რამდენიმე დღის წინ გამოცემა „IL MATTINO“ იტყობინებოდა, რომ შეიძლება ხვიჩა კვარაცხელიამ „ნაპოლისაგან“ ხელშეკრულების განახლების სანაცვლოდ გასამრჯელოს 5 მილიონამდე გაზრდა მოითხოვოს.
გუშინ, იმავე გამოცემამ დაწერა, რომ ახლა მოლაპარაკებები ხელფასის მინიმუმ 6 მილიონ ევრომდე გაზრდაზე მიმდინარეობს – ბონუსების და სასპონსორო გარიგებების გარეშე.
კლუბის პრეზიდენტ აურელიო დე ლაურენტისს ფეხბურთელების გასამრჯელოს მომატების მოთხოვნის გამო თავსატეხი გაუჩნდა.
ვიქტორ ოსიმენს 12 მილიონს დაჰპირდნენ და ქართველის აგენტი მამუკა ჯუღელი მზადაა ლაურენტისის კარზე დაუკაკუნოს, რომელმაც 16 თვის წინ ხვიჩასთან უჩვეულო ხელშეკრულება გააფორმა, მაგრამ ახლა იძულებული იქნება, პირობებს გადახედოს, რამეთუ ევროპული ფეხბურთის ერთ-ერთ ტალანტს მთხოვნელების რიგი დაუდგა.
გამოცემა „SpazioNapoli“ კი აღნიშნავს, რომ ქართველი მოთხოვნით ნეაპოლურ კლუბს აფრთხობს და მოლაპარაკებები განსაკუთრებულად წარმატებულად არ მიმდინარეობს იმ ფონზე, როდესაც ფეხბურთელის მიმართ ინტერესს რამდენიმე კლუბი იჩენს.
ამ თემას პოპულარული იტალიური გამოცემა „Gazzetta Dello Sport“-იც გამოეხმაურა.
„კვარაცხელია „ნაპოლიში“ მშვიდად არის და არ აპირებს კლუბთან პრობლემების შექმნას, მაგრამ უნდა ითქვას, რომ შესაძლოა, სცენარი სექტემბერში შეიცვალოს. თუ ოსიმენი კონტრაქტს გაახანგრძლივებს და ხელფასის სახით წელიწადში მინიმუმ 10 მილიონამდე მიიღებს, შეიძლება ისე მოხდეს, ქართველი ჩემპიონის მოთხოვნებიც გაიზარდოს“, – დაწერა გამოცემამ.
ქართველი ფეხბურთელის გასამრჯელო ამჟამად მხოლოდ 1.2 მილიონი ევროა, რითაც „ნაპოლის“ ერთ-ერთი ყველაზე დაბალანაზღაურებადი ფეხბურთელია.
თავად ხვიჩა კვარაცხელიამ, რომელმაც კუნთის გადაღლილობის გამო „ფროზინონესთან“ „სერია A“-ს პირველი ტურის მატჩი გამოტოვა, ვარჯიში განაახლა.
ქართველმა საერთო ჯგუფთან ერთად სრული დატვირთვით ივარჯიშა და დიდი ალბათობით, 27 აგვისტოს „სასუოლოსთან“ საშინაო შეხვედრაში მონაწილეობას მიიღებს.
გამოცემამ „Gazzetta Dello Sport“ დაწერა, რომ ნეაპოლური კლუბის მთავარი მწვრთნელი რუდი გარსია ხვიჩა კვარაცხელიას თამაშისა და შედეგიანობის გასაუმჯობესებლად გარკვეულ სვლებზე ფიქრობს.
„კვარას თამაშის გასაუმჯობესებლად, კარის წინ უფრო ეფექტური რომ გახადოს, რუდი რამდენიმე განსხვავებულ სვლებზე ფიქრობს. მას რა თქმა უნდა, არ სურს გამომგონებლობა და ფანტაზიის კასტრაცია, მაგრამ ამავდროულად ქართველის მოძრაობები უფრო და უფრო მეტად უნდა იყოს მეტოქის კარისკენ მიმართული. მისი ეფექტურობის პროცენტის გასაზრდელად, საკალათბურთო ენაზე რომ ვთქვათ, ბიჭმა უნდა გამოიყენოს პერიმეტრიდან მძლავრი დარტყმა“.
ცნობილი გახდა, რომ ჩრდილოეთ მაკედონიისა და „ნაპოლის“ ნახევარმცველი ელიფ ელმასი გერმანული „ლაიფციგის“ ინტერესის სფეროშია.
გერმანელები მზად არიან 23 წლის ფეხბურთელში 30 მილიონი ევრო გადაიხადონ. ნეაპოლელთა პასუხი უცნობია, მაგრამ ელმასს კლუბთან კონტრაქტი 2025 წელს ეწურება, რის გამოც შეიძლება იტალიის ჩემპიონმა მის გაყიდვაზე იფიქროს, მით უფრო, 30 მილიონად.
ელიფ ელმასი“„ნაპოლიში“ 2019 წლიდან თამაშობს და 173 მატჩში 17 გოლი გაიტანა. მანამდე ის „რაბოტნიჩკისა“ და „ფენერბაჰჩეს“ ღირსებას იცავდა.
ავტორი
