საარჩევნო კოდექსში შესატანი ცვლილებების მიხედვით, ადგილობრივი თვითმმართველობის არჩევნების თარიღი კანონმდებლობით იქნება განსაზღვრული და მუნიციპალიტეტის წარმომადგენლობითი ორგანოს მორიგი არჩევნები წლის ოქტომბრის პირველ შაბათს ჩატარდება _ ამის თაობაზე განცხადება განათლებისა და მეცნიერების კომიტეტის თავმჯდომარემ, შალვა პაპუაშვილმა პლენარულ სხდომაზე საარჩევნო კოდექსში შესატანი ცვლილებების მეორე მოსმენით განხილვის დროს გააკეთა.
ამ გასახორციელებელი ცვლილებების შესაბამისად, 2021 წლის თვითმმართველობის არჩევნების ჩატარებას ორი ოქტომბრისთვის უნდა ველოდოთ.
ამასობაში კი ირკვევა, რომ მმართველი ძალა დროს არ კარგავს და თვითმმართველობის არჩევნებისთვის მზადება უკვე დაწყებული აქვს. მერობისა და მაჟორიტარობის კანდიდატებთან დაკავშირებით კონსულტაციები გადამწყვეტ ფაზაშია, რიგ შემთხვევებში, ვარიანტები უკვე შეჯერებულიცაა.
ბუნებრივია, ადგილობრივი თვითმმართველობის თემატიკა, ლანჩხუთშიც ძალიან აქტუალურია, კულუარებში გარკვეული შიდა დინებები და მითქმა-მოთქმა უკვე დაწყებულია და მოსალოდნელ კანდიდატთა ვინაობებზე, სხვადასხვა ვერსია ვრცელდება.
ერთ-ერთი ინფორმაციით, სახელისუფლებო პარტიაში ლანჩხუთის მერობის კანდიდატობისთვის რამდენიმე ვერსია განიხილება, თუმცა, ფავორიტად გურიაში მმართველ ელიტასთან დაახლოებული ბიზნესმენი, ვინმე დავით მჟავანაძე სახელდება, რომელიც წარმოშობით სოფელ აკეთიდანაა და დედაქალაქში საქმიანობს.
ჩვენი ინფორმაციით, იგი გურიის მაჟორიტარ დეპუტატთან, ვასილ ჩიგოგიძესთან დაახლოებული პირია. სხვა რაიმე დამსახურების შესახებ ცნობები არ ვრცელდება.
მერის კანდიდატთან დაკავშირებით სხვა ვარიანტებიც განიხილება და მათ შორის, გამორიცხული არაა, რომ ამჟამინდელ მერს ალექსანდრე სარიშვილს ისევ გამოუცხადონ ნდობა.
ფაქტია, რომ ალექსანდრე სარიშვილის მმართველობის პერიოდში “ქართულ ოცნებას” ლანჩხუთში არჩევნებზე საკმაოდ კარგი შედეგები ჰქონდა და ამ კუთხით, სარიშვილს ჯილდოც კი ეკუთვნის. თუმცა, როგორც ჩანს, მისი პოზიციები მთლად მყარი მაინც ვერაა და ზედიზედ მეორედ მერობის კანდიდატად მისი დასახელება, მმართველი გუნდისთვის კითხვის ნიშნის ქვეშ დგას. ერთ-ერთი ვერსიით სარიშვილი აღმასრულებელი რგოლიდან ადგილობრივ საკანონმდებლო ორგანოში გადაინაცვლებს და დიდი ალბათობით, საკრებულოს თავმჯდომარის პოსტსაც ჩაიბარებს.
რაც შეეხება საკრებულოს მოქმედი თავმჯდომარის, ბესიკ ტაბიძის (რომელსაც საპარლამენტო არჩევნებზე ლანჩხუთის საარჩევნო შტაბი ჩააბარეს) შანსებს, ეს შანსები, თითქოსდა, შემდგომი კარიერული წინსვლისთვის ერთი-ორად ამაღლდა. მით უმეტეს, რომ არჩევნების შედეგების კუთხით, არც მას დაეწუნებოდა რამე _ იმ ტერიტორიულ ერთეულში, სადაც ტაბიძე ცხოვრობს, შედეგები ყოველთვის შთამბეჭდავია. გავრცელებული ინფორმაციით, მომავალ საკრებულოში მას ერთ-ერთი კომისიის თავმჯდომარეობას ჩააბარებენ. წყარო გვეუბნება, რომ საკრებულოში პოსტების გადანაწილება არჩევნებზე მიღწეულ შედეგებზე მნიშვნელოვნად იქნება დამოკიდებული.
საგულისხმოა, რომ საარჩევნო კოდექსში შესატანი ზემოთ ნახსენები ცვლილებების მიხედვითვე, ლანჩხუთის საკრებულოში, სადაც ახლა 16 ადმინისტრაციული ერთეულიდან 17 მაჟორიტარი დეპუტატია წარმოდგენილი, სულ 10 მაჟორიტარული მანდატი იქნება. ფაქტია, რომ მმართველი ძალის მხრიდან მაჟორიტარობის მსურველი ადამიანების რიცხვი დიდია და გვარიანი ბრძოლაცაა ამ მხრივ გაჩაღებული.
