„მოხალისეობა კარგია, თუმცა  დასაქმებისთვის მეტი ინფორმირებულობა  გვჭირდება“: რეგიონული ფორუმი გურიაში

17 ნოემბერს, ოზურგეთში, ფოლკლორის ცენტრის   დარბაზში,   მოხალისეობის რეგიონული ფორუმი შედგა, რომელიც  ევროკავშირის მიერ მხარდაჭერილი პროექტის „სამოქალაქო საზოგადოების ინიციატივა“ ფარგლებში, განათლების განვითარების და დასაქმების ცენტრის (EDEC) და გურიის რეგიონული ჰაბის – ინოვაციებისა და სამოქალაქო განვითარების ცენტრ – პროგრესის სახლის მიერ იყო ორგანიზებული.

აღნიშნული ფორუმის მიზანი, როგორც ცნობილია, არის გურიის ახალგაზრდების  გააქტიურება და მათი საქმიანი ჩართვა ადგილობრივი თემების საჭიროებების გადაწყვეტაში.

როგორც წინა ფორუმზე,  ამავე წლის ივნისში, ახლაც ამ ფორუმში მონაწილეობდნენ  გურიაში მცხოვრები ახალგაზრდები: სტუდენტები, უფროსკლასელები, ახალგაზრდული საინიციატივო ჯგუფები, სამოქალაქო განათლების პედაგოგები და პროფესიული მასწავლებლები.  თუმცა, მასში მონაწილეობის უფლება შეზღუდული არ იყო და  უფროსი ასაკის ადამიანებსაც შეეძლოთ მონაწილეობა, ვინც მოხალისეობის  სურვილით და ზოგადად, დასაქმებითაა დაინტერესებული.

ფოლკლორის ცენტრში, სპეციალურ სივრცეში, გამოფენილი იყო საილუსტრაციო ფოტოები. ასევე  მოეწყო გურიაში მოქმედი სამოქალაქო და სათემო ორგანიზაციების, სოციალური საწარმოების საქმიანობის გამოფენა- პრეზენტაცია.

_ ფორუმის მიზანია გურიის რეგიონის ახალგაზრდების აქტიური ჩართვა ადგილობრივი თემის საჭიროებების გადაწყვეტაში.  მოხალისეობის კულტურის პოპულარიზაცია, მოხალისეების მიმღებ ორგანიზაციებსა და მოხალისეობით დაინტერესებულ პირებს შორის კომუნიკაციის ხელშეწყობა, რაც დღეს უშუალოდ აქ ხდება, _ თქვეს პროგრესის სახლის წარმომადგენლებმა.

ფორუმის მონაწილე ახალგაზრდები, „გურია ნიუსთან“ აცხადებდნენ, რომ მოსახლეობაში უფრო მეტად უნდა ხდებოდეს და აუცილებელიცაა რეგიონული საზოგადოებრივი ორგანიზაციების ცნობადობის გაზრდა, მათი საქმიანობის და განხორციელებული პროექტების შესახებ ფორუმის მონაწილეების ინფორმირება.

_ეს ფორუმი  საუკეთესო საშუალებაა, რომ ახალგაზრდები სამოქალაქო აქტივისტებად ჩამოყალიბდნენ. ჩვენს სკოლაში ადრეც განვახორციელეთ   არაერთი პროექტი და ახლაც ვაგრძელებთ მუშაობას.  ლიხაურის საჯარო სკოლის  კლუბს ჰქვია „მზის შვილები“. ბავშვებმა მოამზადეს და განახორციელეს არაერთი პროექტი. ასევე საკმაო აქტივობები ჩაატარეს.  მაგალითად,  ტოლერანტობის თუ მშვიდობის დღესთან დაკავშირებით.  ეს პროექტი საუცხოოდ ეხმარება მოსწავლეებს და მასწავლებლებს, გაუმჯობესდეს,  დამკვიდრდეს სრული სამოქალქო აქტივიზაცია, რაც ჰაერივით ესაჭიროება ჩვენს საზოგადოებას , _   ამბობს  „გურია ნიუსთან“ სამოქალაქო განათლების მასწავლებელი, ლიხაურის საჯარო სკოლის პედაგოგი, ირმა გორდელაძე.

