდებელი, როგორც ვარ დალაი-ლამა. დამოუკიდებლობის მას არაფერი სცხია. სალომე ზურაბიშვილმა როგორ გაიმარჯვა მთაწმინდის ოლქში, ესეც საკითხავია. ამ ქალს ისტორიული მოგონებების გარდა, არაფერი აკავშირებს საქართველოსთან.
მან პირდაპირ აღა-მაჰმად-ხანივით გადაუარა საგარეო საქმეთა სამინისტროს. ჩოხებით რომ გამოჰყავდა ჩვენი ელჩები დაგავიწყდათ? თითქოს სუხიშვილების მოცეკვავეები იყვნენ. რითი დაამახსოვრა თავი ზურაბიშვილმა საკუთარ ქვეყანას? რა დამსახურებით? გარდა იმისა, რომ მისი მინისტრობის წლებს დარაჯიც კი კოშმარად იგონებს.
გრიგოლ ვაშაძე გაცილებით სოლიდურად გამოიყურება, ვიდრე ზურაბიშვილი, მაგრამ არასოლიდურად გამოიყურება ის 10 პარტია, რომელთა მარგი ქმედების კოეფიციენტი არაშთამბეჭდავია. ამავე დროს ორ წამყვან ოპოზიციურ პარტიას ჯერ არ დაუსახელებია საკუთარი კანდიდატი.
თუ საპენსიო ასაკში არ ხარ და იმას არ ფიქრობ, რომ მემუარები წერო, პრეზიდენტის თანამდებობაზე კანჭი არ უნდა იყარო. პოლიტიკოსისთვის ცოტა შეურაცხმყოფელიც კი არის ეს თანამდებობა“, _ განაცხადა ცინცაძემ.
ცნობისთვის, 10-მა ოპოზიციურმა პარტიამ საპრეზიდენტო კანდიდატად ,,ნაციონალური მოძრაობის“ პოლიტიკური საბჭოს წევრი, გრიგოლ ვაშაძე წარადგინა. ამ დრომდე კანდიდატი დასახელებული არ ჰყავს ,,ქართულ ოცნებას“. გავრცელებული ინფორმაციის თანახმად, მმართველი გუნდი კანდიდატს არ დაასახელებს და მხარს დაუჭერს პარლამენტის დამოუკიდებელ დეპუტატ სალომე ზურაბიშვილს.
