მიუხედავად იმისა, რომ ბოლო რამდენიმე წელია, ლანჩხუთის მუნიციპალიტეტის მასშტაბით, ინფრასტრუქტურული სამუშაოების გახორციელების მიზნით, სოლიდური თანხები იხარჯება და არა ერთი პროექტი ხორციელდება ამ კუთხით, მოსახლეობის ნაწილი მაინც უკმაყოფილოა და პროტესტს გამოთქვამს.
უკმაყოფილო მოსახლეობა მთავარ აქცენტს უხარისხო და ნაწილობრივად შესრულებულ სამუშაოებზე აკეთებს. ამის დასტურია ქალაქის ტერიტორიაზე, ებრალიძეების ქუჩებს შორის, ყოფილი სამჭედლოს უკან მდებარე სანიაღვრე არხი, რომლის გაუმართაობის გამო, ადგილობრივებს პრობლემები ექმნებათ, განსაკუთრებით, წვიმიან ამინდში.
მოსახლეობის თქმით, არხი სანახევროდაა გაკეთებული და ისიც, მათივე ძალისხმევით. თუმცა, იმის გამო, რომ წყალს გასასვლელი არ აქვს, გუბდება და ახლომდებარე მცხოვრებლების ეზოებს აჭაობებს.
“ეს, რაც გაკეთებულია, მეზობლად, აღმაშენებლის ქუჩაზე სანიაღვრე არხის მოწყობისას მორჩათ და იმით გააკეთეს. წყალი რომ გავიდეს და ეზოები არ დაგვეტბოროს, მთელი არხია გასაწმენდი და გასაკეთებელი. ეზოებში არ შეისვლება, ისეთი ამბავია _ “ბოტების” გარეშე ვერ გაივლი. სამწუხაროდ, მხოლოდ არჩევნების პერიოდში ახსენდებათ ჩვენს ხელისუფალთ ადამიანების არსებობა, აბა, სხვა დროს წყალსაც წაუღიხართო.
რადგან ხელისუფლებას მარტო არჩევნების წინ ვახსოვართ და ჩვენი ბევრი თხოვნა უყურადღებოდაა დარჩენილი, საქმე დაპირებას იქით არ წასულა, იძულებულები ვიქნებით, პრობლემა რომ მოგვარდეს, პროტესტის უკიდურეს ფორმას მივმართოთ და გზა გადავაკეთოთ”, _ ამბობს მოსახლეობა.
“გურია ნიუსი” ზემოთ ნახსენებ ორ ქუჩას შორის არსებული არხის პრობლემასთან დაკავშირებით ლანჩხუთის მერიას დაუკავშირდა _ მერიის პრესასთან ურთიერთობის განყოფილების ხელმძღვანელმა მაკა სულაბერიძემ გვითხრა, რომ საკითხთან დაკავშირებით მოსახლეობის მხრიდან მერიაში არანაირი სახის მოთხოვნა არ შესულა.
“ამ პრობლემაზე მერიისთვის მოსახლეობას რომ მოემართოს, ასეთი რამ არ ყოფილა. ახლა ვაცნობე ამ საკითხთან დაკავშირებით შესაბამისი სამსახურის სპეციალისტებს, მივლენ ადგილზე, შეისწავლიან მდგომარეობას და სათანადოდ იმოქმედებენ”, _ გვითხრა მერიის პრესასთან ურთიერთობის განყოფილების ხელმძღვანელმა.
