გურიაში ხვნა-თესვის სეზონი უკვე დაიწყო. თუმცა, ჯერ აქტიურ ფაზაში არ გადასულა. წესით, აპრილის ბოლოს დათესილი სიმინდი კარგად ასწრებს ვეგეტაციას, მოსავალსაც არ აგვიანდება და მეურნე კაცს გვიან შემოდგომაზე შესაძლო ცუდი ამინდის შიში აღარ აქვს, რომ მოსავალი თოვლის ან ყინვის გამო გაუფუჭდება.
რა მდგომარეობაა დღეს ოზურგეთის მუნიციპალიტეტში? ოზურგეთის მუნიციპალიტეტის მერიის სოფლის მეურნეობის განვითარების სამსახურის უფროსი ამირან გირკელიძე “გურია ნიუსთან” ხელისუფლების მიერ დაგეგმილ ღონისძიებებზე საუბრობს:
“ჩვენი სამზადისი იმით გამოიხატება, რომ ხვნა-თესვის სეზონის მოახლოებასთან დაკავშირებით, ვაგროვებთ ყველა საჭირო ინფორმაციას სასოფლო-სამეურნეო დანიშნულების ფართობებთან მისასვლელი გზების მდგომარეობის შესახებ, იმ მიზნით, რომ საჭიროების შესაბამისად, ისე მოხდეს მათი შეკეთება, ხელი არ შეეშალოს, პირველ რიგში, ხვნა-თესვის კამპანიას, ხოლო მომდევნო ეტაპზე, ფაროსანას საწინააღმდეგო ღონისძიების გატარებისას, ამ გზებზე შესაძლებელი იყოს ტექნიკის გატარება. შესაბამისი ინფორმაციის მოპოვებას ვახდენთ მუნიციპალიტეტის მერის წარმომადგენელთა თანაშემწეების დახმარებით (მკითხველს შევახსენებთ, რომ ჯერ კიდევ არ არიან დანიშნული ოზურგეთის მუნიციპალიტეტის სოფლებში მუნიციპალიტეტის მერის წარმომადგენლები. ავტ.).
“გურია ნიუსი” იმყოფებოდა რამდენიმე სოფელში (მერია, ნატანები, ლიხაური, ჭანიეთი) და არსებული მდგომარეობის მიხედვით, იმის თქმა შეიძლება, რომ ფართობებთან მისასვლელი გზები, განსაკუთრებულ წესრიგში არა, მაგრამ ისეთ მდგომარეობაში კი არის, რომ ტრაქტორს გავლა და ყველა ფართობთან მისვლა შეუძლია. თუმცა, გაუმჯობესება აუცილებელია.
ამირან გირკელიძე ამბობს, რომ წელს განსაკუთრებულ აქცენტს აკეთებენ სოფლების გზებსა და შიდა გზებზე, რადგან ხვნა-თესვის სეზონის პარალელურად, მალე დაიწყება ფაროსანას საწინააღმდეგო ღონისძიებები: შეწამვლა ცხელი ნისლის მეთოდით და სხვა. მიუხედავად მაღალი გამავლობის მქონე მანქანებისა, რომლებზეც შესაწამლი აპარატებია დამაგრებული, გზების შეკეთება აუცილებელია. დღეისთვის არსებობს ასეთი გზების სია, რომელიც თანმიმდევრულად უნდა შეკეთდეს შესაძლებლობის ფარგლებში.
სოფელ ნატანების მკვიდრი ოლეგ ნადირიძე ხალხის გასაჭირზე საუბრობს.
_ წელს, როგორც არასდროს, ისე გაუჭირდება ხალხს ყანების დათესვა. ფული უფრო და უფრო არ არის ხალხში _ თითქმის ყველა ოჯახს ბანკის ვალი აქვს. ორიოდე ტრაქტორია სოფელში, იმაზეც ორი ხანდაზმული ტრაქტორისტი ზის. მე მაქვს ტრაქტორისტის პროფესია და ვიფიქრე, ვიმუშავებ, ცოტა ხელფასს ავიღებ,-მეთქი. მომთხოვეს ახალი მართვის მოწმობა. სად მაქვს? მინდოდა მემუშავა და არაფერი გამოვიდა… _ გვეუბნება ის.