ის ფაქტი, რომ მოსახლეობაში კარგად არ იცნობენ სამოქალაქო ორგანიზაციებს, ფორუმის ერთ–ერთ მიზნად ისიც ფიგურირებდა, რომ  ასეთ ორგანიზაციებზე, მათ  საქმიანობაზე უფრო მეტი იცოდნენ, მიიღონ მეტი ინფორმაცია  რიგითმა ადამიანებმა.

ფორუმის მსვლელობისას, „გურია ნიუსთან“, არაერთმა ახალგაზრდამ, განსაკუთრებით სკოლის მოსწავლეებმა აღნიშნეს, რომ მთლად კარგად არ იციან ამ ფორუმის მნიშვნელობაზე და უფრო მეტი ინფორმაციის მიღება სურთ.

_მომწონს, რომ ასეთი ფორუმი ტარდება. არის  აქტივობა. მთელი სულით და გულით ვემხრობი მსგავს ღონისძიებებს. თუმცა  მსურს, მეტი ინფორმირება, მეტად გაკეთებული საქმე, ვიდრე მხოლოდ ღონისძიებაა.  მოხალისეობა კარგია, თუმცა მეტი ინფორმირება და დასაქმებაა საჭირო,_ გვითხრა ოზურგეთელმა თინათინ თავაძემ.

_სამწუხაროდ, ოზურგეთში იშვიათად ტარდება ასეთი ღონისძიებები. რაც ჩატარდა, კარგია და მომწონს. უფრო ხშირად უნდა ჩატარდეს და შედეგიც უნდა გამოჩნდეს, ეს არა მარტო ჩვენი ქალაქისთვის არის მნიშვნელოვანი, არამედ მთელი ქვეყნისთვის. მოხალისეობა კარგია, თუმცა  დასაქმებისთვის მეტი ინფორმირებულობა  გვჭირდებ, _ ამბობს ოზურგეთელი მოსწავლე მარი შარაშენიძე.

_იცით, ძალიან კარგია ეს ყველაფერი.  მთავარია, შედეგიანი იყოს. ძალიან ბევრი მოსწავლე არ მონაწილეობს ამ ფორუმში და უფრო მეტმა არ იცის, რას ნიშნავს ეს. ზოგადად კი,  გეტყვით, რომ ძალიან მომწონს. იდეა არის საუკეთესო. გამიგია, რომ არაერთი პროექტიც გახორციელდა სკოლებში, თემებში. თუმცა, მეტი მუშაობაა საჭირო.  იმედიანი ადამიანი ვარ და მჯერა, უკეთესობისკენ წავა საქმე, _ გვითხრა სტუდენტმა მარი თავაძემ.

ღონისძიების დროს, ახლაგაზრდებმა დაათვალიერეს სპეციალურად გამოყოფილ სივრცეში განთავსებული, გურიაში მოქმედი სათემო და სამოქალაქო ორგანიზაციების, სოციალური საწარმოების საქმიანობის გამოფენა–პრეზენტაცია. ამ ორგანიზაციების წარმომადგენლებმა, იმ ახალგაზრდებს, რომლებიც მოხალისეობით არიან დაინტერესებული, შესთავაზეს აღნიშნულ საქმიანობაში ჩართვა. ასევე მიაწოდეს გახორციელებულ პროექტებზე ინფორმაცია.

_სოციალური საწარმო „რედო“მუშაობს კანონთან კონფლიქტში მყოფ ბენეფიციარებთან.  ჩვენ ეს საქმე კარგად გამოგვდის. ახლაც დაწვრილებით ვუხსნით და ვაცნობთ ჩვენს შესახებ ახალგაზრდებს. ჩვენი საქმიანობა არის და მუდამ იქნება ახალგაზრდობისთვის მოტივაციის გაჩენის და გაძლიერების საუკეთესო შანსი, _ გვითხრა „რედოს“  ხელმძღვანელმა ცოტნე საჯაიამ.

