“ერთიან ნაციონალურ მოძრაობას” ახალი თავმჯდომარე ჰყავს _ ნიკა მელია ლევან ხაბეიშვილმა ჩაანაცვლა. მან პარტიაში ჩატარებულ არჩევნებში ხმების 52.58% მიიღო.
ხაბეიშვილის პარტიის სათავეში მოსვლას გუნდში ცვლილებაც დაუყოვნებლივ მოყვა. პოლიტსაბჭოს თავმჯდომარის პოსტი კობა ნაყოფიამ დატოვა:
“ვტოვებ “ნაციონალური მოძრაობის” პოლიტსაბჭოს თავმჯდომარის პოსტს და ვტოვებ პოლიტსაბჭოს. ვრჩები რიგით წევრად, ვიდრე მიხეილ სააკაშვილი იქნება პუტინის პირადი პატიმარი, ვიდრე მიხეილ სააკაშვილს არ გადაიყვანენ საზღვარგარეთ სამკურნალოდ, რაც ერთადერთი გამოსავალია მისი სიცოცხლის გადასარჩენად”, _ განაცხადა ნაყოფიამ.
ნაყოფიას თქმით, მოგვიანებით მიიღებს გადაწყვეტილებას, დატოვებს თუ არა პარტიას:
“შემდეგ მივიღებ გადაწყვეტილებას, დავრჩები თუ არა პარტიაში, შემდეგ მივიღებ სხვა გადაწყვეტილებებს, როდესაც სააკაშვილი იქნება თავისუფლებაზე და მასთან შემეძლება კომუნიკაცია. მძიმე არჩევნები იყო და მე, როგორც კომისიის თავმჯდომარემ, შევძელი და ყველა გადაწყვეტილება კომისიის შიგნით მივიღეთ კონსესუსით, ორჯერ ჩატარდა კენჭისყრა კომისიის მუშაობის დროს. სხვა საკითხებზე არ ჩაგვიტარებია, იმდენად შეთანხმებულად ვმუშაობდით კამათის მიუხედავად. პროცესი იყო გამჭვირვალე, არავინ ჩარეულა და არანაირი მანიპულაცია არ ყოფილა, გაიმარჯვა იმ კანდიდატმა, ვინც დააგროვა ხმების უმრავლესობა. მე სულ ვამბობდი, რომ შედეგები უნდა აღიარებულიყო, რადგან ვხედავდი, რომ არანაირი მანიპულაცია არ მომხდარა. საზოგადოებას ვანახეთ, როგორ უნდა ტარდებოდეს არჩევნები. მოხარული ვიქნები, ასე თუ ჩატარდება საპარლამენტო თუ სხვა არჩევნები”, _ განაცხადა ნაყოფიამ.
მელიას გუნდის წევრის, ნუგზარ წიკლაურის განცხადებით, “ერთიანმა ნაციონალურმა მოძრაობამ” დაამტკიცა, რომ მას აქვს მჭიდრო კონტაქტი თავის ამომრჩეველთან და არასოდეს არ დაკარგავს ამ კონტაქტს. ამავდროულად, კი მიაჩნია, რომ პარტიამ დღევანდელი გადაწყვეტილებით ნაბიჯი უკან გადადგა:
“დღევანდელი გადაწყვეტილება ნიშნავს, რომ ფულმა და არაფორმალურმა გავლენებმა დღეს ამ პარტიაში გაიმარჯვეს პოლიტიკასა და პოლიტიკურ იდეალებზე. ამავე დროს, ვიდრე მიხეილ სააკაშვილი არის ციხეში, მიმაჩნია, რომ ერთადერთი სწორი გადაწყვეტილება იქნება ამ პარტიის წევრობა. პირადად ჩემთვის, ისევე როგორც ბევრი ჩემი მეგობრისთვის, პოლიტიკური მიზნები დღევანდელ პოლიტიკურ ეტაპზე რჩება უცვლელი. ეს არის მიხეილ სააკაშვილის თავისუფლება და რუსული რეჟიმის დამარცხება საქართველოში. ვრჩები პარტიაში, არ ვეთანხმები ახალარჩეული მმართველობის კურსს, არც იმ გამონათქვამებს, რაც წინასაარჩევნო პერიოდში გვესმოდა და გავუწევ ოპონირებას დემოკრატიული წესით. ასევე, არანაირი მონაწილეობა არ მექნება იმ მენეჯმენტში, რომელიც იქნება ჩამოყალიბებული არაფორმალური გავლენების შედეგად შექმნილი მმართველობის მიერ”, _ აღნიშნა ნუგზარ წიკლაურმა.
ხაბეიშვილის არჩევა მმართველი გუნდის მხრიდან სოციალურ ქსელში ღლიცინის საგანი გახდა. ცნობისთვის, სოცქსელებში ხაბეიშვილის ჯამბაზის ფორმაში გამოწყობილი ფოტო გავრცელდა.