გასაჭირზე საუბრობს სოფელ მერიის მკვიდრი ავთო კოსტავაც:
_ რით დახნავს ხალხი საყანე ფართობებს? არც ფული აქვთ და არც სათესლე სიმინდი. უმრავლესობა ასეთ დღეშია. რა უნდა ქნას გლეხმა, რომელსაც გაზაფხულამდე ძლივს გააქვს თავი?! ახლა ყველაზე ცუდი დროა _ ახალი არაფერია შემოსული, შარშანდელი მოსავალი თავდება ან უკვე გათავებულია. სოფლის მცხოვრებთა უმრავლესობა ვერ შეძლებს ყანების დათესვას. ნისიად უკვე აღარ ხნავენ. აქამდე თხილის სეზონამდე აცლიდნენ გადასახადს, ახლა თხილის იმედი აღარავის აქვს. ვნახოთ, ღმერთი თუ გადმოგვხედავს,
“გურია ნიუსთან” იმავე თვალსაზრისს გამოხატავენ აღნიშნული სოფლების მოსახლეობის წარმომადგენლები: ვალერი ლომჯარია, მერაბ სალუქვაძე, ავთო ცინარიძე, სერგო თოიძე და სხვები.
ხალხის ასეთ გასაჭირთან დაკავშირებით ვესაუბრეთ შპს “მექანიზატორის” ოზურგეთის სერვისცენტრის დირექტორს ბესო გოგიტიძეს.
მისი ინფორმაციით, სერვისცენტრში 42 ტრაქტორი მუშა მდგომარეობაშია და დასახნავი ფართობების ხარისხიან დამუშავებაზე პასუხისმგებლობას იღებს.
_ რაც შეეხება ხალხის გასაჭირს, გასაგებია, თუმცა, ჩვენი ორგანიზაცია ნისიად ვერ დახნავს ფართობებს. ეს არის ოფიციალური ორგანო და გაკეთებულია ოფიციალური ტარიფი. თუ გლეხები ან სოფლების რწმუნებულები ბანკებს მოელაპარაკებიან და მიზერული სესხებით დააკმაყოფილებენ ხალხს, რაც დახვნის საფასურად საკმარისი იქნება, ძალიან კარგს იზამენ. ხელშეკრულების პრინციპით, შესაძლებელია ამ ყველაფრის გაკეთება.
კითხვაზე, იქნება თუ არა ტარიფი ხელმისაწვდომი და განსხვავება ხომ არ არის ფასებში, ბესო გოგიტიძემ თქვა, რომ “ფასებში არის განსხვავებები იქ, სადაც მძიმე და ეწერი ნიადაგებია. მაგალითად, ასეთი არის სოფელ შრომის ცალკეული უბნები. ფასის გაანგარიშება მოხდება, საწვავის ხარჯისგან გამომდინარე და ასე დაანგარიშდება ერთი ჰექტრის მიხედვით”.
ხვა-თესვის სეზონზე მუშაობა, როგორც ამირან გირკელიძე აღნიშნავს, კერძო პირებსაც შეუძლიათ. რაც შეეხება შედარებით რთული გეოგრაფიული მდებარეობის მიკროფართობებს, სადაც მძიმე ტექნიკა ვერ შევა, იქ, შესაძლოა, იმუშაოს ცოცხალმა გამწევმა ძალამ (ცხენი, ხარი), რომელსაც ჯერ კიდევ იყენებს მოსახლეობა. ასევე, ბევრი არა, მაგრამ აქა-იქ მოსახლეობაში ჰყავთ მცირე გამავლობის მოტო-ბლოკები, რასაც მოსახლეობა ასე თუ ისე გამოიყენებს.
ოზურგეთის მუნიციპალიტეტის სოფელ შრომის მაჟორიტარი დეპუტატი ოზურგეთის საკრებულოში, დავით ჭაკნელიძე “გურია ნიუსთან” ამბობს, რომ სოფელ შრომაში საყანე ფართობებს, ძირითადად, დახნავს კერძო მეწარმე ლევან ფუტკარაძე.
_ ჩვენ ვესაუბრეთ მას. ასევე, გლეხებთან გვქონდა საუბარი ექვსთვიანი უპროცენტო განვადების შესახებ, რაც შესაძლებელი იქნება “კრედო ბანკის” მეშვეობით. ანალოგიური განვადებით, შპს “მექანიზატორიც” თანახმაა დაამუშაოს სახნავ-სათესი ფართობები. ასე რომ, ძირითადად, ჩვენს სოფელში ხვნა-თესვის საკითხი გარკვეულია, _ გვითხრა ჭაკნელიძემ.