_ მე როგორც ძველი თაობის წარმომადგენელს, ძალიან მოწონს ამ ფორუმის შინაარსი. კარგია, რაც მეტი აქტივობა იქნება. ახალგაზრდებს განათლება და მერე დასაქმება სჭირდება, რომ ნორმალური ქვეყანა დროულად ჩამოყალიბდეს, _ გვითხრა პროფესიით ჟურნალისტმა  ციცო ტუღუშმა.

„წითელი ჯვრის“ რაიონული ორგანიზაციის ხელმძღვანელმა, ია ურუშაძემ „გურია ნიუსთან“ თქვა, რომ აქ შეკრებილ ახალგაზრდებს ესაუბრებიან, თუ როგორ შეუძლიათ წითელი ჯვრის მოხალისეებს,  ემსახურონ საკუთარ საზოგადოებას:

_ჩვენ დღეს  აქ ვიმყოფებით, რათა აქტიურად ვესაუბროთ ფორუმის მონაწილეებს. ავუხსნათ მათ, რომ წითელი ჯვარი არის  საქველმოქმედო ორგანიზაცია, რომელიც ჰუმანიტარულ დახმარებას უწევს გაჭირვებულ ადამიანებს თუ რეგიონებს. ის ემსახურება კატასტროფის მსხვერპლს და ეხმარება, ასწავლის  თემებს, თავიდან როგორ აიცილონ კატასტროფა. უმარტივესი გზა, რომლითაც შეგიძლია,  იყო მისი მისიის ნაწილი, არის მოხალისეობა. ეს ახალგაზრდებს აძლევს შესაძლებლობას, დიდი საქმის ღირებული ნაწილი გახდნენ. შეცვალონ ადამიანის ცხოვრება უკეთესობისკენ. მიიღონ ახალი ცოდნა და დააგროვონ გამოცდილება, განავითარონ ახალი უნარ–ჩვევები, ისწავლონ და ასწავლონ სხვებს, მიიღონ ბედენიერება სხვების დახმარებით. ასე ვესაუბრეთ დღეს  ჩვენს ახალგაზრდებს. სხვანაირად არ გამოვა. მოხალისეობის განვითარება საუკეთესო საშუალებაა, საუკეთესო საზოგადოების შესაქმნელად,_  გვითხრა ია ურუშაძემ.

ფორუმზე იმყოფებოდნენ ლანჩხუთის ახალგაზრდული საბჭოს წარმომადგენლები. მათ საბჭოების როლის და პოპულარიზაციის მიზნით, ფორუმის მონაწილეებს საკუთარი საქმიანობა გააცნეს.

მოხალისეობის რეგიონული ფორუმის მეორე ნაწილი  დაეთმო დისკუსიას, თემაზე: „მოხალისეობა და აქტიური მოქალაქეობა“. აღნიშნული დისკუსიის დროს, კიდევ ერთხელ, ხაზგასმით აღინიშნა, როგორც მონაწილეების, ისე ორგანიზატორების მხრიდან, რომ ფორუმის  უპირველესი მიზანია  გურიის რეგიონის ახალგაზრდების  მუდმივი და აქტიური ჩართვა  ადგილობრივი თემების საჭიროებების გადაწყვეტაში, თავად მოხალისეობის კულტურის პოპულარიზაცია. ასევე ახალგაზრდული საბჭოების როლის და საქმიანობის მეტად გაცნობა და საზოგადოების  ყველა ფენის ინფორმირება მათ შესახებ.

გურიის რეგიონული ფორუმი ევროკავშირის და კონრად ადენაუერის პროექტის: „სამოქალქო საზოგადოების ინიციატივა“ ფარგლებში შედგა.