ჩვენთან საუბრისას მმართველი პარტიის გუნდის განწყობა არც ფრაქცია “ქართული ოცნება-დემოკრატიული საქართველო” თავმჯდომარემ ჩოხატაურში, ლაშა თოლორდავამ დამალა და განაცხადა რომ “ნაციონალურმა მოძრაობამ” არჩევნების ჩატარებით თავი ქვეყნის სასაცილოდ აიგდო, თავმჯდომარედ კი ქვეყნის ყველაზე დიდი მასხარა აირჩია:
“მთელმა ქვეყანამ ნახა მაგათი საქციელი. ერთმანეთს ჩაუტარეს არჩევნები და ქვეყნის სასაცილოდ აიგდეს თავი. რბილად რომ ვთქვათ, “კლოუნი” აირჩიეს, ყველაზე დიდი მასხარა, ალბათ, ჩვენს ქვეყანაში _ ბატონი ლევან ხაბეიშვილი. მიიღებენ იმას, რასაც იმსახურებენ და სულ მალე დაინახავს ამას ყველა”, _ ამბობს თოლორდავა.
ჩვენ დავუკავშირდით, “ქართული ოცნების” თავმჯდომარეს ლანჩხუთში და მერს, ალექსანდრე სარიშვილს, თუმცა, მან კომენტარის გაკეთებაზე უარი თქვა:
“მოსახლეობასთან ვარ ახლა შეხვედრაზე და არ გავაკეთებ კომენტარს ამ შემთხვევაში”, _ გვითხრა სარიშვილმა.
ოზურგეთის საკრებულოს წევრმა “ქართული ოცნებიდან” მარიკა ჩხიკვიშვილმა სოციალური ქსელის გვერდზე არაერთი მხიარული პოსტი გააზიარა და ხაბეიშვილი “ცირკაჩს” შეადარა. მის პოსტს ჩვენ უცვლელად გთავაზობთ:
“ცირკაჩი.
ნეტა, ნაციონალური მოძრაობის მხარდამჭერები თუ ხვდებიან, რა დაემართათ!
ხაბეიშვილი რომ შეგრჩება პარტიის თავმჯდომარე.
“ნაციონალური მოძრაობის” სახე ოზურგეთში თათია ნიკოლაიშვილი რომ იქნება მართლა სანამდე არიან.
ვუსამძიმრებ დავით მჟავანაძეს. ამისთვის იწვალე ამდენი წელი თათია ნიკოლაიშვილის გამოსაგდები დარჩენილიყავი პარტიიდან?”
ცნობისთვის _ არც თუ ისე დიდი ხნის წინ თათია ნიკოლაიშვილმა რაიონული ორგანიზაცია სუსტ მუშაობაში ამხილა. მას შემდეგ გავრცელდა ინფორმაცია, რომ ხაბეიშვილის გამარჯვების შემთხვევაში, მჟავანაძეს ოზურგეთში ნიკოლაშვილი ჩაანაცვლებდა.
თუ რა მოხდება რეალურად, ამას უახლოესი მომავალი გვიჩვენებს, ენმ-ს ოზურგეთის რაიონული ორგანიზაციის თავმჯდომარე, დავით მჟავანაძე კი ჩვენ კითხვას პასუხობს:
_ როგორც ამბობენ, ენმ-ის ოზურგეთის რაიონული ორგანიზაციის თავმჯდომარის პოსტზე, თქვენ თათია ნიკოლაშვილი ჩაგანაცვლებთ. რამდენად შეეფერება ეს სინამდვილეს?
_ ჯერჯერობით, მე ვარ თავმჯდომარე. ეს კი თქვენგან მესმის პირველად, _ თქვა მჟავანაძემ.
რაც შეეხება პარტიაში ჩატარებულ არჩევნებს, მჟავანაძე ამბობს, რომ პარტიამ მნიშვნელოვანი ეტაპი გაიარა და ახლა სააკაშვილის პუტინის ტყვეობიდან გამოსახსნელად უნდა გაერთიანდნენ:
_ ჩვენმა პარტიამ მნიშვნელოვანი ეტაპი გაიარა. ეს არის დემოკრატიული პროცესი, რაც ჩვეულებრივი მოვლენაა არჩევნების დროს. გაიმარჯვა ლევან ხაბეიშვილმა და ვულოცავ მას ამ გამარჯვებას. რა თქმა უნდა, პარტია იქნება ერთიანი და ახლა უნდა გააქტიურდეს, რათა მიხეილ სააკაშვილი გამოიხსნას პუტინის ტყვეობიდან, _ ამბობს მჟავანაძე.
რეჟიმის დამარცხების აუცილებლობაზე საუბრობს ჩვენთან ფრაქცია “ერთიანი ნაციონალური მოძრაობის” თავმჯდომარე ლანჩხუთში, კახა ასკურავაც:
“აუცილებლად მიმაჩნდა ამ არჩევნების ჩატარება. ვიყავი ლევან ხაბეიშვილის კანდიდატურის ღია მხარდამჭერი. მიმაჩნია, რომ პროცესი ძალიან საინტერესოა _ ამას თავად ციფრები მეტყველებს. 50 000 დარეგისტრირებული კაცი და ძალიან მაღალი აქტივობა ემიგრანტების, ვისაც ეჩქარებათ ცვლილებები ერთიან ნაციონალურ მოძრაობაში და ასევე ქვეყანაში.
