სოფელ კონჭკათში, იური ჭუმბურიძის ოჯახი დახმარებას ითხოვს. ოჯახს მიცვალებული უფუჭდება, _ ამ შინაარსის წერილი “გურია ნიუსმა” ცოტა ხნის წინ მიიღო.
დახმარება არაფერი არ მინდა, არც ფული მინდა, არც არაფერი, მიცვალებული მილპება სახლში. არავინ არ გვაქცევს ყურადღებას საერთოდ. არც კუბო გვაქვს სახლში. ფული გვაქვს, მაგრამ ვერ მოგვაქვს. ერთი ტრაქტორი ვერ იპოვა ოზურგეთის მერიამ, რომ შეაგდონ შიგნით მაცივარი და ამოგვიტანონ და მიცვალებული ჩამასვენებინონ. მერიიდან 6 კილომეტრია, მეტი კი არა. გზა გაგვიწმინდონ რა იქნება. მიცვალებული 4 დღეა სახლში გვყავს”, _ ამბობს გარდაცვლილის ოჯახის წევრი.
“გურია ნიუსი დაუკავშირდა სოფელ კონჭკათში მერის წარმომადგენელს. დავით თოიძის თქმით, ადგილობრივი ხელისუფლება ჩართულია პრობლემის მოგვარებაში და მიცვალებულისთვის მაცივრის მოტანა მალე მოხდება.
„ძალიან რთული ვითარება იყო და ბოლომდე ვერ მოხერხდა გზის გაწმენდა, სამხიდიანი მანქანით შევძელით ადგილზე მისვლა. ჩართულები ვართ პრობლემის მოგვარებაში, მიცვალებულისთვის მაცივარის მოტანაც მოხდება და რაც საჭირო იქნება ამ სიტუაციისთვის, ყველანაირად გავუწევთ დახმარებას ამ ოჯახს“, _ გვითხრა დავით თოიძემ.