ჩვენი ინფორმაციით, მოქმედი მაჟორიტარებიდან მმართველმა ძალამ ხელახალი ნდობა შეიძლება მხოლოდ რამდენიმე მათგანს გამოუცხადოს. მათ შორისაა, ჩიბათის მაჟორიტარი გიორგი ჩახვაძე, რომელსაც საარჩევნო კოდექსში გასახორციელებელი ცვლილებების მიხედვით, ჩიბათისა და გვიმბალაურის ამომრჩეველთა მხარდაჭერა სჭირდება სტატუსის შესანარჩუნებლად.
როგორც ჩანს, “ოცნებისთვის” სანდო მაჟორიტართა რიგებშია ელისო ჭიჭინაძეც, რომელიც საკრებულოში ლესის ადმინისტრაციულ ერთეულს ორი ვადით წარმოადგენს და მომავალ არჩევნებში გამარჯვების შემთხვევაში, ჯურუყვეთელი ამომრჩევლის ნდობის მანდატითაც ისარგებლებს.
საარჩევნო კოდექსში გასახორციელებელი ცვლილებების მიხედვით, აცანის, აკეთისა და მამათის ადმინისტრაციული ერთეულები ერთ მაჟორიტარულ ოლქად იქნება წარმოდგენილი მომავალ თვითმმართველობის არჩევნებზე და აქ “ოცნებისთვის” უპირობო ფავორიტად აცანის მოქმედი მაჟორიტარი, ემზარ თედორაძეა მიჩნეული.
ერთ მაჟორიტარულ ოლქად ერთიანდება, ასევე, ნიგვზიანისა და ნინოშვილის ადმინისტრაციული ერთეულები, სადაც, როგორც ზემოთ აღვნიშნეთ, საკრებულოს მოქმედ თავმჯდომარეს, ბესიკ ტაბიძეს სახელისუფლებო გუნდში კონკურენტი არ ჰყავს და სწორედ, იგი იბრძოლებს მმართველი ძალიდან მანდატის მოსაპოვებლად.
საკანონმდებლო ცვლილებების მიხედვით, მაჩხვარეთის ადმინისტრაციული ერთეულისა და ქალაქის ორი უბნის _ აგარაკისა და ლაშისღელის ამომრჩეველს საერთო წარმომადგენელი ეყოლება საკრებულოში. გავრცელებული ინფორმაციით, დიდი ალბათობით, “ოცნების” კანდიდატი ამ მაჟორიტარულ ოლქში კახა კვიტაიშვილი იქნება, რომელიც მოქმედ საკრებულოში ქალაქის ერთ-ერთი მაჟორიტარი დეპუტატის მანდატით სარგებლობს.
რაც შეეხება სუფსის ადმინისტრაციულ ერთეულს, ჩვენი წყაროსვე ინფორმაციით, აქ მმართველი ძალა მაჟორიტარ დეპუტატობის კანდიდატად ბესიკ კუპრაძის კანდიდატურას განიხილავს. კუპრაძე ამჟამინდელ საკრებულოში პარტიული სიით არის გასული და იგი “ოცნების” ფრაქციას ხელმძღვანელობს.
ეს ის კანდიდატურებია, რომლებზეც მმართველი ძალა სავარაუდოდ, კვლავაც გააკეთებს აქცენტს, მაგრამ რა ბედი ეწევათ მოქმედი საკრებულოს სხვა მაჟორიტარ დეპუტატებს, ჯერ კიდევ გაურკვეველია. ბუნებრივია, მაჟორიტარული კვოტის შემცირების შედეგად, ზოგიერთის შანსები ძალიან მიზერულია, მაგრამ არიან ისეთებიც, რომლებსაც, შესაძლოა, პარტიულ სიაში მოხვედრის შანსი მიეცეთ.
რაც შეეხება სიას, ის, სავარაუდოდ, საკმაოდ განახლებული იქნება და იქ ოცნებისთვის ბევრი ახალი თუ პოლიტიკაში ძველი სახის გამოჩენაა პროგნოზირებადი, თუმცა, ამ ეტაპზე სიის ფორმირება ფრიად გასაიდუმლოებულ პროცესს წარმოადგენს.
რაც შეეხება ოპოზიციას, აქ სრული გაურკვევლობა სუფევს და ჯერჯერობით, წინასაარჩევნო კამპანიის კონტურებიც კი არ ჩანს ჰორიზონტზე. არის ვარაუდები, რომ მმართველ ძალას, ე. წ. კოალიციური კანდიდატებით შეებრძოლება ოპოზიციური სპექტრი, მაგრამ ეს მხოლოდ ვარაუდია და რა იქნება რეალურად, იმედია, მალე შევიტყობთ.
ავტორი: სოფო წილოსანი
