ქართულმა ოცნებამ“ სალომე ზურაბიშვილის გამარჯვებისთვის აკრძალული მეთოდები გამოიყენა, რომელიც სისხლის სამართლის კანონმდებლობით დასჯადია _ ამის შესახებ ეუთოს მიერ საქართველოს საპრეზიდენტო არჩევნებთან დაკავშირებით გამოქვეყნებულ შემაჯამებელ დასკვნაშია ნათქვამი.
დოკუმენტის შინაარსი უმწვავესია. ასეთი რადიკალურად ნეგატიური შეფასება ყველაზე გავლენიან სადამკვირვებლო მისიას საქართველოს არჩევნებზე ბოლო 20 წელია, არ დაუდია.
მაღალი თანამდებობის პირების წინასაარჩევნო კამპანიაში მონაწილეობამ კიდევ წაშალა ზღვარი სახელმწიფოსა და პარტიას შორის.
„მიუხედავად იმისა, რომ კანონი არ კრძალავს, მერები, გუბერნატორები და პარლამენტარები, რომლებიც წარმოადგენდნენ ქართულ ოცნებას, თან დაჰყვებოდნენ ქართული ოცნების მიერ მხარდაჭერილ კანდიდატს სააგიტაციო შეხვედრებზე. ყველა ამ ქმედებამ წაშალა ზღვარი სახელმწიფოსა და პარტიას შორის, რაც არ შეესაბამება ეუთოს ვალდებულებებსა და საერთაშორისო პრაქტიკას.
ორივე ტურის დროს ამომრჩევლის მონაცემთა შეგროვებამ და პოლიტიკური უპირატესობის აღნიშვნამ, არჩევნების დღეს ამომრჩეველზე თვალთვალის ჩათვლით, გააჩინა კითხვები ამომრჩევლის პოტენციურ დაშინების და თავისუფლად და ანგარიშსწორების შიშის გარეშე, ხმის მიცემის შესაძლებლობასთან დაკავშირებით,“ _ აღნიშნულია განცხადებაში.
ეუთოს დამკვირვებლები წერენ, რომ უბნებზე მობილიზებული მმართველი პარტიის კოორდინატორების გამო ეჭვი გაუჩნდათ, რომ ამომრჩეველი ვერ ახერხებდა ხმის მიცემას ზეწოლისა და ანგარიშსწორების შიშის გარეშე.
„ოდირის სადამკვირვებლო მისიამ დააფიქსირა მაღალი რანგის ოფიციალური პირების მიერ კამპანიისთვის ინსტიტუციური ვებ-გვერდების გამოყენების მაგალითები და სამუშაო საათების დროს საჯარო მოხელეების მონაწილეობა სააგიტაციო ღონისძიებებში,“ – აღნიშნულია განცხადებაში.
ამას გარდა, დოკუმენტში ბიძინა ივანიშვილის მიერ 600 ადამიანისთვის სესხების ჩამოწერა, ხმების ყიდვად არის მოხსენიებული. დოკუმენტის 27 გვერდზე ნათქვამია, რომ მოხდა ხმების ყიდვა.
„მეორე ტურის წინ მთავრობის განცხადება 600 ათასი პირისთვის “ქართული ოცნების” თავმჯდომარესთან დაკავშირებული კერძო ფინანსური ინსტიტუტის მიერ ვალის ჩამოწერის შესახებ, ასევე ეროვნული და ადგილობრივი ხელისუფლების სხვა ინიციატივებიც მოქალაქეებისთვის შეღავათების უზრუნველსაყოფად, ოდირისსადამკვირვებლო მისიამ და სხვებმაც ჩათვალეს ხმების ყიდვის ფორმად. ეს პრაქტიკა იკრძალება საარჩევნო და სისხლის სამართლის კოდექსით,“ _ აღნიშნულია განცხადებაში.
