ქართველი ფეხბურთელი გოგონები _ თათია გაბუნია და თეონა ბაქრაძე თურქეთში მომხდარ მიწისძვრას სასწაულებრივ გადაურჩნენ.
ორივე ფეხბურთელი ქალაქ დიარბაქირში, ერთ-ერთ სასტუმროში იმყოფებოდა. მიწისძვრის დროს სასტუმროს შენობა დაიბზარა, თუმცა მძიმე რყევებს გადაურჩა.
გოგონების საქართველოში ჩამოყვანა ავთანდილ ხუჯაძემ ითავა, რომელიც მიწისძვრის დროს ერაყში იმყოფებოდა.
ფეისბუქის მომხმარებელი მაია დოლიძე–ბედინეიშვილი პოსტს აქვეყნებს და ავთანდილ ხუჯაძეს გმირს უწოდებს:
“ჩვენი დროის ქართველი გმირი ავთანდილ ხუჯაძე. ის ერაყში იმყოფებოდა, რომელმაც როგორც კი გაიგო ფეხბურთელი გოგოების ამბავი, მაშინვე წავიდა მათ გადასარჩენად. სამი საათი იმყოფებოდა გზაში. გზა იყო თოვლისგან მოყინული. ყველაფერი გააკეთა, რომ ეს გოგოები დაებრუნებინა სამშობლოში უვნებელი. თავის თავზე არც კი უფიქრია, ისეთი მძიმე გზა გა,ვლო და მივიდა დანიშნულების ადგილას. ორივე მათგანი ჩაიყვანა დანიშნულების ადგილას და ჩაახუტა შვილი დედას“, _ წერს მაია დოლიძე-ბედინეიშვილი.
„დიახ, Avtandil Xujadze _ ეს ადამიანი ნამდვილად გმირია, მისი წყალობით ჩავიხუტე ჩემი გოგონები _ თათია და თეონა გულში საღსალამათი, სიტყვები უძლურია იმ მადლიერების გამოსახატად, რასაც განვიცდი, მადლობა მაია დოლიძე–ბედინეიშვილი შენ ყველაფრისათვის, შენი ყველა სიტყვა მაძლიერებდა და იმედს მაძლევდა…
მადლობა ყველა იმ ადამიანს ვინც გვერდში მედგა სიტყვით თუ საქმით, მაინც რა ბევრნი ყოფილხართ…
მინდა დიდი მადლობა გადავუხადო საქართველოს ფეხბურთის ფედერაციას, David Mujiri და Dato Gogoladze ბავშვებისთვის გაწეული დახმარებისთვის. ასევე მადლობა მინდა გადავუხადო Amedspor Kadın Takımları–ის კლუბის ხელმძღვანელობას მათზე ზრუნვისთვის. კიდევ ერთხელ დიდი მადლობა ყველას!!!“ _ წერს სოციალურ ქსელში თათია გაბუნიას დედა, შორენა კაჭარავა.
“გურია ნიუსი“ თათია გაბუნიას დედას, შორენა კაჭარავას დაუკავშირდა:
“დეტალებზე ამ წუთებში ვერ ვისაუბრებ, რადგან შვილთან ჯერ კარგად არც მილაპარაკია. მან მოახერხა სოციალური ქსელით დაგვკონტაქტებოდა _ თათია შველას ითხოვდა.
მადლობა ღმერთს, ამ ქვეყანაში კიდევ არსებობენ გმირი ადამიანები, რომლეიბიც ძალიან დაგვეხმარნენ.
ამჟამად თათია და მისი მეგობარი _ თეონა ბაქრაძე თურქულ საფეხბურთო კლუბში თამაშობენ. საბედნიეროდ, ის შენობა, სადაც ისინი იყვნენ, მიწისძვრის დროს არ დანგრეულა, გარშემო კი ყველაფერი მიწასთან იყო გასწორებულ _. სასწაულებრივ გადარჩნენ.
ავთანდილ ხუჯაძე არის ნამდვილი გმირი და მადლობა მას“, _ გვითხრა შორენა კაჭარავამ.
ავტორი