ვულოცავ ბატონ ლევანს. უდიდესი პასუხისმგებლობაა და მეორე მხარეს, ვინც არჩევნებში დამარცხდა, ვუწვდით თანამშრომლობის ხელს. ყველამ ერთად უნდა დავამარცხოთ რეჟიმი. ეს იქნება ნამდვილი გამარჯვება. ეს იყო მოგება”, _ ამბობს კახა ასკურავა.
ლანჩხუთის საკრებულოს წევრი “ლელოდან” გოჩა ჯანაშია მიიჩნევს, რომ ხაბეიშვილს ქარიზმა გააჩნია, მაგრამ არაა ის წონადი ფიგურა, რომელიც “ნაცებს” სჭირდებათ:
“პირველ რიგში, უშუალოდ არჩევნებთან დაკავშირებით ვიტყვი იმას, რომ ნებისმიერ პარტიაში რაღაც ცვლილება ყოველთვის საჭიროა და ცუდს ვერაფერს ვერ ვიტყვი, მაგრამ უშუალოდ ამ შემთხვევაში, საკმაოდ ბინძური თამაშები იყო. თვითონ პროცესი წარიმართა რთულ ვითარებაში. ორივე მხარემ გამოავლინა ერთმანეთის მიმართ უპატივცემულობა. ამან პროცესს გარკვეული დაღი დაასვა.
რაც შეეხება ხაბეიშვილს. ყველამ კარგად ვიცით, რომ “ნაციონალური მოძრაობა” ასოცირდება მიხეილ სააკაშვილთან, ელექტორატის სწორედ მისი ამომრჩეველია და აქედან გამომდინარე, მიმაჩნია რომ აქცენტი გაკეთდა ქარიზმატიკაზე, რაც თითქოს ამ ეტაპზე სჭირდება პარტიას, რომ გამოაცოცხლოს არსებული სიტუაცია და ამ მხრივ შეირჩა ფიგურა, რომელიც წონადი არ არის, მაგრამ ქუჩის ქარიზმატიკას ერგება. თუმცა, რა ძალებიც მის უკან დგას, გვაფიქრებინებს, რომ ის არ იქნება წონადი ფიგურა, რომელიც სჭირდება ამ პარტიას”, _ ამბობს გოჩა ჯანაშია ჩვენთან საუბრისას.
ფრაქცია “ჩოხატაური საქართველოსთვის” თავმჯდომარე გოგი ბოლქვაძე “ნაციონალური მოძრაობისა” და “ქართული ოცნების” შეთანხმებულ მუშაობაზე საუბრობს და ენმ-ს პარტიაში ჩატარებული არჩევნების შეფასების თხოვნისას, ასეთ კომენტარს აკეთებს:
“ვფიქრობ, ეს საარჩევნო პროცესი, თავისი შედეგით, როგორც 2021 წლის თვითმმართველობის არჩევნებზე, სააკაშვილის ჩამოყვანა, იყო შეთანხმებული “ოცნებასთან”. შესაბამისად, მიმაჩნია, რომ ამ არჩევნებშიც გაიმარჯვა ბიძინა ივანიშვილმა. წლებია, ასე შეხმატკბილებული ეს ორი ორგანიზაცია ყველა არჩევნებზე ერთმანეთს ავსებს”.
მსგავს პოზიციას იზიარებს გახარიას პარტიის წევრი ლანჩხუთში, ჯუმბერ ბლაგიძეც:
“ორივე ერთმანეთთან შეწყობილად მოქმედებდნენ და მოქმედებენ დღემდე. ამას ყველაზე კარგად ქართველი ხალხი ხედავს. “ნაციონალებიც” და ხელისუფლებაც, პასუხისმგებლობას გაურბიან და თუ რამე ხდება, ერთმანეთს აბრალებენ. ესაა ძალიან ცუდი”, _ გვითხრა ბლაგიძემ.
თავად ლევან ხაბეიშვილი აცხადებს, რომ დღეიდან “ნაციონალური მოძრაობა” ახალი შემართებით იწყებს რთულ, მაგრამ უწყვეტ ბრძოლას და მისი პარტია ღია იქნება ყველა ახალი ადამიანისთვის.
გარდა ამისა, ხაბეიშვილმა პარტიის ოფისში გამართულ ბრიფინგზე განაცხადა, ისიც რომ დღეიდან იწყება პროცესი, რომელიც ქვეყანას სამშვიდობოს გაიყვანს.
“მიშა (სააკაშვილი)! მინდა შეგპირდე, რომ არ გავჩერდებით, სანამ შენი სიცოცხლე და ჯანმრთელობა არ იქნება უზრუნველყოფილი”, _ მიმართა ხაბეიშვილმა სააკაშვილს.
ავტორი
