“მოაგვარეთ ეს პრობლემა და ნუ გვაიძულებთ ქუჩაში გამოსვლას!”

ჩოხატაურის მუნიციპალიტეტში სოფელ იანეულის მოსახლეობა სასაფლაოსთან მისასვლელი  გზის გაკეთებას  ითხოვს.

“მართლა კარგია,  რომ გზები კეთდება და მართლა მიხარია, მაგრამ რამდენიმე წელია იანეულში სასაფლაოსთან მისასვლელი გზის გაკეთებას სრულიად უშედეგოდ ვითხოვთ – იმდენად ცუდი მდგომარეობაა მანქანით კი არა ფეხით გვიჭირს გადაადგილება. მოაგვარეთ ეს პრობლემა და ნუ გვაიძულებთ ქუჩაში გამოსვლას!”_ ასე გამოეხმაურა  სოციალურ ქსელში სოფლის ერთ-ერთი მაცხოვრებელი, ბექა კეკელიძე მერიის გვერდზე გამოქვეყნებულ ერთ-ერთ ინფორმაციას.

როგორც ის ჩვენთან საუბრის დროს ამბობს, ისააკ კეკელიძის ქუჩაზე საკმაოდ რთული მდგომარეობაა და მერიისგან გზის გაკეთების შესახებ დაპირებაც არაერთხელ აქვთ მიღებული, მაგრამ უშედეგოდ. ისედაც დაზიანებული გზა კი რამდენიმე თვის წინ მომხდარმა სტიქიამ კიდევ უფრო დააზიანა.

“საკმაოდ რთული მდგომარეობაა. ამ გზას,  გარდა იმისა, რომ სასაფლაოსთან მიდის,  30-მდე ოჯახი ყოველდღიურად იყენებს. წლებია,  რაც ვითხოვთ გაკეთებას,  და რა თქმა უნდა ადგილობრივმა ხელისუფლებამ პრობლემის შესახებ იცის. დაახლოებით სამი წლის წინ ბეტონი დააგეს ძალიან მცირე მონაკვეთზე. გზა არის აღმართი,  რაც კიდევ უფრო ართულებს მდგომარეობას. სულ იქნება 900 მეტრი,  აქედან 100 გაკეთებულია და დაახლოებით 500 მეტრის მანძილზე არის მართლა კატასტროფული მდგომარეობა”,_ ამბობს ბექა კეკელიძე.

იგეგმება თუ არა გზის აღნიშნული მონაკვეთის გაკეთება _ ამ კითხვით ბუკისციხის ადმინისტრაციულ ერთეულში მერის წარმომადგენელს, თეიმურაზ შარაშიძეს დავუკავშირდით, თუმცა მან, ჩვენს კითხვას არ უპასუხა და საკითხზე კომენტარის მისაღებად მერიის პრესსამსახურთან გადაგვამისამართა.

მერიაში ამბობენ, რომ გზის გასაკეთებლად ტენდერია გამოცხადებული.

როგორც სახელმწიფო შესყიდვების გვერდიდან ირკვევა, ჩოხატაურის მუნიციპალიტეტის მერიამ ელექტრონული ტენდერი აუქციონის გარეშე 17 ნოემბერს გამოაცხადა. წინადადებების მიღება 1 დეკემბერს დაიწყო, ხოლო 4 დეკემბერს დასრულდა. ამ დროისთვის შეთავაზება შპს სავანეს აქვს გაკეთებული და  შერჩევა-შეფასების ეტაპი მიმდინარეობს. შესყიდვის სავარაუდო ღირებულება  165 184 ლარია. შესყიდვის ობიექტს კი ჩოხატაურის მუნიციპალიტეტის, ბუკისციხის ადმინისტრაციულ ერთეულში სოფელ იანეულში ისააკ კეკელიძის ქუჩაზე (მამია კეკელიძის მიმართულებით) ბეტონის საფარის მოწყობის სამუშაოების, ბუკისციხის ადმინისტრაციული ერთეული მაედანაზე (ბუთურიკეს უბანში და ლილის აღმართში) საავტომობილო გზის აღდგენის სამუშაოებისა და ბუკისციხის ადმინისტრაციულ ერთეულში სოფელ იანეულში სასაფლაოსთან მისასვლელი გზის აღდგენის სამუშაოები წარმოადგენს. სამუშაოს შესრულების ვადაა ხელშეკრულების დადებიდან 60 კალენდარული დღე.

შედგება თუ არა შეთანხმება  გზის გაკეთების შესახებ – ამ საკითხზე “გურია ნიუსი” ინფორმაციას ტენდერის შედეგების განვითარების შესაბამისად შემოგთავაზებთ.