შემოდგომის მიწურულის და დეკემბრის დასაწყისის პერიოდს, თებერვლის დასაწყისამდე, მეურნეები “მკვდარ სეზონს” ეძახიან.
თუმცა, ამ დროის განმავლობაში უამრავი საქმის გაკეთება შეიძლება, თანმიმდევრობის გათვალისწინებით.
ჯერ კიდევ გვიანი არ არის ცერცვის, ოხრახუშის, ბოლოკის, მწვანე ხახვის და წიწმატის დათესვა. რაც შეეხება ქინძს, შესაძლებელია დავთესოთ, ოღონდ ღია გრუნტში. კვალსათბურს გადავაფაროთ პოლიეთილენი.
ცერცვს მწკრივებში დააფარეთ ფარჩხი, რომელსაც ამოსვლის შემდეგ, წამოაყენებთ და ჩაურჭობთ ძირებთან.
ასევე, კარგად ამოსული და ზრდასრული მწვანილეული, ქინძი, ოხრახუში და ნიახური, სასურველია დახუროთ პოლიეთილენით. მართალია, მათ ყინვა ვერ ვნებს, მაგრამ დახურულ მდგომარეობაში ფოთოლი ვეგეტაციას აგრძელებს და დიდხანს გექნებათ საუკეთესო მდგომარეობაში მყოფი მწვანილეული.
კარგ ამინდებში, დაუყოვნებლივ დაიწყეთ ბაღჩა-ბაღების მოფოცხვა და ლოკალურად შეუდექით ქარსაფარი ზოლების გაშენებას თქვენი ნაკვეთების ირგვლივ, სადაც ამის საჭიროებააა.
უკანასკნელ წლებში, ქარსაფარი ზოლების მასობრივმა აჩეხვამ ძალზე ცუდი შედეგი გამოიღო.
რაკი ახლა შეუძლებელია ცენტრალური სივრცეების ქარის დამცავი მცენარეებით ისევ შევსება ერძო საკუთრებაში გადასული არაერთი ფართობის გამო; ამიტომ, ყველა მეურნემ უნდა გათვალოს სად და როგორი ქარსაფარი სჭირდება მის ნაკვეთს.
გურიაში ქარსაფარი ზოლის გასაშენებლად საუკეთესო საშუალებაა წაბლის და კაკლის ნარგავები, ასევე, ტირიფის, თხმელის, აკაციის ნერგები.
იქ, სადაც მიწის ნაკვეთი მშრალია და არც მორწყვა ხერხდება, სასურველია დარგოთ ნიგოზი, წაბლი; ასევე, აკაცია.
თუ ნერგების გამოყვანის ან შეძენის საშუალება გააჩნია მეურნეს, რა თქმა უნდა, ნაყოფიერი მცენარეების ქარსაფრად გამოყენება უმჯობესია. დროთა განმავლობაში ისარგებლებთ, როგორც მერქნით, ისე ნაყოფით. თუ არა, ზემოთ აღნიშნული სახეობები გამოიყენეთ.
შედარებით სველმიწიან ადგილებში, დასარგავად გამოიყენეთ თხმელა და ტირიფი.
ზამთრის პერიოდში ადვილია დაფნის გამრავლება და გახარება. ეს მცენარე თანდათან იბრუნებს ძველ პოპულარობას და ამავდროულად კარგი საშუალებაა ქარსაფარი ზოლის შესაქმნელად. ოღონდ, ნერგები, რომელსაც ახლა დავრგავთ, გაზაფხულზე უნდა იყოს დაკალმებული. შესაძლებელია პირდაპირ, ტოტის ჩარჭობითაც გახარება. თუმცა კალმების მეთოდი გარანტირებულია.
ზამთრის თბილ დღეებში სასურველია დასხეპოთ ხეხილოვანთა ზედმეტი წვრილი ტოტები, რომელიც ბევრგან გაბურდული სიხშირით არის ხეებზე, განსაკუთრებით, გურიაში.
ხეხილოვნების თუ ბუჩქოვანი ნაყოფიერი მცენარეების დარგვა სასურველია დაიწყოთ ახლავე. მზიან, მშრალ ამინდში. თუ ნერგი ახლა არ გაქვთ, დაიწყეთ ორმოების მომზადება საგაზაფხულოდ. ამოიღეთ ორი ბარის პირის ზომით, ჩაყარეთ ნაკელი, ნაცარი, ნეშომპალა. გჯეროდეთ, რომ, ასე გაცილებით წაადგება ის მცენარეს (ნერგს), ვიდრე გაზაფხულზე ამოღებულ ორმოში, ახლად ჩაყრილი იგივე ორგანული და არაორგანული სასუქი.
ასეთივე ორმოებს წინასწარ თუ მოამზადებთ აგრარული კულტურებისთვის გაზაფხულზე დასათესად (კვახი, ყაბაყი, კიტრი, ლობიო), გაცილებით უკეთეს მოსავალს მიიღებთ მომდევნო წელს.
