თბილისში, გაბრიელ სალოსის ქუჩაზე სპეცოპერაცია უკვე რამდენიმე საათია მიმდინარეობს.
„გურია ნიუსი“ დაინტერესდა, რას უკავშირდება გაბრიელ სალოსის ქუჩაზე განვითარებული მოვლენები, რამდენად მზადაა სახელმწიფო თავიდან აირიდოს მსგავსი უკიდურესობები, ასევე, შესაძლოა თუ არა მომხდარმა ზეგავლენა მოახდინოს ქვეყნის იმიჯზე და ამის გასარკვევად სხვადახვა ექსპერტს დაუკავშირდა.
უსაფრთხოების საკითხებში ექსპერტის, ბესო ალადაშვილის თქმით, სპეცოპერაცია ჯობდა ზედმეტი ხმაურის გარეშე ჩატარებულიყო, სახელმწიფოს მზაობის შეფასება კი ოპერაციის დასრულების შემდეგ იქნება შესაძლებელი.
„ზოგადი შეფასება ისაა, რომ რადგან ოპერაციაში ჩართულია სუს-ის ანტიტერორისტული სამსახური, ბუნებრივია, რომ საქმე გვაქვს ტერორიზმთან ბრძოლასთან, ვიდრე კრიმინალურ დაჯგუფებასთან. დანარჩენი ანალიზი ოპერაციის დამთავრების შემდეგ იქნება ცნობილი. პირველი შთაბეჭდილება არის ის, უფრო ეფექტიანი და საზოგადოებისთვის უფრო უსაფრთხო იქნებოდა, თუ ამ ეჭვმიტანილების დაკავება გახორციელდებოდა საცხოვრებელ ბინაში შესვლამდე ან ბინიდან გამოსვლის შემდეგ. იმიტომ, რომ რეალურად, პრობლემები შეექმნათ უკვე იქ მცხოვრებლებს. არცერთი ქვეყნისთვის არ არის სასიამოვნო ასეთი რეზონანსი. ალბათ, აქ საქმე გვაქვს „ისლამურ ტერორიზმთან“. ჯობდა ეს სპეცოპერაცია დიდი ხმაურის გარეშე ჩატარებულიყო. ორი მხრივ შეიძლება შევაფასოთ, ერთი მხრივ, რომ სახელმწიფო ტერორიზმს ებრძვის და შედეგების ანალიზის მიხედვით გამოვლინდება თუ რამდენად არიან მზად ჩვენი სამსახურები რეალურ ტერორიზმთან ბრძოლაში.
მისივე თქმით, კონკრეტული შედეგის შემდეგ იქნება ცნობილი, თუ რა შეფასება მოჰყვება განვითარებულ მოვლენებს მსოფლიო ქვეყნებში.
„აი, ამ ტერორიზმთან ბრძოლის შედეგებზე იქნება დამოკიდებული უკვე ის რეზონანსი, თუ რა შეფასებას გამოიწვევს ეს მსოფლიოში. დაველოდოთ კონკრეტულ შედეგს და უფრო მეტი ინფორმაცია გვექნება მერე“, _ ამბობს ალადაშვილი.
ბრიგადის გენერალი, ანალიტიკოსი სამხედრო-პოლიტიკურ და უსაფრთხოების საკითხებში ამირან სალუქვაძე კი „გურია ნიუსთან“ საუბრისას აღნიშნავს, რომ შეფასების გაკეთება რთულია, რადგან დაჯგუფების საქართველოში ყოფნის მიზეზი ჯერჯერობით უცნობია.
„რთულია კომენტარის გაკეთება რადგან ინფორმაცია საკმაოდ მცირე არის. არ ვიცით რა გეგმები ჰქონდა ამ გუნდს და რა მიზნით იყვნენ აქ. თავს შევიკავებ კონკრეტული პასუხისგან, ვიდრე ინფორმაციას არ გაავრცელებენ სპეციალური ორგანიზაციები. სახელმწიფო მზად ყველაფრისთვის ვერ იქნება, მსგავსი გამოწვევები სერიოზულ ზიანს აყენებს და უამრავი მაგალითი გვაქვს ამისი. ყველაზე წარმატებულ სახელმწიფოებშიც კი, საფრანგეთში, დიდ ბრიტანეთში, მათ შორის ამერიკის შეერთებული შტატებშიც კი, ამიტომ, გააჩნია გამოწვევას, გააჩნია გამოწვევის საფრთხის მასშტაბებს. ტერაქტების სერია იყო საფრანგეთში, ბელგიაში, მაგრამ ამით ქვეყნების იმიჯი არ შელახულა.
ის ასევე აღნიშნავს, რომ საზოგადოება პანიკაში არ უნდა ჩავარდეს და განვითარებულ მოვლენებს მშვიდად უნდა შეხვდეს.
„მთავარია, რომ ამ ყველაფერს მშვიდად შევხვდეთ. ყველამ გამოვიჩინოთ საზოგადოებრივი პასუხისმგებლობა. არ მივცეთ ამას ის მიმართულება, რაც სახელმწიფოსთვის წამგებიანი იქნება. არ მივცეთ ვინმეს საბაბი და სალაპარაკო თითქოს საქართველო ტრანზიტი არის საფრთხის რუსეთისკენ და ა.შ. მსგავსი განცხადება კარასინმაც გააკეთა სულ ახლახან და ამიტომ მივცეთ სპეცსამსახურებს საშუალება, შეასრულონ თავიანთი მოვალეობები“.
მისივე თქმით, სპეცსამსახურებს და არმიას გაძლიერება სჭირდება.
„რაც შეეხება იმას, რომ სპეცსამსახურებს და არმიას გაძლიერება სჭირდება ამაზე მუდმივად ვსაუბრობთ“, _ ამბობს სალუქვაძე.
